A syaelal Jerusalén yedꞌ smacbꞌen Judá
3
A ticnaic a Jehová Yajal dꞌa Smasanil, ol yicꞌcanel masanil tas tzꞌabꞌlaji yedꞌ masanil tas tzꞌucꞌji dꞌa Jerusalén tic yedꞌ dꞌa Judá. Ol yicꞌanpaxel masanil ebꞌ yipcꞌolal yaj yuuj:2 Aton ebꞌ vin̈ yajalil ebꞌ soldado, ebꞌ vin̈ juez, ebꞌ schecabꞌ Dios, ebꞌ ajchum, ebꞌ yichamtac vinaquil chon̈abꞌ,
3 ebꞌ yajal yaj dꞌa 50 ebꞌ soldado, ebꞌ nivac yelcꞌochi, ebꞌ acꞌum razón, ebꞌ tzuji yuuj yedꞌ ebꞌ ajbꞌaal.
4 Axo ebꞌ quelemtac unin ol och eyajaliloc yuj Jehová chiꞌ, axo ebꞌ ol ex acꞌan mandar.
5 Axo ebꞌ anima, ol qꞌue bꞌuynaj ebꞌ yacꞌan oval, ol laj yacꞌ oval ebꞌ yedꞌ ebꞌ ay dꞌa spatic schiquin spat. A ebꞌ vin̈ quelemtac, ol spatiquejel ebꞌ ichamtac vinac ebꞌ vin̈. Axo ebꞌ comon anima, ol spatiquejel ebꞌ ay yopisio ebꞌ.
6 A dꞌa jun tiempoal chiꞌ, ol yal junoc mach dꞌa junoc ayto yuj sbꞌa yedꞌ smam icha tic: A ach tic, te ay a pichul, acꞌ yajalil dꞌa jun chon̈abꞌ macꞌbꞌilem vecnaj tic, xchama.
7 Axo jun vin̈ chiꞌ, ol xivbꞌat vin̈, ol yalan vin̈ icha tic: Max yal in chaanoch jun opisio tic dꞌa vibꞌan̈, yujto malaj tas tzin va dꞌa in pat, malaj pax in pichul vachꞌ vacꞌanochi, man̈ eyacꞌoch jun opisio chiꞌ dꞌa vibꞌan̈, xcham vin̈.
8 Van yem lan̈naj Jerusalén, axo Judá toxo ix lajviemi, yujto a tas syal ebꞌ anima yedꞌ tastac scꞌulej ebꞌ, a chiꞌ tzꞌoch ajcꞌolal dꞌa Jehová Dios, spitejpax sbꞌa ebꞌ dꞌay.
9 Scheclajpaxel dꞌa sat ebꞌ to lajan smul ebꞌ icha ebꞌ aj Sodoma, max scꞌubꞌejel jabꞌoc ebꞌ. Obꞌiltac ebꞌ. Munil val a ebꞌ tzꞌicꞌancot dꞌa yibꞌan̈.
10 Alec dꞌa ebꞌ anima vachꞌ sbꞌeybꞌal to vachꞌ ol elcꞌoch ebꞌ, yujto ol tzalaj ebꞌ yilanoch svachꞌil spac tas scꞌulej chiꞌ.
11 Obꞌiltac val ebꞌ anima chuc spensar, te chuc ol elcꞌoch ebꞌ, yujto a tas scꞌulej ebꞌ, a chiꞌ ol acꞌjoc spacoc dꞌa ebꞌ.
12 A ebꞌ quelemtac tzꞌixtanel in chon̈abꞌ tic, axo ebꞌ ix ix tzꞌacꞌan yajalil dꞌay. Ex in chon̈abꞌ, a ebꞌ tzex cuchbꞌan chiꞌ, a ebꞌ tzex acꞌan musansatil, tzex yicꞌanbꞌat ebꞌ dꞌa bꞌeybꞌal man̈ vachꞌoc.
13 A Jehová ayecꞌ dꞌa sdespacho, yic schꞌolbꞌitan ebꞌ schon̈abꞌ, syacꞌan syaelal ebꞌ.
14 Ol chꞌolbꞌitaj ebꞌ yajal chon̈abꞌ yedꞌ ebꞌ ichamtac vinac yuj Jehová. Ol yalan dꞌa ebꞌ icha tic: A ex tic, ix e satel vavbꞌen uva, aton in chon̈abꞌ. Ix eyelqꞌuej tas ay dꞌa ebꞌ mebꞌaꞌ, ix e molbꞌan eyelcꞌal chiꞌ dꞌa yol e pat.
15 ¿Tas eyalan eyic eyixtan in chon̈abꞌ tic? Tzeyixtej ebꞌ mebꞌaꞌ, man̈xo animaoc tzeyutej ebꞌ, xchi Jehová Yajal dꞌa Smasanil.
Yaelal ol cot dꞌa yibꞌan̈ ebꞌ ix aj Jerusalén
16 An̈ejtonaꞌ syalanpax Jehová icha tic: A ebꞌ ix aj Sion, syicꞌ val chaan̈ sbꞌa ebꞌ ix, syum tic, syum tic sat ebꞌ ix, schꞌum tic, schꞌum tic sbꞌa ebꞌ ix, ayic sbꞌey ebꞌ ix. Max qꞌuixvi jabꞌoc ebꞌ ix, toxon̈ej stzin̈iljubꞌ qꞌuen qꞌueen ayoch dꞌa yoc ebꞌ ix ayic sbꞌey ebꞌ ix chiꞌ. 17 Yuj chiꞌ, ol vaqꞌuel bꞌulnaj xil sjolom ebꞌ ix yuj yabꞌil, ol vacꞌ checlaj sqꞌuixvelal ebꞌ ix, xchi Jehová chiꞌ.
18 A dꞌa jun cꞌu chiꞌ, a Jehová ol icꞌanel masanil tastac ayoch yelvanubꞌoc snivanil ebꞌ ix aj Jerusalén chiꞌ: Aton ayoch dꞌa yoc ebꞌ ix, dꞌa sjolom ebꞌ ix, dꞌa sjaj ebꞌ ix,
19 dꞌa sjaj scꞌabꞌ ebꞌ ix yedꞌ cꞌapac spichul sat ebꞌ ix.
20 Ol yicꞌanpaxel spichul sjolom ebꞌ ix, stzecꞌul ebꞌ ix, sperfume ebꞌ ix, yuchiquin ebꞌ ix,
21 scolcꞌabꞌ ebꞌ ix, sqꞌuenal sn̈iꞌ ebꞌ ix,
22 cꞌapac spichul ebꞌ ix te vachꞌ, jantac scꞌapac ebꞌ ix, sjucan pichul ebꞌ ix, syunetac pa ebꞌ ix,
23 qꞌuen snen ebꞌ ix, scꞌapac ebꞌ ix te jay, cꞌapac tziquiqui yedꞌ stzecꞌul sjolom ebꞌ ix.
24 A sperfume ebꞌ ix te vachꞌ sjabꞌ, a tas te chuc sjabꞌ ol och sqꞌuexuloc. Axo chꞌan̈ lasu ol och sqꞌuexuloc stzecꞌul ebꞌ ix, axo xil sjolom ebꞌ ix te vachꞌ yaj dꞌa yalan̈taxo, ol el bꞌulnajoc. A pichul ya svaꞌi, a ol yacꞌoch ebꞌ ix sqꞌuexuloc pichul te vachꞌ yilji. A sat ebꞌ ix te vachꞌ yilji, jechꞌtac ol ajcanoc.
25 A ebꞌ vin̈ yetbꞌeyum ebꞌ ix te tecꞌan, ol miljoccham ebꞌ vin̈ dꞌa scal oval.
26 Axo masanil ebꞌ aj Jerusalén, ol ocꞌ ebꞌ yuj cuscꞌolal, yujto ol can tzꞌinan schon̈abꞌ ebꞌ chiꞌ.