A Slolonel Dios Dꞌa Vin̈aj
ISAÍAS
Ix och smul ebꞌ aj Judá dꞌa Jehová
1
A in Isaías in tic, yuninal in vin̈aj Amoz. Ix chꞌoxji vil juntzan̈ tas ix in tzꞌibꞌejcan tic yuj tas ol javoc dꞌa yibꞌan̈ ebꞌ aj Judá yedꞌ ebꞌ aj Jerusalén. Ix vil juntzan̈ tic ayic ayoch ebꞌ vin̈ tic sreyaloc Judá: Aton vin̈aj Uzías, vin̈aj Jotam, vin̈aj Acaz yedꞌ vin̈aj Ezequías.2 Ex aj satchaan̈ yedꞌ ex aj sat luum, abꞌec val tas syal Jehová: A ebꞌ in chon̈abꞌ tic, ix in qꞌuibꞌtzitej ebꞌ ayic ix cotoch ebꞌ uninal, axo ix aji, ix meltzajoch ebꞌ ajcꞌolal dꞌayin.
3 A nocꞌ vacax, yojtac yajal nocꞌ yedꞌ nocꞌ bꞌuru yojtac nocꞌ bꞌaj sva yuj mach ay yicoꞌ. Palta axo in chon̈abꞌ Israel, max bꞌalaj nachajel jabꞌoc yuuj tato vicoꞌ. Ichato malaj spensar, xchi Jehová.
4 Ex vetchon̈abꞌ, ix och val e mul, an̈ej val chucal tze cꞌulej icha scꞌulejnac ebꞌ co mam quicham. Te chuc tas tze cꞌulej. Ix eyactejcan Jehová, ix e patiquejcanel Dios Axon̈ej Ochi, aton co Diosal a on̈ israel on̈ tic. Ix ex meltzaj dꞌa e patic.
5 ¿Tas yuj tze te pitej e bꞌa? ¿Tom tze nibꞌejn̈ej tzꞌacꞌjioch yaelal dꞌa eyibꞌan̈? Ichato lajvinac e jolom, man̈xalaj jabꞌoc yip e nivanil.
6 Ichato man̈xa jabꞌoc sjacanil e nivanil chiꞌ yuj yaelal, schacot dꞌa eyoc, masanto sqꞌuecꞌoch dꞌa schon eyaal. Ay elnac sat, ay ton̈ej malnac, ay pax van scꞌabꞌati. Malaj pax yan̈al tzꞌochi, malaj mach tzꞌacꞌanoch jabꞌoc cꞌapac dꞌa sat, malaj jabꞌoc aceite tzꞌoch dꞌay yic spacbꞌi jabꞌoc.
7 A e macbꞌen tic, toxo ix satjieli. Ix ochcan scꞌacꞌal e chon̈abꞌ. Axo masanil eyavbꞌen, a val dꞌa eyichan̈ sloji sat yuj ebꞌ chꞌoc nacional, cuseltac ix ajcan smasanil.
8 Ix actajcan chon̈abꞌ Sion, icha tzꞌaj yactancan slechpat ebꞌ tan̈vum uva, ma slechpat ebꞌ tan̈vum melón, ma icha junoc chon̈abꞌ oybꞌilqꞌue yuj ebꞌ ajcꞌool yic satel ebꞌ.
9 Ix to el dꞌa scꞌol Jehová Yajal dꞌa Smasanil, tzon̈ can jayvan̈ on̈xo tic, qꞌuinaloc tato maay, lajan am ix aj co satel icha ajnac chon̈abꞌ Sodoma yedꞌ Gomorra.
A val ejmelal dꞌa Dios
10 Ex yajal Jerusalén, lajan ex icha ebꞌ aj Sodoma. E masanil ex anima, lajan ex icha ebꞌ aj Gomorra. Abꞌec val scꞌaybꞌubꞌal Jehová co Diosal.
11 Syal Jehová icha tic: A jantac e silabꞌ tzeyicꞌcot dꞌayin, malaj tzꞌoch vuuj. Toxo ix yajalax nocꞌ calnel vuuj, aton nocꞌ sn̈usjitzꞌa masanil silabꞌil. Toxopax ix in tzactzaj yedꞌ xepual nocꞌ nocꞌ te bꞌaqꞌuech. Maxtzac in nibꞌejlaj schiqꞌuil nocꞌ mam vacax, ma schiqꞌuil nocꞌ mam calnel, ma nocꞌ yunetac chiva.
12 ¿Mach ix cꞌanan juntzan̈ chiꞌ dꞌayex, yuj chiꞌ tzex comon javi yedꞌ nocꞌ chiꞌ dꞌa vichan̈, tze comon tecꞌan yamaqꞌuil in templo?
13 Man̈xo eyicꞌcot juntzan̈ silabꞌ chiꞌ dꞌayin, man̈xalaj tzꞌoch vuuj. Maxtzac scha in cꞌol incienso tze n̈usuꞌ. A juntzan̈ e qꞌuin̈ tzeyacꞌochi ayic tzꞌalji qꞌuen uj, dꞌa scꞌual icꞌoj ip yedꞌ ayic tze molbꞌan e bꞌa dꞌa nivac qꞌuin̈, maxtzac techaj vilani, yujto an̈ej val chucal tze cꞌulej.
14 A juntzan̈ e qꞌuin̈ ayic tzꞌalji qꞌuen uj chiꞌ yedꞌ juntzan̈xo e qꞌuin̈ bꞌaj tze molbꞌej e bꞌa, chacbꞌilxoel vuuj. Maxtzac techaj vilanochi. Toxo ix yajalax vuuj.
15 Ayic tze mojbꞌanqꞌue e cꞌabꞌ dꞌayin, tzex lesalvi, tzin bꞌat mican dꞌayex. Vachꞌchom jantac tzeyutej e lesalvi, palta max vabꞌlaj e lesal chiꞌ, yujto milumcham anima ex.
16 A ticnaic, iqꞌuequel juntzan̈ chucal chiꞌ dꞌayex, tzeyactancan e cꞌulani, tzeyicꞌanel e bꞌa dꞌa scal.
17 Cꞌaybꞌejec e bꞌa e cꞌulan vachꞌil. A val tojolal tzeyacꞌoch dꞌa e cꞌool e cꞌulani. Colvajan̈ec dꞌa ebꞌ tzꞌixtaji, vachꞌ tzeyutej e bꞌoan yaj ebꞌ unin man̈xa smam. Alec syaelal ebꞌ ix ix chamnac yetbꞌeyum, xchi Jehová.
18 Syalanxi Jehová icha tic: Cotan̈ec, co bꞌoec yaj juntzan̈ tic. Vachꞌchom te chuclaj eyilji yuj e mul, palta ol ex in sacbꞌitejcan icha val qꞌuen sacbꞌacom. Vachꞌchom max yal yel e mul icha junoc cꞌapac qꞌuicꞌmutzꞌinac max el yuqꞌuem, palta ol ex in sacbꞌitejcan icha nocꞌ sacsac lana.
19 Tato tze cha eyabꞌi, ol e lo sat masanil tas vachꞌ tzꞌel dꞌa sat e luum tic.
20 Palta tato an̈ejaꞌ pit tzeyutej e bꞌa jun, ol ex cham yuj oval ol vacꞌcot dꞌayex. A inton val Jehová in svalaꞌ, xchi.
A Jehová ol sacbꞌitan Jerusalén
21 Ex aj Jerusalén, a dꞌa pecataxo te tecꞌan ex. Palta axo ticnaic, ¿tas yuj icha junoc ix ajmul ix, ix ex ajcan dꞌa yol in sat? A dꞌa pecaꞌ chiꞌ, a tojolal tze bꞌeybꞌalej, palta axo ticnaic, milumcham anima ex.
22 A dꞌa yalan̈taxo, icha yilji qꞌuen plata eyilji, axo ticnaic, icha smical qꞌueen eyilji. A dꞌa yalan̈tax chiꞌ, icha vino te vachꞌ, ichex taꞌ, axo ticnaic, icha a aꞌ ix ex ajcani.
23 A ebꞌ eyajalil, ix te pitbꞌiel ebꞌ, vachꞌ yacꞌan ebꞌ yedꞌ ebꞌ elcꞌum. Stzalaj ebꞌ yedꞌ qꞌuen tumin schaꞌ dꞌa elcꞌaltac. Snibꞌej ebꞌ to ay tas siaj dꞌa ebꞌ. Maxtzac yal syaelal ebꞌ mebꞌaꞌ man̈xa smam ebꞌ yedꞌ ebꞌ ix ix chamnac yetbꞌeyum.
24 Yuj chiꞌ, a in Jehová Yajal in dꞌa Smasanil, e Diosal in ex aj Israel, a in sval icha tic: Cꞌocbꞌilxo chiꞌ. A ex ajcꞌol eyajoch dꞌayin, ol in bꞌo yaj eyedꞌoc, ol in pac in bꞌa dꞌayex.
25 Ol vacꞌoch eyaelal, ol in n̈ustzꞌa masanil e paltail, ol vicꞌancanel masanil e mul ayoch dꞌa eyibꞌan̈.
26 Ol vacꞌanxioch ebꞌ juez te tojol spensar dꞌa e cal icha dꞌa pecatax chiꞌ yedꞌ ebꞌ acꞌum razón icha yajtaxon dꞌa sbꞌabꞌelal. Yuj chiꞌ ol yal ebꞌ anima dꞌa jun chon̈abꞌ tic: A jun chon̈abꞌ te vachꞌ, te cꞌanabꞌajum, xcham ebꞌ.
27 Yuj in tojolal, ol in colcanel ebꞌ cajan dꞌa Sion, aton ebꞌ ol sna sbꞌa.
28 Palta axo ebꞌ te pit, ebꞌ scꞌulan chucal yedꞌ ebꞌ tzin paticaneli, ol satel ebꞌ.
29 Icha chiꞌ ol aj e qꞌuixvi, yujto ix laj ex och ejmelal dꞌa juntzan̈ comon dios dꞌa yichtac teꞌ ji yedꞌ dꞌa scaltac teꞌ avbꞌen teꞌ.
30 Icha val tzꞌaj scꞌajbꞌanel xil teꞌ ji chiꞌ, icha pax yaj teꞌ avbꞌen teꞌ man̈xa n̈abꞌ tzꞌecꞌ dꞌa yibꞌan̈, icha val chiꞌ ol ex ajcanoc.
31 A ebꞌ te tecꞌan, icha val an̈ ac ol ajcan ebꞌ. Axo yechel comon dios ix sbꞌo ebꞌ, icha namix cꞌacꞌ ol ajcanoc. Junn̈ej ol aj yoch scꞌacꞌal ebꞌ yedꞌ yechel chiꞌ, man̈xa mach ol yal smacꞌan tupoc, xchi Jehová.