Yaelal ol javoc dꞌa sat lum tic
24
A Jehová ol mesan sat lum luum tic. Toxon̈ej ol can bꞌeran luum. Ol laj svuchꞌchitan sat luum tic, ol spechan saclem masanil ebꞌ cajan dꞌa luum.2 Lajan ol ajcan ebꞌ sacerdote yedꞌ ebꞌ comon anima. Lajan ol ajcan ebꞌ vin̈ patrón yedꞌ ebꞌ vin̈ smunlajvum. Lajan ol ajcan ebꞌ ix patrona yedꞌ ebꞌ ix smunlajvum, ebꞌ smanvaji yedꞌ ebꞌ schon̈vaji, ebꞌ tzꞌacꞌan majanil yedꞌ ebꞌ smajnani, ebꞌ tzꞌacꞌan bꞌocal yedꞌ pax ebꞌ sbꞌocani.
3 Toxon̈ej ol can bꞌeran luum, yujto ol satel masanil tas vachꞌ ay dꞌa sat luum. A Jehová ix alani, ol eln̈ejcꞌochoc.
4 Ol tacjoc luum, man̈xo vachꞌoc ol aj yilji luum. Masanil yolyibꞌan̈qꞌuinal tic ol tacjoqueloc, masanil ebꞌ nivac vinac ol satel ebꞌ. 5 Ol ixtaxbꞌat lum luum tic yuj ebꞌ cajan dꞌay, yujto maj scꞌanabꞌajej ebꞌ icha sleyal. Ix spitej sbꞌa ebꞌ dꞌa schecnabꞌil Dios. Ix yixtejbꞌat jun strato Dios chiꞌ ebꞌ sbꞌonac dꞌa yichbꞌanil.
6 Yuj chiꞌ ol cotcan jun catabꞌ dꞌa yibꞌan̈ lum luum tic yuj ebꞌ cajan dꞌa sat luum. Ol yabꞌ val syail ebꞌ, ol satel ebꞌ. Jayvan̈xon̈ej ebꞌ ol canoc.
7 Man̈xalaj yal sat teꞌ uva ol canoc, yujto ol tacjoquel teꞌ snunal. Cuscꞌolalxon̈ej ol aj ecꞌ ebꞌ tzꞌacꞌan qꞌuin̈.
8 Man̈xalaj qꞌuin̈ bꞌaj ol cꞌan̈ tan̈bꞌil yedꞌ teꞌ arpa. Man̈xalaj anima ol bꞌoan qꞌuin̈ chiꞌ.
9 Man̈xa mach ol ucꞌvoc an̈ ayic slaj och bꞌit. A an̈ an̈ chiꞌ, cꞌaꞌxo ol aj yucꞌji an̈ ol yabꞌ ebꞌ tzꞌucꞌantaxoni.
10 A jun chon̈abꞌ bꞌaj ay ebꞌ anima sqꞌuen̈ej somnaj yacꞌan qꞌuin̈, ol can tzꞌinan. Man̈xa junoc pat bꞌaj ol yal yoch junoc anima.
11 A ebꞌ anima, ol ocꞌ ebꞌ dꞌa yoltac calle, yujto man̈xa an̈ an̈. Ol lajvoquel tzalajcꞌolal dꞌa sat luum.
12 A juntzan̈ chon̈abꞌ ol ixtaxbꞌatoc, ol pojbꞌat spuertail.
13 Jayvan̈xon̈ej anima ol can dꞌa junjun nación dꞌa sat luum tic. Ichaxon̈ej tzꞌajcan junjunocxo sat teꞌ olivo yedꞌ teꞌ uva ayic smolji sat teꞌ dꞌa schaelal, icha chiꞌ ol ajcan ebꞌ anima chiꞌ.
14 A ebꞌ olto can chiꞌ, ol el yav ebꞌ yuj tzalajcꞌolal. Ol abꞌchaj yel yav ebꞌ bꞌaj tzꞌem cꞌu. Ol bꞌitan ebꞌ yujto ol yil jantac yipalil Jehová ebꞌ.
15 A ebꞌ cajan bꞌaj sjavi cꞌu yedꞌ juntzan̈xo chon̈abꞌ ay dꞌa stitac aꞌ mar, ol yal vachꞌ lolonel ebꞌ dꞌa Jehová sDiosal Israel.
16 Ol abꞌchaj sbꞌitan ebꞌ bꞌaj slajvicꞌoch lum luum, yuj yicꞌjichaan̈ sbꞌi Jehová te tojol.
Palta a in svalaꞌ: Ay, obꞌiltac in, van in lajviemi. A ebꞌ ixtum anima chiꞌ, man̈xa scachnabꞌil ebꞌ.
17 A val juntzan̈ ebꞌ cajan dꞌa sat lum tic, ol javoc nivan xivcꞌolal dꞌa yibꞌan̈ ebꞌ. Ay jul yedꞌ yaal ol laj em dꞌa yol sbꞌe ebꞌ.
18 A ebꞌ sbꞌat elelal yuj xivelal chiꞌ, a dꞌa yoltac jul ol bꞌat tan̈naj ebꞌ. Tato tzꞌelxi ebꞌ dꞌa jul chiꞌ, axo dꞌa yaal scanxi ebꞌ. Ol cot jun nivan yaxn̈abꞌ dꞌa satchaan̈, axo yipumal lum luum tic, ol tzicubꞌtan̈ajoc.
19 Ol ibꞌxoc val luum sicꞌlabꞌil, ol tzicubꞌtan̈aj luum, ol laj qꞌue n̈iqꞌuiljoc luum, chocꞌ ol aj luum.
20 Toxon̈ej ol ecꞌ chꞌumchꞌon luum icha junoc ucꞌum an̈, icha yecꞌ xecxon junoc lechpat yuj icꞌ. Yujto a smul ebꞌ anima, ix te albꞌi dꞌa yibꞌan̈ luum. Yuj chiꞌ ol telvoccan luum, man̈xa bꞌaqꞌuin̈ ol qꞌue vaan luum.
21 A dꞌa jun tiempoal chiꞌ, a Jehová ol acꞌanoch syaelal ebꞌ yajal tzꞌecꞌ dꞌa cal icꞌ dꞌa chaan̈ yedꞌ ebꞌ yajal dꞌa sat luum tic, ol acꞌjococh syaelal ebꞌ dꞌa tic.
22 Ol molbꞌaj ebꞌ icha smolbꞌaj junoc n̈ilan̈ ebꞌ presovum dꞌa yol junoc olan. Ol macchaj ebꞌ junoc tiempoal. Ol lajvoc chiꞌ ol acꞌjococh syaelal ebꞌ.
23 A dꞌa jun cꞌual chiꞌ, a Jehová Yajal dꞌa Smasanil, ol yacꞌ yajalil yedꞌ jantac stziquiquial dꞌa tzalan Sion, aton dꞌa Jerusalén dꞌa yichan̈ ebꞌ yichamtac vinaquil schon̈abꞌ. Yuj stziquiquial chiꞌ, a qꞌuen uj yedꞌ cꞌu man̈xo ol checlaj yoc, ichato ol qꞌuixvoccanoc.