A sbꞌital teꞌ avbꞌen uva
5
A ticnaic, ol in bꞌitej sbꞌital jun vin̈ vamigo te vachꞌ yedꞌ jun yavbꞌen uva. A vin̈ vamigo chiꞌ, ay jun yavbꞌen uva vin̈ dꞌa jun sluum te yax sat dꞌa jun tzalan.2 Ix sdꞌocqꞌue vaan jun slum vin̈ chiꞌ, ix sicꞌanel qꞌuen qꞌueen vin̈ dꞌa sat luum, ix sbꞌoanoch smacteꞌal lum vin̈, axo teꞌ uva te vachꞌ ix yavej vin̈ dꞌa luum. Ix sbꞌoqꞌue jun yedꞌtal ebꞌ stan̈van juntzan̈ avbꞌen chiꞌ vin̈, chaan̈ ix ajqꞌuei. Ix sbꞌoanpax jun lugar vin̈ bꞌaj stecꞌjiel yal teꞌ uva chiꞌ. A snaan vin̈ to teꞌ vachꞌ sat teꞌ uva chiꞌ ol yacꞌaꞌ, axo ix aji, te paj teꞌ sat ix yacꞌ chiꞌ.
3 Yuj chiꞌ ix yalan vin̈ icha tic: A ticnaic ex aj Jerusalén yedꞌ ex aj Judá: Alec dꞌayin mach ay spaltail, ¿tom a in, mato a jun vavbꞌen tic?
4 ¿Tom man̈ tzꞌacanoc ix vutej teꞌ in bꞌoani? ¿Aytom maj nachaj vuj tas tzꞌaj teꞌ yavchaji? Ix in tan̈vej yacꞌan sat teꞌ vachꞌ, axo ix aji, paj sat teꞌ ix yacꞌaꞌ.
5 Axo ticnaic jun, ol val dꞌayex tas ol vutej in munlajel tic: Ol viqꞌuel smacteꞌal teꞌ chiꞌ yic ol satel teꞌ. Ol jacvoquel smacteꞌal teꞌ chiꞌ, yic vachꞌ ol tecꞌjoquem teꞌ yuj nocꞌ nocꞌ.
6 Ol vactejcan teꞌ ichn̈ej taꞌ. Man̈xa mach ol aqꞌuenan teꞌ, man̈xa mach ol icꞌanel teꞌ schuclajil. Ol qꞌuibꞌ an̈ an̈cꞌultac ay sqꞌuixal dꞌa scal teꞌ. Ol valan dꞌa asun to maxtzac yacꞌcot sn̈abꞌil dꞌa yibꞌan̈ jun avbꞌen chiꞌ, xchi vin̈ aj avbꞌen chiꞌ.
7 Ichaton chiꞌ yaj ebꞌ yin̈tilal Israel yedꞌ ebꞌ aj Judá. Icha yavbꞌen Jehová Yajal dꞌa Smasanil, icha chiꞌ yaj ebꞌ. A Jehová chiꞌ, ix stan̈vej to vachꞌ syutej sbꞌa ebꞌ dꞌa scꞌaybꞌubꞌal, palta axo ix aji, a milojcham anima ix yacꞌ ebꞌ. Snibꞌej val Jehová chiꞌ to tojol syutej sbꞌa ebꞌ, axo tzꞌaji, tzꞌel yav anima yixtaj yuj ebꞌ.
Syaelal ebꞌ chuc
8 Obꞌiltac ebꞌ tzijtum spat ix smanaꞌ, nivan pax lum sluum ebꞌ ix smaccani. Man̈xa jabꞌoc tas ix yactejcan ebꞌ dꞌa juntzan̈xo ebꞌ. Axon̈ej ebꞌ snibꞌej tzꞌaj dꞌa sat lum dꞌa jun chon̈abꞌ tic.
9 A Jehová Yajal dꞌa Smasanil, a ix alan dꞌayin icha tic: A juntzan̈ nivac pat te vachꞌ yilji chiꞌ, ol sateloc vachꞌchom te vachꞌ yilji, man̈xalaj mach ol cajnaj dꞌay.
10 A dꞌa junoc 90 chꞌan̈il uva avabꞌil, an̈ej oyeꞌ galón yal sat uva chiꞌ ol elta. Axo dꞌa junoc vaqueꞌ quintal in̈at tzꞌavchaji, an̈ej vac almul ol elta.
11 Obꞌiltac ebꞌ spet qꞌue vaan dꞌa qꞌuin̈ibꞌalil syamanxioch uqꞌuel an̈ ebꞌ, ste qꞌue an̈ dꞌa sjolom ebꞌ, scanxon̈ej ebꞌ taꞌ tzꞌecꞌ acꞌval.
12 A bꞌaj tzꞌoch nivac vael tzꞌucꞌvi an̈ ebꞌ, ataꞌ ayoch juntzan̈ yamcꞌabꞌ yic bꞌit: Aton teꞌ arpa, teꞌ violín, qꞌuen pandereta yedꞌ teꞌ flauta. Axo tas van snaan Jehová dꞌa yibꞌan̈ ebꞌ, max yacꞌlaj pensar ebꞌ yuuj.
13 Yujto malaj sgana in chon̈abꞌ tic snachajel yuuj, yuj chiꞌ ol icꞌchajbꞌat dꞌa juntzan̈xo chꞌoc nacional. Masanil ebꞌ anima tic yedꞌ ebꞌ yajalil ebꞌ, ol cham ebꞌ yuj vejel yedꞌ taquin̈tial.
14 Yuj chiꞌ, icha val to ol sjac stiꞌ chamel yic ol sbꞌucꞌanbꞌat ebꞌ anima chiꞌ yedꞌ ebꞌ yajalil ebꞌ dꞌa Jerusalén tic, aton ebꞌ anima scomon el yav tzꞌeqꞌui.
15 Ol icꞌjoccanem ebꞌ anima syicꞌchaan̈ sbꞌa, emnaquilal ol ajcan ebꞌ.
16 Axo Jehová Yajal dꞌa Smasanil, ol yacꞌ checlajoc to te nivan yelcꞌochi ayic ol schꞌolbꞌitan masanil tas. A Dios chiꞌ yelxo te vachꞌ, ol schꞌoxeli to te tojol spensar.
17 A dꞌa juntzan̈ chon̈abꞌ ix laj em lan̈naj chiꞌ, ataꞌ ol laj va nocꞌ calnel yedꞌ nocꞌ chiva.
18 Obꞌiltac ex mach ex max eyactej e cꞌulan chucal chiꞌ, malaj yalan tas tze cꞌulej chiꞌ. Ichato n̈erbꞌil chucal chiꞌ eyuuj, icha sn̈erchaj junoc carreta tzecꞌbꞌiloch dꞌa tas sn̈eran chiꞌ.
19 Tzeyalan icha tic: A co Diosal a on̈ israel on̈ tic, aton Dios Axon̈ej, comonoc syalaꞌ scꞌulan tas nabꞌil yuj chiꞌ dꞌa quibꞌan̈, yic ayman̈ quilani tas tzon̈ aji, xe chi.
20 Obꞌiltac ex tzeyal chucal vachꞌilal, axo vachꞌil chiꞌ, a tzeyal chucal. A saquilqꞌuinal tzeyal qꞌuicꞌalqꞌuinalil, axo qꞌuicꞌalqꞌuinal chiꞌ tzeyal saquilqꞌuinalil. A tas cꞌaꞌ, chiꞌ eyalani, axo tas chiꞌ, cꞌaꞌ eyalani.
21 Obꞌiltac ex tzeyaloch e bꞌa jelanil, te vachꞌ e pensar e naani.
22 Obꞌiltac ex te jelan eyucꞌan an̈, jelan e calan an̈ an̈ chiꞌ.
23 A ex tic yuj qꞌuen tumin tzeyalaꞌ to malaj smul ebꞌ tzꞌoch smul, axo ebꞌ malaj smul chiꞌ, max eyal-laj syaelal ebꞌ.
24 Yuj chiꞌ, icha val tzꞌaj stzꞌabꞌat an̈ ac yuj teꞌ cꞌacꞌ, icha stzꞌabꞌat teꞌ xiltac teꞌ taquin̈, icha chiꞌ ol aj e lajvieli. Icha tzꞌaj te teꞌ stacjieli yujto cꞌaeltacxo schꞌan̈al yibꞌ teꞌ, toxon̈ej tzꞌel bꞌulnaj xumaquil teꞌ, tzꞌochcan pococal, icha chiꞌ ol ex ajoc, yujto ix e chaccanel scꞌaybꞌubꞌal Jehová Yajal dꞌa Smasanil. Ix e patiquejpaxel schecnabꞌil co Diosal Axon̈ej.
25 Yuj chiꞌ scot val yoval scꞌol dꞌa eyibꞌan̈, ol yacꞌanoch eyaelal. A lum nivac vitz, ol ibꞌxoc luum, toxon̈ej teltumbꞌa ol ex ajcan e cham dꞌa yoltac calle. Man̈ yujoc chiꞌ ol och vaan yoval scꞌol Jehová chiꞌ, palta to ol yacꞌn̈ej eyaelal chiꞌ.
26 Ol yicꞌchaan̈ jun bandera Jehová chiꞌ yil juntzan̈xo chon̈abꞌ najat ay. Ol xubꞌanbꞌat dꞌa ebꞌ cajan bꞌaj slajvicꞌoch lum luum tic, axo scot lemnaj ebꞌ chiꞌ.
27 Malaj junoc ebꞌ soldado dꞌa scal ebꞌ chiꞌ cꞌunbꞌinac, mato ay svayan̈. Malaj pax ebꞌ choyan yajoch stzecꞌul, ma dꞌin̈chimtac schꞌan̈al sxan̈abꞌ.
28 A yol sjul-labꞌ ebꞌ, te jay sn̈iꞌ, tzatz yaj steꞌal sjul-labꞌ ebꞌ chiꞌ. A yech nocꞌ schej ebꞌ, icha val qꞌuen qꞌueen te tzatz, axo scarruaje ebꞌ, jelan sbꞌey icha chacxuxum icꞌ.
29 Ayic tzꞌel yav ebꞌ, icha val yel yav nocꞌ choj ayic sayan schibꞌej nocꞌ. Syicꞌanbꞌat nocꞌ bꞌaj ay, man̈xalaj mach syal yicꞌanecꞌ dꞌa nocꞌ.
30 Ayic ol cot ebꞌ anima dꞌa juntzan̈ chon̈abꞌ chiꞌ, aton dꞌa jun cꞌu chequel yaj chiꞌ, ol el yav ebꞌ sjavi dꞌa spatic co chon̈abꞌ tic, icha val scꞌan̈ aꞌ mar. A mach ol ilancotoc, ol yil eyaelal chiꞌ ebꞌ. Ichato qꞌuicꞌqꞌuinal yaji, ol tup saquilqꞌuinal yuj asun.