A tas albꞌilcan dꞌa yibꞌan̈ Jerusalén
22
Aton juntzan̈ tic albꞌilcan dꞌa yibꞌan̈ jun chon̈abꞌ ay dꞌa chꞌolan bꞌaj schꞌoxji tas nabꞌil yuj Jehová, syalan icha tic:¿Tas tzex icꞌani yuj chiꞌ e masanil tzex qꞌue dꞌa yibꞌan̈ pat?
2 Toxon̈ej tzex qꞌue somnajoc, veqꞌueqꞌui yel eyav yuj eyacꞌan qꞌuin̈. A ebꞌ anima chamnac dꞌa e cal, man̈oc yuj qꞌuen espada chamnac ebꞌ, man̈oc pax dꞌa scal oval chamnac ebꞌ.
3 Masanil ebꞌ eyajalil, ol bꞌat ebꞌ elelal, palta ol yamchaj ebꞌ yic mantzac julvaj ebꞌ. A val ebꞌ soldado te tecꞌan, najat ol bꞌatcan ebꞌ elelal, palta ol yamchajn̈ej ebꞌ.
4 Yuj chiꞌ sval icha tic: Elan̈ec dꞌa in tzꞌey, yujto tzin nibꞌej tzin ocꞌ val sicꞌlabꞌil. Man̈ e na tas tzeyutej eyacꞌan snivanil in cꞌool yuj jantac yaelal ol javoc dꞌa yibꞌan̈ in chon̈abꞌ.
5 Yujto a Jehová Yajal dꞌa Smasanil, toxo ix yalaꞌ to ol ja val jun cꞌual nivan xivcꞌolal, somcꞌolal yedꞌ yaelal dꞌa yibꞌan̈ lum chꞌolan bꞌaj schꞌoxji tas nabꞌil yuuj. Ol macꞌjoquem lan̈naj smuroal chon̈abꞌ. Ol laj tacꞌvoc lum vitz yel yav ebꞌ cajan dꞌa chon̈abꞌ chiꞌ.
6 A ebꞌ aj Elam, van sbꞌoan sjul-labꞌ ebꞌ, ayxoqꞌue ebꞌ dꞌa yol scarruaje, ayxopaxqꞌue ebꞌ dꞌa yibꞌan̈ schej. Axo ebꞌ aj Kir, van yicꞌanchaan̈ smaclabꞌ jul-labꞌ ebꞌ.
7 Masanil juntzan̈ lum chꞌolquiltac vachꞌ yilji, bꞌudꞌanxo lum yuj carruaje. Axo ebꞌ ayqꞌue dꞌa yibꞌan̈ chej, vanxo yacꞌan oval ebꞌ dꞌa spuertail e chon̈abꞌ.
8 A tas yipcꞌolal yaj yuj Judá, toxo ix sateli.
A dꞌa jun tiempoal chiꞌ, ix eyil juntzan̈ yamcꞌabꞌ yic oval molbꞌil dꞌa jun nivan pat scuchan Spatil Te teꞌ yic Líbano. 9-10 Eyilnac pax tzijtum spojelal smuroal schon̈abꞌ vin̈aj David. Ix e pojanem juntzan̈ pat chiꞌ yuj eyacꞌanoch yipumaloc smuroal chiꞌ. Ix eyacꞌan bꞌudꞌjoc jun yedꞌtaltaxon a aꞌ bꞌaj smolchaj dꞌa yalan̈. 11 A dꞌa scal chabꞌ muro ix e bꞌo jun yedꞌtal aꞌ. Axo taꞌ ix bꞌatcan aꞌ ay dꞌa yol jun yedꞌtal ay dꞌa pecatax chiꞌ. Palta maj nachajel eyuuj to a Jehová van yacꞌancot juntzan̈ yaelal chiꞌ. Atax dꞌa pecaꞌ naan yuuj, palta malaj jabꞌoc yelcꞌoch dꞌa e sat.
12 A dꞌa jun cꞌual chiꞌ, a Jehová Yajal dꞌa Smasanil, aꞌ tzex avtani yic tzex oqꞌui, tzex cusi, tze joxanel xil e jolom, tzeyacꞌanpaxoch pichul ya svaꞌi yic tze chꞌoxanel e cuscꞌolal yuj e chucal, palta max yal-laj e cꞌool.
13 A tas tze cꞌulej to tzeyacꞌ qꞌuin̈ dꞌa tzalajcꞌolal, tze milancham nocꞌ vacax yedꞌ nocꞌ calnel. Tzex va val, tzeyucꞌan an̈. Tzeyalan icha tic: Con̈ vaec, cuqꞌuec an̈, caqꞌuec co gana, talaj chamnac on̈xo qꞌuicꞌan, xe chi.
14 Axo Jehová Yajal dꞌa Smasanil, ix schꞌox sbꞌa dꞌayin, ix yalan dꞌayin: Man̈ ol vacꞌ nivancꞌolal jun schucal pensar ebꞌ tic, palta to ol in satel ebꞌ, a in Jehová Yajal in dꞌa Smasanil svalaꞌ, xchi.
Lolonel dꞌa vin̈ yilumal spalacio vin̈ rey
15 A Jehová Yajal dꞌa Smasanil ix alan dꞌayin: Ixic, bꞌat il vin̈aj Sebna yilumal spalacio vin̈ rey, tzalan dꞌa vin̈ icha tic:
16 ¿Tas tza cꞌulej dꞌa tic? ¿Mach ix acꞌan opisio a bꞌoan jun yedꞌtal chamnac dꞌa jun tzalan tic, tzolanpaxoch a bꞌa dꞌa sat qꞌuen qꞌueen bꞌaj ol ach cann̈ej tic a naani?
17 Vachꞌchom nivan elcꞌoch alani, palta a in Jehová in ol ach in julcanbꞌat dꞌa najat. Yedꞌ val jantac vip ol ach in yamani,
18 ol ach in julcanbꞌat bꞌalbꞌon icha junoc tas cꞌolan cꞌolan. Te najat ol ach bꞌatcan dꞌa jun lum luum te levan sat. Ataꞌ ol ach chamoc, ol satel carruaje tzꞌacꞌan snivanil elcꞌoch chiꞌ. Tzacꞌ val qꞌuixvelal ebꞌ etmunlajvumal dꞌa spalacio vin̈ a reyal chiꞌ.
19 Ol ach viqꞌuel dꞌa opisio tic, ol ach in julancanel bꞌaj ayach ecꞌ tic.
20 A dꞌa jun cꞌual chiꞌ, ol vavtejcot vin̈ in checabꞌ aj Eliaquim yuninal vin̈aj Hilcías.
21 Ol vacꞌoch a pichul yic opisio chiꞌ dꞌa vin̈ yedꞌ a cincho yic a bꞌinajnaquil. Ol vacꞌancan opisio chiꞌ dꞌa vin̈. Icha junoc mamabꞌil ol aj vin̈ dꞌa scal ebꞌ cajan dꞌa Jerusalén tic yedꞌ dꞌa ebꞌ aj Judá.
22 A dꞌa yol scꞌabꞌ vin̈ ol vacꞌoch sllaveal spalacio ebꞌ yin̈tilalcan vin̈aj David. Malaj mach ol yal smacan puerta ol sjac vin̈, malaj pax mach ol jacan puerta ol smac vin̈.
23 Te vachꞌ ol vutej vacꞌanoch vin̈ dꞌa yopisio chiꞌ, icha val tzꞌaj slavuxajcanoch junoc tas dꞌa sat pat. Ol bꞌinajcan vin̈ dꞌa scal ebꞌ scꞌabꞌyoc.
24 Masanil ebꞌ scꞌabꞌyoc smam vin̈ yedꞌ yin̈tilal, nivan ol aj yelcꞌoch ebꞌ yuj vin̈. Ichato al ol ajcanoch ebꞌ dꞌa yibꞌan̈ vin̈. Icha tzꞌajoch locan lum chenxalu yedꞌ masanil yamcꞌabꞌ yic junoc pat dꞌa junoc teꞌ locteꞌ macꞌbꞌilochi, icha chiꞌ ol ajoch ebꞌ dꞌa vin̈.
25 A dꞌa jun cꞌual chiꞌ, a jun te teꞌ vachꞌ yaj smacꞌchajoch chiꞌ, ol elta chocnaj teꞌ. Ol emta tan̈naj teꞌ dꞌa sat luum, ol pojcanbꞌat masanil tas locanoch chiꞌ dꞌa teꞌ. A val Jehová tzꞌalan dꞌayin, xchi vin̈aj Isaías chiꞌ.