2 Syacꞌbꞌat ebꞌ schecabꞌ dꞌa yibꞌan̈ aꞌ nivan Nilo, sbꞌat ebꞌ dꞌa yibꞌan̈ aꞌ yedꞌ juntzan̈ teꞌ aj tzecꞌbꞌil valsoal. Ex checabꞌ, meltzajan̈ec dꞌa e chon̈abꞌ bꞌaj cajan ebꞌ chaan̈ steel, ebꞌ malaj xil snivanil, ebꞌ ay smay sbꞌinaj dꞌa juntzan̈xo chon̈abꞌ, ebꞌ te tecꞌan, ebꞌ satanel juntzan̈ chon̈abꞌ, ebꞌ cajan dꞌa lum luum macquiltac yaj yuj aꞌ nivac aꞌ.

3 Masanil ex cajan ex dꞌa yolyibꞌan̈qꞌuinal tic, ayic ol eyilan scheclajqꞌue junoc yechel dꞌa lum jolomtac vitz, ol eyabꞌan spuchaj qꞌuen trompeta, tze maclej eyabꞌi.

4 Ix yal Jehová dꞌayin icha tic: Juncꞌolal vajecꞌ dꞌa vedꞌtal. Tzin can numan in maclan vilaꞌ tas van yuji, icha yoc cꞌu dꞌa varesma, icha pax yal acꞌval tzꞌemi ayic van smolchaj sat avbꞌen.

5 Ayic vanxo yel xumaquil teꞌ uva, scheclajcan teꞌ sat, palta ayic manto ja scꞌual smolchaj sat teꞌ chiꞌ, xicjiel teꞌ scꞌabꞌ malaj sat, sjuljicanel teꞌ. Icha tzꞌaj xicjiel teꞌ scꞌabꞌ chiꞌ, icha chiꞌ ol vutej in satanel ebꞌ ajcꞌool.

6 Toxon̈ej ol comon can teljabꞌ ebꞌ dꞌa jolomtac vitz chiꞌ. A nocꞌ chium nocꞌ sjen̈vi yedꞌ nocꞌ caltacteꞌal nocꞌ ol chianbꞌat ebꞌ. A nocꞌ sjen̈vi chiꞌ, a dꞌa varesma ol aj nocꞌ taꞌ, axo nocꞌ caltacteꞌal nocꞌ chiꞌ, a dꞌa n̈abꞌilqꞌuinal ol aj nocꞌ taꞌ, xchi Jehová.

7 A dꞌa jun tiempoal chiꞌ, a ebꞌ anima chaan̈ steel, ebꞌ malaj xil snivanil, ebꞌ ay smay sbꞌinaj dꞌa juntzan̈xo chon̈abꞌ, ebꞌ te tecꞌan, ebꞌ satanel juntzan̈ chon̈abꞌ, ebꞌ cajan dꞌa lum luum macquiltac yaj yuj aꞌ nivac aꞌ, ol yicꞌcot yofrenda ebꞌ dꞌa tzalan Sion yic bꞌat och ebꞌ ejmelal dꞌa Jehová Yajal dꞌa Smasanil.