4
A dꞌa jun tiempoal chiꞌ, jayvan̈xon̈ej ebꞌ vin̈ vinac ol canoc, yuj chiꞌ ol yal ucvan̈oc ebꞌ ix ix dꞌa junoc vin̈ vinac icha tic: Comonoc tzꞌel dꞌa a cꞌool tzon̈ och etbꞌeyumoc, munil ol co say tas ol co va yedꞌ co pichul, an̈ejto tzon̈ och etbꞌeyumoc yic man̈xa co qꞌuixvelal bꞌaj malaj quetbꞌeyum, xcham ebꞌ ix.Ol bꞌoxoc yaj Jerusalén
2 A dꞌa jun tiempoal chiꞌ, a Jehová ol acꞌan checlaj jun mach dꞌa scal yin̈tilalcan vin̈aj rey David, icha svol junoc te teꞌ. Te vachꞌ yilji, te nivan yelcꞌochi. Axo ebꞌ aytocan dꞌa Israel chiꞌ, ol tzalajxoc ebꞌ ayic ol yilan ebꞌ yelul sat tas syavej dꞌa sat sluum chiꞌ.
3 A jayvan̈xo ebꞌ aycan dꞌa Jerusalén chiꞌ, aton Sion, aton ebꞌ tzꞌibꞌabꞌil sbꞌi to scan taꞌ, ol aljoc dꞌa ebꞌ to yicn̈ej Jehová yaj ebꞌ.
4 A dꞌa jun tiempoal chiꞌ, a Jehová ol chꞌolbꞌitan yaj ebꞌ aj Jerusalén chiꞌ yedꞌ spoder. Ol icꞌjocpaxel schucal ebꞌ yedꞌ smul ebꞌ yuj anima ix smilchamoc.
5 A dꞌa cꞌualil ol yacꞌoch jun qꞌuicꞌ asun Jehová dꞌa yibꞌan̈ masanil smacbꞌen lum vitzal Sion chiꞌ yedꞌ dꞌa yibꞌan̈ masanil ebꞌ anima molanecꞌ taꞌ. Axo dꞌacꞌvalil, ay jun nivac cꞌacꞌ tzꞌacꞌan saquilqꞌuinal dꞌa ebꞌ, yujto a stziquiquial Dios chiꞌ ayecꞌ dꞌa yibꞌan̈ ebꞌ anima chiꞌ smasanil.
6 Aton jun chiꞌ scolan ebꞌ, yujto syacꞌ svevenal dꞌa cꞌualil, yic malaj cꞌacꞌ, an̈ejaꞌ scolanpax ebꞌ, yic max cot n̈abꞌ dꞌa yibꞌan̈ ebꞌ yedꞌ icꞌ n̈abꞌ.