A tas albꞌilcan dꞌa yibꞌan̈ Egipto
19
A juntzan̈ lolonel tic albꞌilcan dꞌa yibꞌan̈ Egipto:Ilecnabꞌ sjavi Jehová. Ayqꞌue dꞌa yibꞌan̈ jun asun. Yelcꞌolal sbꞌeyi sbꞌat dꞌa Egipto. Tzꞌibꞌxiqꞌue juntzan̈ scomon diosal ebꞌ anima chiꞌ dꞌa yichan̈ Jehová chiꞌ, xivpax ebꞌ anima chiꞌ.
2 Syalan Jehová icha tic: Ol vacꞌ spoj sbꞌa ebꞌ aj Egipto chiꞌ, ol yacꞌlanqꞌue oval ebꞌ junjun. A ebꞌ vachꞌ yacꞌani, ol yacꞌlaj oval ebꞌ. Axo juntzan̈ chon̈abꞌ, ol syamlaj sbꞌa dꞌa oval, ol yacꞌpax oval juntzan̈ ebꞌ yajal.
3 Ol vacꞌ somchajbꞌat spensar ebꞌ. Ol ixtaxbꞌat masanil tas nabꞌil yuj ebꞌ. Yuj chiꞌ ol yal sbꞌa ebꞌ dꞌa comon dios, dꞌa ebꞌ ajbꞌaal, dꞌa spixan chamnac yedꞌ dꞌa ebꞌ ajchum.
4 Van valancani to ol vacꞌoch junoc rey te ov dꞌa Egipto, ilbꞌajcꞌool ol aj ebꞌ anima yuuj, xchi Jehová Yajal dꞌa Smasanil.
5 Ol tup aꞌ nivan Nilo, taquin̈ ol ajcan bꞌaj sbꞌey aꞌ chiꞌ.
6 A aꞌ scꞌabꞌ tzꞌelcani, ol tup pax aꞌ, ol qꞌue sjabꞌ bꞌaj sbꞌey aꞌ chiꞌ. Masanil aꞌ tzꞌel yoc dꞌa Egipto chiꞌ, jabꞌ jabꞌil ol em aꞌ masanto ol tup aꞌ. A teꞌ aj yedꞌ an̈ an̈cꞌultac sqꞌuibꞌ dꞌa stiꞌ aꞌ, ol tacjoqueloc.
7 Masanil an̈ an̈ ay dꞌa stitac aꞌ Nilo chiꞌ yedꞌ masanil tas avabꞌil taꞌ, ol sateloc.
8 Masanil ebꞌ yamum chay dꞌa aꞌ Nilo chiꞌ yedꞌ ebꞌ syaqꞌuem schimpa dꞌa yol aꞌ, ol el yav ebꞌ yocꞌ yuj cuscꞌolal, ol cus ebꞌ yujto van stup aꞌ.
9 Ol chabꞌaxqꞌue scꞌol ebꞌ sbꞌoan chꞌal lino. Axo ebꞌ sjalani, ol somchajcanel ebꞌ.
10 Ol tac scꞌol ebꞌ sbꞌoan cꞌapac cꞌapac. Ol somchajpax ebꞌ smunlajvum ebꞌ.
11 Yelxo val malaj spensar ebꞌ yajal yaj dꞌa chon̈abꞌ Zoán. A ebꞌ yacꞌum razón vin̈ rey te jelan dꞌa Egipto chiꞌ, man̈xa yopisio spensar ebꞌ chiꞌ. Tzato scomon tecꞌbꞌej sbꞌa ebꞌ yalan dꞌa vin̈ rey chiꞌ icha tic: A on̈ tic, yin̈til on̈ ebꞌ jelan spensar, yin̈tilal on̈ can ebꞌ rey, xchi ebꞌ.
12 Ach sreyal Egipto, ¿bꞌajtil ay ebꞌ tzꞌacꞌan a razón, yic syal ebꞌ dꞌayach tas nabꞌil dꞌa yibꞌan̈ Egipto yuj Jehová Yajal dꞌa Smasanil?
13 A ebꞌ yajal dꞌa chon̈abꞌ Zoán, malaj spensar ebꞌ. A ebꞌ yajal dꞌa chon̈abꞌ Menfis, ix yacꞌ sbꞌa ebꞌ musansatil. A juntzan̈ ebꞌ yajal chiꞌ ix cuchbꞌanbꞌat ebꞌ aj Egipto dꞌa tas man̈ vachꞌoc.
14 A Jehová ix acꞌanoch somcꞌolal dꞌa scal ebꞌ, aton ebꞌ tzꞌicꞌanbꞌat ebꞌ aj Egipto chiꞌ dꞌa tas man̈ vachꞌoc. Masanil tas scꞌulej ebꞌ, lajan icha junoc ucꞌum an̈ xeji, tzꞌecꞌ chꞌumchꞌonoc.
15 Man̈xa ebꞌ aj Egipto chiꞌ syal scolan schon̈abꞌ, vachꞌchom bꞌeyum, ma mebꞌaꞌ, vachꞌchom nivan yelcꞌochi, ma malaj yelcꞌochi, man̈xa junoc mach stecꞌbꞌej sbꞌa.
16 A val dꞌa jun tiempoal chiꞌ, masanil ebꞌ aj Egipto chiꞌ, icha ebꞌ ix ix ol aj ebꞌ, yujto ol el yip ebꞌ yuj xivelal ayic ol yilan ebꞌ scꞌoch yaelal ol yacꞌbꞌat Jehová Yajal dꞌa Smasanil dꞌa yibꞌan̈ ebꞌ. 17 Ol te xivqꞌue ebꞌ yuj ebꞌ aj Judá ayic ol snaancot ebꞌ tas ol yutoc Jehová chiꞌ syamcꞌabꞌan ebꞌ aj Judá chiꞌ. 18 A dꞌa jun tiempoal chiꞌ, ay oyeꞌ chon̈abꞌ dꞌa Egipto chiꞌ ol alan stiꞌ ebꞌ israel, ol yacꞌan stiꞌ ebꞌ dꞌa Jehová Yajal dꞌa Smasanil chiꞌ. A dꞌa scal juntzan̈ chon̈abꞌ chiꞌ, ay jun scuchan Schon̈abꞌ Cꞌu.
19 A dꞌa jun tiempoal chiꞌ, ay jun yaltar Jehová ol bꞌochaj dꞌa yol smacbꞌen Egipto chiꞌ. Axo dꞌa slacꞌanil smojonal smacbꞌen chiꞌ, ataꞌ ol bꞌochajcanqꞌue jun qꞌuen qꞌueen yuj yicꞌjichaan̈ Jehová. 20 A jun chiꞌ chꞌoxnabꞌil ol ajcan dꞌa ebꞌ aj Egipto yic snajicot Jehová Yajal dꞌa Smasanil yuj ebꞌ. Ayic ol el yav ebꞌ yuj ebꞌ tzꞌacꞌanoch syaelal, ol scꞌanan scolval Jehová chiꞌ ebꞌ, ol coljoc ebꞌ yuuj. 21 A Jehová, ol yacꞌ yojtaquejel sbꞌa dꞌa ebꞌ aj Egipto chiꞌ. Ol nachajel yuj ebꞌ tas yaj Jehová chiꞌ. Ol och ebꞌ ejmelal dꞌay, ol sn̈usan silabꞌ ebꞌ, ol yacꞌanpax yofrenda ebꞌ. Ol yacꞌan stiꞌ ebꞌ dꞌay, ol scꞌanabꞌajan ebꞌ tas syal chiꞌ. 22 Ayic toxo ix acꞌji syaelal ebꞌ aj Egipto chiꞌ yuj Jehová, ol meltzajxoc ebꞌ dꞌay, ol ocꞌxoc scꞌol dꞌa ebꞌ, ol coljocxi ebꞌ yuuj.
23 A dꞌa jun tiempoal chiꞌ, ay jun nivan bꞌe ol bꞌat dꞌa Egipto chiꞌ masanto ol cꞌoch dꞌa Asiria. Yuj chiꞌ a ebꞌ aj Asiria yedꞌ ebꞌ aj Egipto chiꞌ, ol yal scꞌoch ebꞌ dꞌay junjun. A cha macan̈ anima chiꞌ, junxon̈ej ol aj yoch ebꞌ ejmelal dꞌa Jehová.
24 A dꞌa jun tiempoal chiꞌ, a ebꞌ israel, junn̈ej ol yutoc sbꞌa ebꞌ yedꞌ ebꞌ aj Egipto yedꞌ pax ebꞌ aj Asiria chiꞌ. Yuj ebꞌ ol yacꞌ svachꞌcꞌolal Jehová dꞌa masanil yolyibꞌan̈qꞌuinal. 25 A Jehová Yajal dꞌa Smasanil, ol yacꞌ svachꞌcꞌolal dꞌa yibꞌan̈ ebꞌ. Ol yalan icha tic: Svacꞌ in vachꞌcꞌolal dꞌa yibꞌan̈ in chon̈abꞌ Egipto yedꞌ dꞌa yibꞌan̈ Asiria bꞌobꞌil vuuj yedꞌ dꞌa yibꞌan̈ Israel sicꞌbꞌilel vuuj, xcham Jehová chiꞌ.