Albꞌilcan tas ol aj satel Babilonia
21
Albꞌilcan juntzan̈ lolonel tic yuj lum tzꞌinan luum dꞌa stiꞌ aꞌ mar:Icha junoc chacxuxum icꞌ tzꞌecꞌ dꞌa lum Neguev, icha chiꞌ ol aj scot ebꞌ milvajum dꞌa lum tzꞌinan luum te ay smay.
2 Ayxo smay jun tas schꞌox Dios vil tic: Ay ebꞌ smeltzajoch yacꞌ chucal dꞌa yetanimail. A ebꞌ milvajum, smilvajn̈ej ebꞌ. Ex aj Elam yedꞌ ex aj Media, bꞌat ochan̈ec oyan dꞌa spatic chon̈abꞌ Babilonia, tzeyacꞌan oval yedꞌoc. A Jehová ix acꞌan stiꞌ to ol yacꞌ lajvoc yaelal ix yacꞌoch jun nación chiꞌ.
3 Yuj tas ix vil chiꞌ tzin ecꞌ bꞌacbꞌon yuj vabꞌan syail icha tzꞌaj junoc ix ix tzꞌalji yuneꞌ. A yuj tas svabꞌ chiꞌ tzin somchajchaan̈, yuj tas svil chiꞌ man̈xo in animaoc svabꞌi.
4 Toxon̈ej somson yol in jolom, tzin ibꞌxi yuj xivelal. Te chucxon̈ej in cꞌool svabꞌ yuj tas ay smay. Junjun cꞌu, ayic numnonxo sqꞌuicꞌbꞌi, tzin te tzalaj val, palta axo ticnaic, toxon̈ej tzin te xiv yuj tas svil tic.
5 Ix vilani, toxo ix bꞌo juntzan̈ mexa, vachꞌxopax yaj bꞌaj tzꞌem cꞌojan ebꞌ avtabꞌil. Van sva ebꞌ, syucꞌan aꞌ ebꞌ, axo dꞌa jun rato chiꞌ, ix och jun av icha tic: Ex yajalil ebꞌ soldado, aqꞌuec lista e bꞌa yedꞌ e maclabꞌ jul-labꞌ, xchi ix vabꞌi.
6 A Jehová ix alan dꞌayin icha tic: Ixic, acꞌoch junoc macvajum, yic vachꞌ syal masanil tas syilaꞌ.
7 Ayic syilan vin̈ scot junoc carruaje tocꞌbꞌil yuj chavan̈oc nocꞌ chej, mato ay anima ayqꞌue dꞌa yibꞌan̈ nocꞌ bꞌuru, ma dꞌa yibꞌan̈ nocꞌ camello, scham val yilan vin̈ tas yaji, xchi Jehová chiꞌ.
8 A jun vin̈ macvajum chiꞌ, ix el yav vin̈ ix yalan vin̈: A bꞌaj tzin maclej tic Mamin, ayinn̈ej ecꞌ dꞌa junjun cꞌu yedꞌ dꞌa junjun acꞌval, tzin macvaji.
9 Axo ticnaic, svil scot jun carruaje tocꞌbꞌil yuj chavan̈ nocꞌ chej, a jun mach ayqꞌue dꞌa yol carruaje chiꞌ, a tzꞌalan icha tic: Ix acꞌji ganar Babilonia. Ix sateli. Masanil scomon diosal ebꞌ ix pojbꞌati, chocꞌ ix ajcanem dꞌa sat luum, xchi, xchi vin̈ macvajum chiꞌ.
10 Abꞌec ex vetchon̈abꞌ, a ex ix ex tecꞌjiem icha ixim trigo yuj ebꞌ aj Babilonia chiꞌ, a tas ix val tic dꞌayex, aton tas ix vabꞌ yuj Jehová Yajal dꞌa Smasanil, aton co Diosal a on̈ israel on̈ tic.
A tas albꞌilcan dꞌa yibꞌan̈ Edom
11 Aton lolonel tic albꞌilcan dꞌa yibꞌan̈ Edom: Ay junoc ebꞌ aj Edom chiꞌ ix avajcot dꞌayin: ¿Jantacto scꞌan sacbꞌi ach macvajum? ¿Jayeto hora qꞌuicꞌto? xchi.
12 Ix in tacꞌvi icha tic: Vanxo sacbꞌi, palta elan̈chamel ol qꞌuicꞌbꞌocxi. Tato tza nibꞌej tza cꞌanbꞌejxi, ixic ol xo ul a cꞌanbꞌejxi, xin chi dꞌay.
A tas albꞌilcan dꞌa yibꞌan̈ Arabia
13 Aton juntzan̈ tic albꞌilcan dꞌa yibꞌan̈ Arabia: Ex chon̈vajum aj Dedán, a ex tzex vaycan dꞌa caltac teꞌ dꞌa Arabia,
14 elan̈ec e cha ebꞌ ay staquin̈tial, tzeyacꞌan aꞌ yuqꞌuej ebꞌ. A ex cajan ex dꞌa chon̈abꞌ Tema, elan̈ec bꞌaj tzꞌecꞌ ebꞌ sbꞌat elelal, tzeyaltan vael dꞌa ebꞌ.
15 Yujto van yel ebꞌ elelal dꞌa qꞌuen espada te jay ye yedꞌ jul-labꞌ van sjuljieli, aton bꞌaj ov yacꞌan oval.
16 Ix yalan Jehová dꞌayin icha tic: Yic val jun abꞌil ticnaic, icha tzꞌaj sbꞌisan stiempo junoc munlajvum, a val taꞌ ol satel snivanil yelcꞌoch chon̈abꞌ Cedar.
17 A ebꞌ aj Cedar jelan sjulvaji, jayvan̈xon̈ej ebꞌ ol canoc. A in Jehová e Diosal in a ex israel ex tic, a in svalaꞌ, xchi.