Ol yacꞌ Yajalil Jehová dꞌa slajvubꞌ cꞌual
(Mi 4.1-3)
2
Aton juntzan̈ tic ix chꞌoxji vil a in Isaías in yuninal in vin̈aj Amoz, yuj tas ol javoc dꞌa yibꞌan̈ Jerusalén yedꞌ dꞌa juntzan̈xo chon̈abꞌ ay dꞌa yol smacbꞌen Judá.2 A dꞌa slajvubꞌ cꞌual, a lum tzalan bꞌaj ay stemplo Jehová, ol chaan̈bꞌocqꞌue luum, ol ecꞌ lum dꞌa yibꞌan̈ juntzan̈xo vitz ay dꞌa stzꞌeytac chiꞌ. Masanil ebꞌ anima dꞌa junjun chon̈abꞌ, ol javoc ebꞌ dꞌa luum.
3 Man̈ jantacoc ebꞌ anima dꞌa junjun nación ol laj alan dꞌay junjun icha tic: Cotan̈ec, con̈ qꞌueec dꞌa sjolom lum vitz bꞌaj ay stemplo Jehová sDiosal vin̈aj Jacob yic tzon̈ scꞌaybꞌej dꞌa sbꞌeybꞌal, yic ol co bꞌeybꞌalej sbꞌeybꞌal chiꞌ, xcham ebꞌ. Yujto a dꞌa Sion, aton Jerusalén, ol elta scꞌaybꞌubꞌal Jehová, aton schecnabꞌil.
4 A Jehová chiꞌ ol chꞌolbꞌitan yaj masanil nación. Ol yacꞌ lajvoc oval dꞌa scal ebꞌ. Yuj chiꞌ a qꞌuen yespada ebꞌ, asaronal ol ochcan qꞌueen, axo qꞌuen slanza ebꞌ ol ochcan dꞌa jochlabꞌ trigoal. Man̈xo ol yacꞌ oval ebꞌ. Man̈xo ol scꞌaybꞌej sbꞌa ebꞌ yacꞌan oval.
Ol javoc yaelal dꞌa yibꞌan̈ ebꞌ syicꞌchaan̈ sbꞌa
5 A on̈ yin̈tilalon̈can vin̈aj Jacob tic, con̈ bꞌeyec ecꞌ dꞌa saquilqꞌuinal Jehová.
6 Mamin Jehová, ix on̈ actej val can a on̈ a chon̈abꞌ Israel on̈ tic, a on̈ yin̈tilon̈can vin̈aj Jacob tic, yujto bꞌudꞌjinaquel co chon̈abꞌ yuj ebꞌ schuman yedꞌ qꞌuen cꞌanal scot dꞌa stojolal bꞌaj sjavi cꞌu yedꞌ ebꞌ naumel lolonel icha syutej sbꞌa ebꞌ filisteo. Sbꞌoan strato ebꞌ yedꞌ ebꞌ chꞌoc chon̈abꞌil ay scomon dios.
7 A co chon̈abꞌ, bꞌudꞌjinaquel yuj qꞌuen oro yedꞌ qꞌuen plata, maxtzac bꞌischaj jantac co bꞌeyumal. Maxtzac bꞌischaj jantac nocꞌ chej yedꞌ carruaje yic oval.
8 Palta bꞌudꞌjinacpaxel co chon̈abꞌ yuj juntzan̈ yechel comon dios. Slaj yalan sbꞌa ebꞌ anima dꞌa juntzan̈ yechel sbꞌo chiꞌ.
9 Yuj chiꞌ emnaquilxon̈ej ix on̈ ajcani. Mamin, man̈ acꞌ nivancꞌolal ebꞌ scꞌulan juntzan̈ chiꞌ.
10 Ex vetchon̈abꞌ, ochan̈ec dꞌa yoltac qꞌuen n̈aqꞌueen, cꞌubꞌejequel e bꞌa dꞌa yoltac jul yuj e xivcꞌolal dꞌa yichan̈ Jehová, te ay smay yilji Jehová chiꞌ yedꞌ stziquiquial.
11 A ebꞌ acꞌumtac, ol em n̈ojan ebꞌ. A ebꞌ syicꞌ val chaan̈ sbꞌa, ol icꞌjocxicanem ebꞌ. An̈ej Jehová ol icꞌjocchaan̈ dꞌa jun cꞌual chiꞌ.
12 Yujto a Jehová Yajal dꞌa Smasanil, ay jun cꞌual nabꞌilxo yuuj, yic ol yacꞌancot yoval scꞌol dꞌa yibꞌan̈ ebꞌ syicꞌ val chaan̈ sbꞌa, ol icꞌjoccanem ebꞌ yuuj.
13 Masanil teꞌ cꞌuteꞌ chaan̈ steel dꞌa Líbano yedꞌ masanil teꞌ ji dꞌa Basán, ol satjoquel teꞌ yuj Jehová.
14 Ol satanpaxel masanil lum nivac vitz yedꞌ lum tzalquixtac chaan̈.*
15 Ol satjocpaxel masanil yedꞌtal ebꞌ soldado chaan̈ yajqꞌue yuuj yedꞌ masanil smuroal chon̈abꞌ vachꞌ yajochi.
16 Ol yacꞌancanem masanil teꞌ barco yic Tarsis dꞌa yich aꞌ mar yedꞌ masanil teꞌ barco te vachꞌ yilji.
17 A ebꞌ syicꞌ val chaan̈ sbꞌa, ol lajvoquel ebꞌ dꞌa juneln̈ej. An̈ej Jehová ol icꞌjocchaan̈ dꞌa jun cꞌual chiꞌ.
18 A Dios ol satanel masanil yechel juntzan̈ comon dios.
19 Ayic ol syamanoch yacꞌan ibꞌxoc yolyibꞌan̈qꞌuinal tic, ol laj xivqꞌue ebꞌ anima. Ol laj scꞌubꞌanel sbꞌa ebꞌ dꞌa yoltac qꞌuen n̈aqꞌueen yedꞌ dꞌa yoltac jul. Ataꞌ ol scꞌubꞌejel sbꞌa ebꞌ dꞌa yichan̈ Jehová, yujto te ay smay yedꞌ jantac stziquiquial.
20 A dꞌa jun cꞌual chiꞌ, a ebꞌ anima, ol laj sjulcanbꞌat juntzan̈ yechel scomon diosal ebꞌ bꞌaj ay nocꞌ chꞌoov yedꞌ bꞌaj ay nocꞌ sotzꞌ, aton juntzan̈ bꞌobꞌil yuj ebꞌ dꞌa qꞌuen plata yedꞌ dꞌa qꞌuen oro bꞌaj ix laj yal sbꞌa.
21 Ayic ol syamanoch Jehová chiꞌ yacꞌan ibꞌxoc yolyibꞌan̈qꞌuinal tic, ol laj scꞌubꞌejel sbꞌa ebꞌ anima dꞌa yoltac qꞌuen n̈aqꞌueen yedꞌ dꞌa yoltac sjatelal qꞌuen nivac tenam, yujto ol xiv ebꞌ dꞌa yichan̈, yujto te ay smay yilji yedꞌ jantac stziquiquial.
22 Actejec eyacꞌanoch ebꞌ quetanimail yipoc e cꞌool, yujto a on̈ anima on̈ tic, chamel bꞌa anima caji, junn̈ej rato tzꞌel jabꞌ quicꞌ tic.