Ol bꞌat scol sbꞌa ebꞌ aj Moab dꞌa Judá
16
Ex aj Sela ay dꞌa tzꞌinan luum, aqꞌueccot nocꞌ e calnel dꞌa jun yajal chon̈abꞌ dꞌa tzalan Sion.2 A ebꞌ ix aj Moab, tzꞌecꞌ lemnaj ebꞌ ix dꞌa aꞌ Arnón. Icha nocꞌ much tzꞌel lemnaj dꞌa soꞌ yuj xivelal, icha chiꞌ yaj ebꞌ ix.
3 Ol yalan ebꞌ aj Moab chiꞌ dꞌa ebꞌ aj Sion icha tic: Naec tas tzeyutej on̈ e colani. A exxo tzex och co columaloc, icha junoc te teꞌ ay yen̈ul dꞌa chimcꞌualil, ichocabꞌ taꞌ tzeyutej on̈ e cꞌubꞌanel dꞌa eyen̈ul. Icha junoc tas dꞌacꞌvalil, man̈ chequeloc, icha chiꞌ tzon̈ eyutej a on̈ van co bꞌat elelal tic, man̈ on̈ e chꞌoxoꞌ.
4 Chaon̈eccꞌoch cajan dꞌa e cal, tzon̈ e cꞌubꞌanel dꞌa ebꞌ van on̈ sayaneqꞌui, xchi ebꞌ aj Moab chiꞌ.
Ayic ol satel jun mach tzꞌixtan ebꞌ anima chiꞌ yedꞌ satanpaxel juntzan̈ schon̈abꞌ ebꞌ,
5 axo jun yin̈tilalcan vin̈aj David ol och reyal, ol yacꞌan yajalil dꞌa scal anima dꞌa svachꞌilal yedꞌ dꞌa sjichanil. Ol yacꞌ val och dꞌa scꞌool sbꞌoan yaj ebꞌ anima dꞌa stojolal.
6 Cojtac val sicꞌlabꞌil tastac val syutej sbꞌa ebꞌ aj Moab yacꞌan acꞌumtaquil. Acꞌumtacxon̈ej scomon lolon ebꞌ, palta a tas syal ebꞌ chiꞌ, malaj jabꞌoc yelcꞌochi.
7 Yuj val chiꞌ masanil ebꞌ aj Moab chiꞌ, ol ocꞌ ebꞌ yuj schon̈abꞌ. Ol cus ebꞌ smasanil yuj juntzan̈ taquin̈ sat uva quechquiltac scot dꞌa Kir-hareset, ol taccanqꞌue scꞌol ebꞌ yuuj.
8 Masanil teꞌ uva dꞌa Hesbón yedꞌ dꞌa Sibma ol ixtaxbꞌatoc. A dꞌa yalan̈taxo, a ebꞌ yajal dꞌa juntzan̈xo nación, stelvi ebꞌ ayic syucꞌan yal sat teꞌ uva chiꞌ ebꞌ. A teꞌ uva chiꞌ, tzato cꞌoch teꞌ dꞌa Jazer, scꞌochpax teꞌ dꞌa lum taquin̈tac val sat yedꞌ pax dꞌa stitac aꞌ mar.
9 Yuj chiꞌ tzin ocꞌ icha yocꞌ ebꞌ aj Jazer yuj teꞌ uva ay dꞌa Sibma. Tzꞌelpaxcot yal in sat yuj teꞌ ay dꞌa Hesbón yedꞌ dꞌa Eleale. A dꞌa scal tas avabꞌil yuj ebꞌ chiꞌ, ataꞌ ol och av yic oval.
10 A bꞌaj avabꞌil teꞌ uva, man̈xalaj av yic tzalajcꞌolal ol ochoc, man̈xa mach ol bꞌitan dꞌa scal teꞌ, man̈xapaxlaj mach ol tecꞌanel yal sat teꞌ. A Jehová ol acꞌan satel masanil av chiꞌ.
11 Te cusnac in cꞌol yuj Moab, yuj pax Kir-hareset, icha scuseltaquil yoch sjaj teꞌ arpa.
12 Vachꞌchom ol bꞌat ebꞌ aj Moab chiꞌ yal sbꞌa dꞌa juntzan̈ lugar chaan̈, masanto scꞌunbꞌi ebꞌ, vachꞌchom sbꞌat ebꞌ lesal dꞌa stemplo sdiosal, palta man̈xa jabꞌoc tas ol yicꞌ ebꞌ.
13 Aton juntzan̈ lolonel tic yalnaccan Jehová dꞌa yibꞌan̈ Moab dꞌa pecataxo. 14 Axo ticnaic syal Jehová icha tic:
Yic val oxeꞌ abꞌil ticnaic, icha tzꞌaj sbꞌisan junoc munlajvum stiempoal smunlaji, icha chiꞌ ol aj satel sbꞌeyumal Moab. Vachꞌchom tzijtum ebꞌ ticnaic, palta junxon̈ej bꞌotzan̈ ol ajcan ebꞌ. Ol paticajel ebꞌ, te man̈xalaj yip ebꞌ bꞌaj ol scol sbꞌa, xchi Jehová.