A tas ix alchajel dꞌa yibꞌan̈ Babilonia
13
Ayocto ix schꞌoxan Jehová vil a in Isaías in yuninal vin̈aj Amoz tas ol javoc dꞌa yibꞌan̈ Babilonia, yuj chiꞌ ix val icha tic:2 Aqꞌuecqꞌue junoc yechel yic oval dꞌa sjolom junoc lum vitz malaj steꞌal. Avajan̈ec dꞌa ebꞌ soldado to tzꞌoch ebꞌ yacꞌ oval. Iqꞌuecqꞌue e cꞌabꞌ tze chꞌoxan bꞌaj tzꞌoch tzacꞌnaj ebꞌ soldado dꞌa spuertail bꞌaj tzꞌoch ebꞌ yajal yaj dꞌa Babilonia.
3 Toxo ix vavtej ebꞌ vin̈ in soldado te tecꞌan, toxo ix val dꞌa ebꞌ vin̈ acꞌum oval sicꞌbꞌilxoel vuuj, ol tzalaj ebꞌ vin̈ ayic ol in satanel ebꞌ ayoch ajcꞌolal dꞌayin yuj yoval in cꞌool, xchi Jehová, xin chi.
4 Abꞌec val yoch jun av dꞌa jolomtac vitz, tzijtum anima tzꞌel yav, aton ebꞌ anima ix laj cot dꞌa juntzan̈xo nación ix smolbꞌej sbꞌa. A Jehová Yajal dꞌa Smasanil van smolbꞌan ebꞌ soldado ol acꞌan oval chiꞌ.
5 Aton ebꞌ ix cot dꞌa juntzan̈ nación te najat, bꞌaj slajvicꞌoch lum luum. A Jehová sjavi yedꞌ syamcꞌabꞌ yic yoval scꞌool, ol satanel masanil anima dꞌa sat luum tic.
6 Elocabꞌ veqꞌuecꞌoc eyav, yujto lacꞌanxo sjavi jun cꞌual yic yoval scꞌol Jehová Syal Yuj Smasanil. A dꞌa jun cꞌual chiꞌ, ol satjoquel masanil tas yuuj.
7 Yuj chiꞌ jun, masanil anima, ol el yip scꞌabꞌ ebꞌ yuj xivelal, man̈xo animaoc ol ajcan ebꞌ.
8 Ol te xivqꞌue ebꞌ. Ol ja val jun nivan ilcꞌolal yedꞌ yaelal dꞌa yibꞌan̈ ebꞌ. Ol qꞌue cotan, ol qꞌue cuman ebꞌ yabꞌan syail, icha junoc ix ix tzꞌalji yuneꞌ. Toxon̈ej ol yil-lajoch sat ebꞌ, ol checlajel xivelal dꞌa sat ebꞌ.
9 Van sjavi jun cꞌu yic Jehová, jun cꞌual bꞌaj man̈xo ol syamoch vaan yoval scꞌool. Toxon̈ej ol can tzꞌinan lum luum tic yuuj, ol satel masanil ebꞌ chuc.
10 A dꞌa jun cꞌu chiꞌ, masanil qꞌuen cꞌanal sveei dꞌa satchaan̈, man̈xo ol yacꞌlaj yoc qꞌueen. Ol qꞌuicꞌbꞌocpaxel yoc cꞌu ayic van sjavi, man̈xo ol yacꞌpaxlaj yoc qꞌuen uj.
11 Ol yalan Jehová icha tic: Ol vacꞌoch syaelal masanil ebꞌ anima dꞌa yolyibꞌan̈qꞌuinal tic yuj chucal scꞌulej ebꞌ. Ol viqꞌuem ebꞌ syicꞌchaan̈ sbꞌa. A ebꞌ malaj yelcꞌoch ebꞌ yetanimail dꞌa sat, man̈xa jabꞌoc ol aj yelcꞌoch ebꞌ.
12 Jayvan̈xon̈ej anima ol canoc, yuj chiꞌ puralxon̈ej ol ilchaj ebꞌ icha qꞌuen oro te vachꞌ, qꞌuen scot dꞌa Ofir.
13 Ol in tzicubꞌtan̈ej satchaan̈, ol viqꞌuel lum luum dꞌa yedꞌtal yuj yoval in cꞌol a in Jehová Yajal in dꞌa Smasanil. Ol te cot val voval dꞌa jun cꞌual chiꞌ.
14 A ebꞌ anima, lajan ol aj ebꞌ icha nocꞌ chꞌucul pechbꞌil, ma icha junoc n̈ilan̈ nocꞌ calnel saclembꞌati, man̈xa mach smolbꞌani. Ol laj bꞌatcan junjun ebꞌ anima chiꞌ elelal dꞌa schon̈abꞌ yedꞌ bꞌajtac cajan.
15 Yaln̈ej mach ol yamchajoc, ol tecjoc chamoc. Yaln̈ej mach ol yacꞌ yamchaj sbꞌa, ol miljocchamoc.
16 Qꞌuelan val och ebꞌ, ol miljoccham yuninal ebꞌ dꞌa sat luum. Ol laj icꞌjoquelta tastac ay dꞌa yoltac spat ebꞌ, ol ixtaj ebꞌ ix yetbꞌeyum ebꞌ.
17 Ol vacꞌcot ebꞌ aj Media satel ebꞌ. A ebꞌ chiꞌ, man̈ ol och qꞌuelan ebꞌ yuj qꞌuen plata, ma qꞌuen oro.
18 A yedꞌ sjul-labꞌ ebꞌ, ol sjulancham ebꞌ quelemtac ebꞌ. Man̈xo ol ocꞌlaj scꞌol ebꞌ dꞌa ebꞌ cotac unin yedꞌ dꞌa ebꞌ acꞌ unin.
19 A Babilonia chiꞌ, an̈ej vachꞌ yilji dꞌa yichan̈ juntzan̈xo nación. Te acꞌumtac ebꞌ caldeo yedꞌoc, icha qꞌuen qꞌueen vachꞌ yilji, palta lajan ol ajcan icha ajnaccan Sodoma yedꞌ Gomorra ayic in satannaqueli.
20 Man̈xa bꞌaqꞌuin̈ ol cajnaj anima dꞌay. Man̈xo ol yaqꞌuem scampamento ebꞌ tzꞌecꞌ stan̈vej nocꞌ smolbꞌetzal nocꞌ taꞌ.
21 Axon̈ej nocꞌ caltacteꞌal nocꞌ ol aj taꞌ. Ol bꞌudꞌjoquel yoltac pat yuj nocꞌ tonton yedꞌ nocꞌ avestruz. Ol ecꞌ tzꞌitiljoc nocꞌ cꞌultaquil chiva taꞌ.
22 A dꞌa yoltac nivac cuartel yedꞌ dꞌa yoltac palacio te vachꞌ yilji dꞌa Babilonia chiꞌ, ataꞌ ol laj ocꞌ juntzan̈ nocꞌ icha nocꞌ oques. Van scꞌoch scꞌual yic satjiel jun nación chiꞌ, man̈xo ol ecꞌ tiempo, xchi Jehová.