A tas albꞌilcan dꞌa yibꞌan̈ Damasco
17
Aton juntzan̈ lolonel tic albꞌilcan dꞌa yibꞌan̈ chon̈abꞌ Damasco: A chon̈abꞌ Damasco, man̈xo chon̈abꞌoc ol ajcanoc. Axon̈ej scꞌajil ol qꞌuecan bꞌulan.2 A juntzan̈ chon̈abꞌ dꞌa stzꞌeytac Aroer, ol can tzꞌinan dꞌa juneln̈ej, ol ochcan svalabꞌoc nocꞌ molbꞌetzal nocꞌ. Juncꞌolal ol va nocꞌ taꞌ.
3 Man̈xalaj chon̈abꞌ ayoch smuroal dꞌa yol yic Efraín. A Damasco, man̈xalaj yajalil. A ebꞌ aj Siria olto can chiꞌ, qꞌuixvelal ol ajcan ebꞌ icha ebꞌ israel, xchi Jehová Yajal dꞌa Smasanil.
Yaelal ol ja dꞌa yibꞌan̈ Israel
4 A dꞌa jun cꞌual chiꞌ, ol satel yacꞌumtaquil ebꞌ yin̈tilal vin̈aj Jacob, ol satel yip ebꞌ, ol satpaxel sbꞌeyumal ebꞌ.
5 A schon̈abꞌ ebꞌ chiꞌ, lajan ol ajcan icha bꞌaj toxo ix jochchaj ixim trigo, icha tzꞌaj sicꞌjiqꞌue ixim jolom trigo tzato can dꞌa span̈anil yic Refaim. Axon̈ej ixim sbꞌatcan satcꞌolal scani.
6 Lajan pax ol ajcan ebꞌ icha tzꞌajcan junoc teꞌ olivo toxo ix macꞌchajemta sat, dꞌun̈quiltac tzꞌajcan chabꞌ oxeoc sat teꞌ chiꞌ dꞌa sn̈itac scꞌabꞌ, ma chan̈eꞌ oyeoc scan dꞌa teꞌ steꞌal chiꞌ. Icha chiꞌ ol ajcanoc, xchi Jehová co Diosal a on̈ israel on̈ tic.
7 A dꞌa jun tiempoal chiꞌ, ol meltzajxoc spensar ebꞌ israel dꞌa Mach Bꞌojinac, aton sDiosal ebꞌ Axon̈ej Ochi.
8 Man̈xo ol yacꞌoch juntzan̈ yaltar ebꞌ sbꞌonac yipoc scꞌool. Man̈xalaj ol aj yelcꞌoch juntzan̈ teꞌ yechel Asera dꞌa yol sat ebꞌ yedꞌ pax juntzan̈ altar bꞌobꞌil yuj ebꞌ bꞌaj sn̈us incienso.
9 A dꞌa jun tiempoal chiꞌ, a juntzan̈ chon̈abꞌ ayoch smuroal, ol can tzꞌinan. Icha ajnaccan tzꞌinan schon̈abꞌ ebꞌ heveo yedꞌ ebꞌ amorreo ayic yelnac ebꞌ elelal yuj xivelal dꞌa ebꞌ quetisraelal dꞌa pecaꞌ, icha chiꞌ ol ajcanoc.
10 Yujto ix bꞌat co Diosal satcꞌolal eyuuj, aton Jun coljinac on̈, maxtzac e nacoti tato a dꞌay co colnac co bꞌa. Yuj chiꞌ vachꞌchom tzeyavej juntzan̈ teꞌ eyavbꞌen teꞌ vachꞌ, teꞌ tzeyicꞌcot dꞌa chꞌoc nacional,
11 vachꞌchom dꞌa junn̈ej cꞌual tzeyacꞌ qꞌuibꞌ teꞌ yic xumacan teꞌ dꞌa jun cꞌu chiꞌ, palta axo yic ol javoc yaelal man̈xa yan̈al dꞌa eyibꞌan̈, malaj tas ol eyicꞌ dꞌa eyavbꞌen chiꞌ.
12 Obꞌiltac ebꞌ soldado scot dꞌa juntzan̈xo chon̈abꞌ, te nivan sbꞌisul ebꞌ, icha scꞌan̈ sqꞌue vaan aꞌ mar scꞌan̈ scot ebꞌ. Tzꞌel val yav juntzan̈ chon̈abꞌ chiꞌ scoti, icha val scꞌan̈ sbꞌat pon̈oljoc aꞌ nivac aꞌ sbꞌeyi.
13 Vachꞌchom scꞌan̈ scot ebꞌ, palta ayic ol cachjoc ebꞌ yuj Dios, ol bꞌat ebꞌ elelal icha tzꞌaj yicꞌjibꞌat smatzꞌil ixim trigo yuj icꞌ dꞌa jolomtac vitz. Icha tzꞌaj yicꞌjibꞌat lum pococ yuj chacxuxum icꞌ, icha chiꞌ ol aj ebꞌ.
14 A dꞌa yemcꞌualil, te ay smay ebꞌ ajcꞌol chiꞌ quilani, palta axo yic sacbꞌi, man̈xalaj ebꞌ ayeqꞌui. Icha chiꞌ ol ajcan ebꞌ tzon̈ elcꞌani yedꞌ pax ebꞌ tzon̈ ixtani.