A tas albꞌilcan dꞌa yibꞌan̈ Moab
15
Aton juntzan̈ lolonel tic ix alchaj dꞌa yibꞌan̈ Moab:Junn̈ej acꞌval ol satel chon̈abꞌ Ar dꞌa yol yic Moab. Ol can tzꞌinan. Junn̈ej acꞌval pax ol satel chon̈abꞌ Kir dꞌa yol yic Moab chiꞌ. Ol can pax tzꞌinan.
2 A ebꞌ aj Dibón, ol qꞌue ebꞌ oqꞌuel dꞌa spatil sdiosal dꞌa schon jun tzalan. Ol el val yav ebꞌ aj Moab ayic ol pojem chon̈abꞌ Nebo yedꞌ Medeba. Masanil ebꞌ vin̈ vinac, ol sjoxel xil sjolom ebꞌ vin̈ yedꞌ xil stiꞌ yuj cuscꞌolal.
3 A pichul ya sva ayoch yuj ebꞌ, ayic ol ecꞌ ebꞌ dꞌa yoltac bꞌe yedꞌ dꞌa yibꞌan̈tac spat. Ol el yav ebꞌ yuj syaelal chiꞌ. Ol laj ocꞌ masanil anima chiꞌ dꞌa mercado. Ol tup val yal sat ebꞌ yoqꞌui.
4 A ebꞌ aj Hesbón yedꞌ ebꞌ aj Eleale, ol scꞌan colval ebꞌ. Olto abꞌchaj yel yav ebꞌ chiꞌ dꞌa Jahaza. Masanil ebꞌ soldado yic Moab, ol el yav ebꞌ, ol el yip ebꞌ yuj xivelal.
5 Tzin cus val yuj ebꞌ aj Moab chiꞌ. Ol bꞌatcan ebꞌ elelal smasanil dꞌa Zoar, ol cꞌoch ebꞌ dꞌa Eglat-selisiya. Ol qꞌue ebꞌ oqꞌuel dꞌa vitzal Luhit yedꞌ bꞌaj sbꞌat sbꞌeal Horonaim. Ol el veqꞌuecꞌoc yav ebꞌ yuj yaelal ol javoc dꞌa yibꞌan̈.
6 Ol tup a aꞌ ay dꞌa yol yic Nimrim. Ol tacjoquel an̈ an̈cꞌultac, man̈xa bꞌaj ol ilchaj jabꞌoc yaax.
7 Yuj chiꞌ ol smolbꞌej sbꞌeyumal ebꞌ, ol yicꞌanbꞌat ebꞌ dꞌa yichan̈bꞌat jun schꞌolanil bꞌaj ay teꞌ bꞌacmam.
8 Ol abꞌchaj yel yav ebꞌ yuj cuscꞌolal masanto bꞌaj slajvicꞌoch smacbꞌen Moab chiꞌ. Ol abꞌchajpax dꞌa Eglaim yedꞌ dꞌa Beer-elim.
9 A a aꞌ ay dꞌa Dimón, ol chacbꞌoquel aꞌ yuj chicꞌ, palta ayto juntzan̈xo yaelal ol yacꞌcot Dios dꞌa yibꞌan̈ ebꞌ. Ol yacꞌcot jun nocꞌ choj ol chianbꞌat ebꞌ olto el dꞌa Moab chiꞌ yedꞌ ebꞌ pitzanto olto can dꞌa sat luum chiꞌ.