Ix acꞌji ganar Egipto yedꞌ Etiopía yuj Asiria
20
A vin̈aj Sargón sreyal Asiria, ix schecbꞌat ebꞌ soldado vin̈ yedꞌ jun yajalil ebꞌ dꞌa chon̈abꞌ Asdod, yic syacꞌan oval ebꞌ dꞌay. Ix yacꞌ ganar jun chon̈abꞌ chiꞌ ebꞌ. 2 A dꞌa jun tiempoal chiꞌ, ix yal Jehová dꞌayin Isaías in tic icha tic: Iqꞌuel a pichul ya sva ayoch chiꞌ uuj yedꞌ a xan̈abꞌ, xchi.Ix in cꞌanabꞌajan in cꞌulan icha ix yal chiꞌ, ix vicꞌanel in xan̈abꞌ yedꞌ in pichul chiꞌ, axon̈ej yol in pichul ix cani. 3 Ix lajvi chiꞌ, ix yalan Jehová icha tic: A vin̈ in checabꞌ aj Isaías tic, oxeꞌ abꞌil ix bꞌeyecꞌ vin̈ dꞌa yoc. Malaj xan̈abꞌ vin̈ ayochi, an̈ej pax yol spichul vin̈ ayochi. A jun tic, chꞌoxnabꞌil yaj dꞌa Egipto yedꞌ dꞌa Etiopía. 4 Yujto ol icꞌjocbꞌat ebꞌ aj Egipto yedꞌ ebꞌ aj Etiopía chiꞌ yuj ebꞌ aj Asiria. Ol icꞌjocbꞌat ebꞌ icham anima yedꞌ ebꞌ quelemtac. Ayic ol icꞌjocbꞌat ebꞌ chiꞌ, malaj xan̈abꞌ ebꞌ ayochi, malaj pax spichul ebꞌ, bꞌeranelta syoop ebꞌ yic tzꞌacꞌji qꞌuixvelal ebꞌ. 5 A ebꞌ anima ayoch Egipto yedꞌ Etiopía yipoc scꞌool, ol xivqꞌue ebꞌ, ol qꞌuixvoc ebꞌ yuj tas ol ujoc chiꞌ. 6 A dꞌa jun tiempoal chiꞌ, a ebꞌ anima cajan dꞌa stitac aꞌ mar, ol yal ebꞌ icha tic: Ilecnabꞌ tas tzꞌaj ebꞌ ayoch yipoc co cꞌool, aton ebꞌ bꞌaj ix calaꞌ to tzon̈ scol ebꞌ dꞌa vin̈ sreyal Asiria: ¿Machto val ol on̈ colan ticnaic? xcham ebꞌ, xchi Jehová.