Ol meltzajxoc ebꞌ israel
14
Ol ocꞌxoc scꞌol Jehová dꞌa ebꞌ israel, ol schaxioch ebꞌ schon̈abꞌoc. Ol icꞌjocxicot ebꞌ bꞌaj cajan yuj Jehová chiꞌ, ol jax ebꞌ dꞌa sluum junelxo. Ay ebꞌ chꞌoc chon̈abꞌil junn̈ej ol yutoc sbꞌa yedꞌ ebꞌ, ol javoc cajan ebꞌ dꞌa scal ebꞌ yin̈tilal vin̈aj Jacob chiꞌ. 2 Ay juntzan̈ chon̈abꞌ ol colvaj yicꞌancot ebꞌ israel chiꞌ yic ol javoc ebꞌ dꞌa sluum chiꞌ. Ol ochcan juntzan̈ ebꞌ chꞌoc chon̈abꞌil schecabꞌoc ebꞌ israel dꞌa lum sluum Jehová. A ebꞌ icꞌjinacbꞌat ebꞌ israel schecabꞌoc dꞌa yalan̈taxo, ol och ebꞌ schecabꞌoc ebꞌ israel chiꞌ. Axo ebꞌ chuc yutejnac sbꞌa dꞌa ebꞌ dꞌa yalan̈taxo, ol can ebꞌ dꞌa yalan̈ smandar ebꞌ.Sbꞌuchji vin̈ sreyal Babilonia
3 Ex chon̈abꞌ Israel, ayic ol ex colchaj yuj Jehová dꞌa scal e cuscꞌolal yedꞌ dꞌa eyaelal bꞌaj ayex och dꞌa checabꞌoc, 4 ol e bꞌitej jun bꞌit tic yic tze bꞌuchan vin̈ sreyal Babilonia:
Ilecnabꞌ val tas ix utaj vin̈ ix acꞌanoch co yaelal tic. Ilecnabꞌ val ix aj vin̈ yuj yacꞌumtaquil.
5 Toxo ix icꞌjiel yopisio vin̈ yuj Jehová. Toxo ix can̈chaj scꞌococh vin̈ yic yopisio,
6 aton vin̈ ix acꞌanoch syaelal juntzan̈xo nación. Max ochlaj vaan vin̈ yixtan ebꞌ yedꞌ yoval scꞌool. Ilbꞌaj cꞌol ix aj ebꞌ yuj yoval vin̈ chiꞌ, maj lajvoc yixtaj ebꞌ yuj vin̈.
7 Yuj chiꞌ juncꞌolal yaj masanil anima, sbꞌitan ebꞌ yuj tzalajcꞌolal.
8 A teꞌ tzicap yedꞌ teꞌ cꞌuteꞌ dꞌa Líbano, ichato stzalaj teꞌ, ichato syal teꞌ icha tic: Atax yic ach sateli, man̈xalaj mach tzon̈ chꞌacaneli, xchi teꞌ.
9 A bꞌaj ayecꞌ ebꞌ chamnac, toxon̈ej sqꞌue n̈ilnaj ebꞌ ul schaan vin̈ sreyal Babilonia chiꞌ. Ichato tzꞌel svayan̈ spixan ebꞌ chamnac chiꞌ. A ebꞌ yajal dꞌa sat lum tic dꞌa pecaꞌ, sqꞌue vaan ebꞌ yuj ul schaan vin̈ rey chiꞌ, sqꞌue vaan ebꞌ dꞌa yoltac strono dꞌa yichan̈ vin̈.
10 Masanil juntzan̈ ebꞌ chiꞌ, syal ebꞌ dꞌa vin̈ icha tic: ¿Tom ix el ip a ach tic? ¿Tom lajan ach aj quedꞌoc?
11 A dꞌa pecaꞌ tzach icꞌjichaan̈ yedꞌ bꞌit yedꞌ teꞌ arpa. Axo ticnaic, ayachxo ecꞌ dꞌa co cal a on̈ chamnac on̈ tic. Jichan ach ecꞌ dꞌa a vaynubꞌ dꞌa scal nocꞌ aꞌay, axo a cꞌuꞌ, nabꞌa aꞌayxon̈ej, xchi ebꞌ chamnac chiꞌ dꞌa vin̈.
12 Ach nit cꞌanal to tzach veei dꞌa qꞌuin̈ibꞌalil, ix ach yumjicot xututoc dꞌa satchaan̈. Ato dꞌa sat lum tic ach javi tan̈najoc. A ach ton tic ix aqꞌuem lan̈naj juntzan̈ chon̈abꞌ.
13 Ix a naꞌ icha tic: Ol in qꞌuecꞌoch dꞌa satchaan̈. Ataꞌ ol in bꞌoem in trono dꞌa yibꞌan̈tac qꞌuen scꞌanal Dios. Ataꞌ ol vacꞌ yajalil, ol in em cꞌojan dꞌa jun tzalan bꞌaj syacꞌ molchajel dꞌa stojolal norte.
14 Ol in qꞌuecꞌoch dꞌa yibꞌan̈ asun te chaan̈ ayqꞌuei. Lajan ol in aj yedꞌ Dios Axon̈ej Ochi, xa chi.
15 Palta val yel, toxo ix ach emcꞌoch dꞌa yedꞌtal chamel, ato dꞌa sjulalxo yich ix ach emcancꞌochi.
16 A val ebꞌ tzach ilani, tzꞌoch val qꞌuelan ebꞌ dꞌayach, snaan ebꞌ uuj icha tic: ¿Mantoc a jun vin̈ tic tzꞌacꞌan ibꞌxoc masanil anima, vin̈ tzꞌacꞌanqꞌue n̈ilnaj masanil nación?
17 Ix can tzꞌinan yolyibꞌan̈qꞌuinal yuj vin̈, cuseltac ix ajcan junjun chon̈abꞌ yuj vin̈, man̈xa junoc ebꞌ ayoch preso ix yaqꞌuel vin̈ dꞌa libre, xchi ebꞌ chamnac chiꞌ.
18 Masanil ebꞌ sreyal junjun nación juncꞌolalxo yaj ebꞌ, oyanoch sbꞌeyumal ebꞌ dꞌa stzꞌeytac, munil ayecꞌ junjun ebꞌ bꞌaj mucan.
19 A achxo tic, najat ix ach yumjicanel icha cꞌalem yajbꞌentacxo. A a nivanil, ix yumjicanbꞌat dꞌa scal snivanil ebꞌ vin̈ soldado tecbꞌilchamoc, aton dꞌa yol jun xabꞌ yolanil qꞌuen qꞌueen.
20 Man̈ ol mucjoc a nivanil icha ajnac juntzan̈xo ebꞌ rey, yujto ix ixtejbꞌat a nación, yujto ix a milcham ebꞌ anima dꞌa yol a nación chiꞌ. Man̈xa bꞌaqꞌuin̈ ol bꞌinaj in̈tilal a ach chuc ach tic.
21 Bꞌoocabꞌ yedꞌtal bꞌaj ol miljoccham ebꞌ uninal, yuj val jantac chucal scꞌulejnac ebꞌ smam yicham ebꞌ. Man̈xo ol yacꞌ mandar masanil yolyibꞌan̈qꞌuinal tic ebꞌ. Man̈xo ol bꞌudꞌjoquel sat lum tic yuj yin̈tilal ebꞌ, xchi jun bꞌit chiꞌ.
22 A val Jehová Yajal dꞌa Smasanil tzꞌalan icha tic: Ol vacꞌbꞌat yoval in cꞌol dꞌa yibꞌan̈ Babilonia. Ol in satel jun chon̈abꞌ chiꞌ. Man̈xa bꞌaqꞌuin̈ ol bꞌinajoc, man̈xa junoc anima ol can dꞌay. Man̈xa yuninal ebꞌ, ma yixchiquin ebꞌ ol canoc.
23 Bꞌesbꞌon ol ajcan in sataneli, ichato ol ecꞌ meslabꞌ dꞌay. Axon̈ej nocꞌ tonton ol aj dꞌay, pan̈pumbꞌa ol ajcan a aꞌ dꞌay, xchi Jehová.
Ol satel Asiria
24 A Jehová Yajal dꞌa Smasanil toxo ix yacꞌ stiꞌ, ix yalan icha tic: Masanil tas ix in na in cꞌulej, ol in cꞌulejn̈ej.
25 Ol in satel ebꞌ aj Asiria dꞌa in chon̈abꞌ. Ol in satel ebꞌ dꞌa lum jolomtac vitz dꞌa yol in macbꞌen. Ol vicꞌanel yaelal ayoch yuj ebꞌ dꞌa ebꞌ in chon̈abꞌ, man̈xa bꞌaqꞌuin̈ ol ixtaj ebꞌ yuj ebꞌ junelxo.
26 A jun tic, nabꞌil vuj dꞌa yibꞌan̈ masanil yolyibꞌan̈qꞌuinal tic. Toxo ix in naꞌa to ol in satel masanil nación yedꞌ in poder, xchi Jehová.
27 Tato icha chiꞌ ix aj snaan Jehová Yajal dꞌa Smasanil, ¿machto val junoc ol yal scachanoch vaan? Tato vachꞌxo yaj yuuj, ¿machto val junoc ol yal sqꞌuexani?
A tas albꞌilcan dꞌa yibꞌan̈ ebꞌ filisteo
28 A dꞌa jun abꞌil bꞌaj chamnac vin̈aj rey Acaz, ix schec Jehová valcan a in Isaías in tic icha tic:
29 Ex filisteo, manto ex comon tzalaj yuj bꞌaj ix can̈chajbꞌat teꞌ sjixcꞌabꞌ teꞌ jun ix acꞌanoch eyaelal. A dꞌa junoc nocꞌ chan, ataꞌ ol pitzvoquelta junoc nocꞌ ajavchan te ay smay. Axo dꞌa nocꞌ ajavchan chiꞌ ol pitzvoquelta junocxo nocꞌ chan ecꞌbꞌal te chuc, jelan sbꞌeyi ichato sjen̈vi nocꞌ.
30 A ebꞌ mebꞌaꞌ ay dꞌa smacbꞌen Jehová, ol va ebꞌ dꞌa tzalajcꞌolal icha nocꞌ calnel. A ebꞌ malaj tas ay chiꞌ dꞌay, ol vay ebꞌ dꞌa tzalajcꞌolal. Axo dꞌayex filisteo ex tic, ol yaqꞌuem vejel Jehová chiꞌ dꞌa e cal, axo jayvan̈oc ex ol ex canoc, ol ex cham yuj vejel.
31 Elocabꞌ veqꞌuecꞌoc eyav e masanil ex filisteo, tzex ibꞌxiqꞌue yuj xivelal. Yujto a dꞌa norte scot jun n̈ilan̈ ebꞌ soldado icha junoc nivan topan teꞌ tabꞌ. Malaj junoc tzꞌelcan dꞌa scal ebꞌ.
32 ¿Tas ol aj co pacan dꞌa ebꞌ schecjicot dꞌayon̈ yuj jun nación chiꞌ? Alec dꞌa ebꞌ to a Jehová ix acꞌan stecꞌanil chon̈abꞌ Sion. A ebꞌ ayoch ilcꞌolal dꞌa scal schon̈abꞌ, a dꞌa Sion chiꞌ ol scol sbꞌa ebꞌ.