Avtabꞌil vin̈aj Isaías yuj Dios
6
A dꞌa jun abꞌil ayic ix cham vin̈aj rey Uzías, ataꞌ ix vil Dios Cajal, cꞌojanem dꞌa scꞌojnubꞌ te chaan̈ yajqꞌuei. Bꞌudꞌan yol stemplo yuj stitac spichul. 2 A dꞌa yibꞌan̈qꞌuei, ay juntzan̈ ángel icha cꞌacꞌ yilji scuch serafín, vaqueꞌ scꞌaxil junjun ebꞌ. Chabꞌ scꞌaxil ebꞌ chiꞌ smusan sat, axo chabꞌxo smusan yichan̈ ebꞌ, axo yedꞌ chabꞌxo sjen̈vi ebꞌ. 3 Syalan ebꞌ dꞌay junjun icha tic:A Jehová Axon̈ej val, aton Yajal dꞌa Smasanil. Chequeln̈ej stziquiquial dꞌa masanil yolyibꞌan̈qꞌuinal tic, xchi ebꞌ.
4 Ayic ix och jun av chiꞌ, ix ibꞌxiqꞌue spuertail templo chiꞌ, ix bꞌudꞌjiel yool chiꞌ yuj tabꞌ. 5 Ix valan icha tic: Ay... obꞌiltac in, ol in chamoc, yujto ix vil Jehová, aton Rey dꞌa Smasanil. A in xo pax tic, an̈ej chucal svalaꞌ, cajan in paxecꞌ dꞌa scal ebꞌ anima chucn̈ej sloloni, xin chi.
6 Axo dꞌa jun rato chiꞌ, ay jun dꞌa scal ebꞌ ángel chiꞌ ix cot jen̈en̈oc dꞌayin. Yedꞌnac jun tenaza bꞌaj ix yicꞌcot tzacꞌacꞌ dꞌa yibꞌan̈ altar. 7 Ix squilanecꞌ dꞌa in tiꞌ, ix yalan dꞌayin icha tic:
A jun tzacꞌacꞌ ix in quilecꞌ dꞌa a tiꞌ tic, aꞌ ix icꞌancanel a mul ticnaic, ix acꞌji nivancꞌolal a mul, xchi.
8 Ix lajvi chiꞌ ix yalan Jehová chiꞌ icha tic:
¿Mach junoc ol in checbꞌati? ¿Mach val junoc ol och co checabꞌoc? xchi.
Yuj chiꞌ ix in tacꞌvi dꞌay:
Ina in tic Mamin, chequinbꞌati, xin chi.
9 Ix yalan dꞌayin:
Ixic, bꞌat al dꞌa juntzan̈ anima chiꞌ icha tic: Val yel ol eyabꞌn̈ej, palta man̈ ol nachajel-laj eyuuj. Ol eyiln̈ej, palta man̈ ol nachajpaxel-laj eyuuj, xa chi dꞌa ebꞌ.
10 Acꞌ somchaj spensar juntzan̈ anima chiꞌ, mac schiquin ebꞌ, tza macan sat ebꞌ yic max yil ebꞌ, yic max yabꞌpax ebꞌ, yic max nachajpaxel yuj ebꞌ, yic vachꞌ max meltzajxi ebꞌ dꞌayin yic tzin colan ebꞌ, xchi dꞌayin.
11 Ix in cꞌanbꞌan dꞌay icha tic:
Mamin, ¿jantac tiempo ol valel jun tic? xin chi.
Ix yalan dꞌayin:
Ol aln̈ej jun tic masanto ol lajvoquem juntzan̈ chon̈abꞌ, man̈xa mach ol can cajan dꞌay. Man̈xa junoc pat ol can anima dꞌa yool, ol can tzꞌinan luum.
12 A in Jehová in tic ol vacꞌbꞌat juntzan̈ anima tic dꞌa junxo chon̈abꞌ, yic ol can val tzꞌinan schon̈abꞌ ebꞌ tic.
13 Tato ayto jayvan̈ocxo anima olto can dꞌa yol chon̈abꞌ tic, smacꞌchajpaxem lan̈naj jun chon̈abꞌ chiꞌ. Icha yic schꞌacjiel junoc teꞌ ji, ma junoc teꞌ machꞌ, axon̈ej teꞌ yibꞌ scani, icha chiꞌ ol aj in chon̈abꞌ tic. (Palta syal svolanxi teꞌ yibꞌ chiꞌ. Icha chiꞌ ol aj yin̈tilal jayvan̈ocxo ebꞌ in chon̈abꞌ sicꞌbꞌilel vuuj), xchi Jehová.