A tas albꞌilcan dꞌa yibꞌan̈ Tiro
23
Aton juntzan̈ lolonel tic albꞌilcan dꞌa yibꞌan̈ Tiro:Ex icꞌum bꞌey barco yic Tarsis, elocabꞌ eyav yuj ilcꞌolal, yujto toxo ix satel chon̈abꞌ Tiro. Man̈xa junoc pat ix cani, man̈xa bꞌaj syal spixchajoch teꞌ barco chiꞌ. Ato dꞌa Chipre ix alchaj jun tic eyabꞌi.
2 Ex cajan ex dꞌa stitac aꞌ mar yedꞌ ex chon̈vajum aj Sidón, ix ex can tzꞌinan, a ex ton e checnacbꞌat ebꞌ e manvajum dꞌa scꞌaxepalecꞌ aꞌ mar.
3 Scꞌoch ebꞌ e manvajum chiꞌ dꞌa Egipto, smanan ixim trigo ebꞌ tzꞌel dꞌa stitac aꞌ Nilo. Slajvi chiꞌ schon̈anxi ixim ebꞌ dꞌa juntzan̈xo chon̈abꞌ. Aton dꞌa spatic chiꞌ tzeyicꞌ e ganar.
4 Ex aj Sidón, qꞌuixvan̈ec, yujto a jun chon̈abꞌ bꞌinajnac yuj sjelanil yecꞌ dꞌa yibꞌan̈ aꞌ mar, ol yal icha tic: Lajan in ajcan icha junoc ix ix malaj yuneꞌ, malaj bꞌaj sqꞌuibꞌtzitej junoc vinac, ma ix unin, yujto ix satel ebꞌ masanil, xcham Tiro chiꞌ.
5 Ayic ol cꞌoch yabꞌixal jun tic dꞌa Egipto, ol och ebꞌ anima dꞌa ilcꞌolal yuj tas ix uji dꞌa jun chon̈abꞌ chiꞌ.
6 Ol yalan ebꞌ icha tic: Elocabꞌ eyav yuj cuscꞌolal ex cajan dꞌa stiꞌ aꞌ mar, cꞌaxpajan̈ec ecꞌ dꞌa Tarsis, xcham ebꞌ.
7 ¿Tom man̈oc jun chon̈abꞌ tic aytaxon dꞌa pecaꞌ, jun bꞌaj tzꞌochn̈ej qꞌuin̈? ¿Tom man̈oc jun tic bꞌaj sbꞌat ebꞌ anima, bꞌat cajnaj ebꞌ dꞌa juntzan̈xo chon̈abꞌ najat ay?
8 ¿Mach ix naanqꞌue jun tic dꞌa yibꞌan̈ chon̈abꞌ Tiro, jun chon̈abꞌ to yicn̈ej ebꞌ rey yaji? A ebꞌ chon̈vajum, nivac vinac ebꞌ, te nivan yelcꞌoch ebꞌ dꞌa yolyibꞌan̈qꞌuinal tic.
9 A Jehová Yajal dꞌa Smasanil ix naani, yuj yicꞌjiem masanil ebꞌ syicꞌchaan̈ sbꞌa yedꞌ ebꞌ jelan dꞌa sat lum tic.
10 Ex aj chon̈abꞌ Tarsis, toxo ix lajviel jun chon̈abꞌ bꞌaj tzex xidꞌecꞌ chon̈val. A ticnaic munlajan̈ec dꞌa sat luum, icha syutej sbꞌa ebꞌ aj Egipto.
11 Ix yacꞌbꞌat scꞌabꞌ Jehová dꞌa yibꞌan̈ aꞌ mar, ix yacꞌan ibꞌxocqꞌue masanil chon̈abꞌ. Ix yalani to smacꞌjiem lan̈naj masanil chon̈abꞌ ayoch smuroal dꞌa yol yic Canaán.
12 Ix yalanpax Jehová chiꞌ dꞌa ebꞌ aj Sidón icha tic: Actejec eyacꞌanoch juntzan̈ e qꞌuin̈, yujto lajan ix ex ajcan icha junoc ix cobꞌes ix ixtaji. Vachꞌchom tzex bꞌatcan dꞌa Chipre, palta man̈ ol eyicꞌlaj eyip taꞌ, xchi Jehová chiꞌ.
13 Ilecbꞌat slum ebꞌ aj Babilonia, aton ol acꞌancanoch Tiro scajnubꞌoc nocꞌ caltacteꞌal nocꞌ. Ol sbꞌoqꞌue juntzan̈ yedꞌtal ebꞌ soldado chaan̈ tzꞌaj dꞌa spatictac Tiro chiꞌ. Ol laj smacꞌanem lan̈naj juntzan̈ nivac palacio ebꞌ, ol satanel ebꞌ. Man̈oclaj ebꞌ aj Asiria ol cꞌulan jun chiꞌ.
14 Ex chꞌumum barco yic Tarsis, elocabꞌ eyav yuj cuscꞌolal, yujto toxo ix em lan̈naj jun chon̈abꞌ ayoch yipoc e cꞌool.
15 A dꞌa jun tiempoal chiꞌ, a Tiro 70 abꞌil ol bꞌatcan satcꞌolal icha sqꞌuinal junoc vin̈ rey. Ato yic ol lajvoc 70 abꞌil chiꞌ, ichato chiꞌ ol javoc dꞌa yibꞌan̈ icha syal jun bꞌit sbꞌitaj dꞌa jun ix ajmul ix, syalan icha tic:
16 Ach ajmul ix, man̈xa mach tzach naancoti. Icꞌbꞌat arpa, bꞌat ach ecꞌ dꞌa yoltac chon̈abꞌ. Te vachꞌ tzutej acꞌan sjajil arpa chiꞌ. Tza bꞌitan tzijtumoc bꞌit, talaj ayto mach tzach naancoti, xchi jun bꞌit chiꞌ.
17 Ayic ol lajvoc 70 abꞌil chiꞌ, a Jehová ol acꞌanxi chon̈vaj ebꞌ aj Tiro chiꞌ. Ol syamanxioch ebꞌ yacꞌanxi chucal yedꞌ masanil ebꞌ rey ay dꞌa sat luum tic. 18 Palta a jantac tas ol yacꞌ ganar ebꞌ, ol ochcan yicoc Jehová. Man̈ ol sicꞌchajbꞌatoc, palta to ol acꞌjoc dꞌa ebꞌ tzꞌacꞌan servil Jehová chiꞌ, yic vachꞌ nivan svael ebꞌ smanaꞌ, smanan pax spichul ebꞌ te vachꞌ.