Bꞌit yic aloj vachꞌ lolonel dꞌa Dios
25
Mamin Jehová, in Diosal ach. Ol val vachꞌ lolonel dꞌayach, yujto ix aqꞌuelcꞌoch tas satubꞌtac nabꞌil uuj, ix aqꞌuelcꞌoch tas albꞌilcan uj dꞌa pecaꞌ.2 Icha junoc bꞌulan̈ qꞌuen qꞌueen ix ajcan juntzan̈ chon̈abꞌ uuj. A chon̈abꞌ te tecꞌan, ix laj em lan̈najoc. Ix aqꞌuem lan̈naj spalacio ebꞌ chꞌoc nacional, man̈xa bꞌaqꞌuin̈ ol bꞌochajxiqꞌueoc.
3 Yuj chiꞌ, a juntzan̈ nación te tecꞌan, ol ach yicꞌchaan̈, aton juntzan̈ maj ocꞌ scꞌol dꞌa yetanimail, ol xivpax ebꞌ dꞌayach.
4-5 Yujto a dꞌayach scol sbꞌa ebꞌ mebꞌaꞌ, tzach colvaj dꞌa ebꞌ ay tas tzꞌoch yuuj dꞌa scuscꞌolal. A ebꞌ anima te chuc, lajan val ebꞌ icha yaxn̈abꞌ ay yicꞌal. Lajan pax ebꞌ icha scꞌacꞌal yoc cꞌu dꞌa chimcꞌualil. Palta a ach tzon̈ a cꞌubꞌejel icha junoc qꞌuen qꞌueen. Icha chiꞌ tzꞌaj icꞌanem yacꞌumtaquil ebꞌ chꞌoc nacional chiꞌ. Icha tzꞌaj siclabꞌ yoc cꞌu ayic tzꞌoch svevenal asun, icha chiꞌ tzꞌaj acꞌanoch vaan ebꞌ chuc chiꞌ yel yav.
6 A dꞌa tzalan Sion tic, ol sbꞌo junoc nivan vael Jehová Yajal dꞌa Smasanil, ol yacꞌan dꞌa masanil nación. A schibꞌejal jun vael chiꞌ ecꞌbꞌal te vachꞌ, te vachꞌ pax yal sat uva ol ucꞌjoc.
7 A dꞌa jun tzalan tic ol yiqꞌuel jun cꞌapac Jehová, jun cꞌapac smusan sat masanil chon̈abꞌ, aton scuscꞌolal ebꞌ yedꞌ sman̈ pensaril ebꞌ.
8 Ol yacꞌ lajvoc chamel Jehová dꞌa juneln̈ej. Ol sucanel yal sat ebꞌ anima smasanil, ol yacꞌ lajvoc jantac sqꞌuixvelal schon̈abꞌ dꞌa masanil yolyibꞌan̈qꞌuinal tic. Aton Jehová tzꞌalan jun tic.
9 A dꞌa jun cꞌual chiꞌ ol cal icha tic: A Jehová co Diosal tic, aton cacꞌnacoch yipoc co cꞌool, a coljinac on̈. Con̈ tzalajec, yujto a ix on̈ colani, xco chama.
10 A Jehová ol tan̈van lum tzalan Sion tic. Yacbꞌan axo chon̈abꞌ Moab van stecꞌjiem dꞌa yedꞌtal icha tzꞌaj stecꞌjiem an̈ ac dꞌa scal stzaꞌ nocꞌ nocꞌ.
11 Ichato ol to yaqꞌuel lian scꞌabꞌ Moab chiꞌ, icha yacꞌan scꞌabꞌ junoc smacꞌan a aꞌ, vachꞌchom ol to yacꞌ yip, palta ol satel yacꞌumtaquil yuj Jehová.
12 Masanil smuroal juntzan̈ nivac chon̈abꞌ, ol em lan̈naj yuj Jehová. Chocꞌ ol ajcanem vecan dꞌa sat luum.