Sbꞌabꞌel lolonel vin̈aj Isaías dꞌa vin̈aj Acaz
7
Ayic ayoch vin̈aj Acaz yuninal vin̈aj Jotam yixchiquin vin̈aj Uzías reyal dꞌa Judá, ix javi vin̈aj Rezín sreyal Siria yedꞌ vin̈aj Peka yuninal vin̈aj Remalías sreyal Israel yacꞌ oval dꞌa Jerusalén, yic syicꞌanecꞌ ebꞌ vin̈ yalani, palta maj yal-laj yuj ebꞌ vin̈. 2 A dꞌa jun tiempoal chiꞌ ix ul alchaj dꞌa vin̈aj rey Acaz chiꞌ yedꞌ ebꞌ vin̈ ayoch yopisio yedꞌ vin̈ icha tic: A ebꞌ aj Siria, junn̈ej ix yutej sbꞌa ebꞌ yedꞌ ebꞌ aj Israel, van sjavi ebꞌ yacꞌ oval, xchi. Yuj chiꞌ ix ibꞌxiqꞌue vin̈ rey yedꞌ ebꞌ anima chiꞌ yuj xivelal, icha val yibꞌxi te teꞌ yuj icꞌ, icha chiꞌ sluclon ebꞌ.3 Yuj chiꞌ ix yal Jehová dꞌayin Isaías in tic icha tic: Ixic, icꞌbꞌat vin̈ uninal aj Sear-jasub edꞌoc. Ol a chalaj a bꞌa yedꞌ vin̈aj Acaz chiꞌ bꞌaj tzꞌel yoc a aꞌ ay dꞌa jun tanque dꞌa yibꞌan̈ bꞌe, bꞌaj sjucꞌchaj cꞌapac cꞌapac.* 4 Tzalan dꞌa vin̈ icha tic:
Tzil val a bꞌa, palta man̈ ach xivoc, man̈ a comon xibꞌtej a bꞌa. Man̈ ach xiv yuj vin̈aj Rezín yedꞌ ebꞌ aj Siria chiꞌ yedꞌ pax vin̈ yuninal vin̈aj Remalías chiꞌ, yujto scot val yoval ebꞌ dꞌayach icha chabꞌoc teꞌ cuxcꞌacꞌ ay stabꞌil.
5 A ebꞌ aj Siria yedꞌ ebꞌ aj Efraín yedꞌ vin̈ yuninal vin̈aj Remalías chiꞌ, te chuc tas van snaan ebꞌ dꞌa a patic. Syalan ebꞌ vin̈ icha tic:
6 Coyec, bꞌat co maquec ecꞌ Judá, co xibꞌtej ebꞌ anima chiꞌ, squican jun chon̈abꞌ chiꞌ, axo vin̈ yuninal vin̈aj Tabeel scacꞌcanoch reyal taꞌ, xchi ebꞌ vin̈.
7 Palta a in Jehová in sval icha tic: Malaj bꞌaqꞌuin̈ ol elcꞌoch jun tas sna ebꞌ vin̈ chiꞌ.
8-9 Yujto a Damasco, a nivan chon̈abꞌ yaj dꞌa Siria chiꞌ, axo vin̈aj Rezín chiꞌ ayoch sreyaloc. Axo Samaria, a nivan chon̈abꞌ yaj dꞌa Efraín chiꞌ, axo vin̈ yuninal vin̈aj Remalías chiꞌ ayoch sreyaloc. Palta yic val 65 abꞌil ticnaic, ol lajvoquem ebꞌ aj Efraín chiꞌ, man̈xo chon̈abꞌoc ol aj ebꞌ. Tato a ex pax tic man̈ ol in eyacꞌ val och dꞌa e cꞌol sicꞌlabꞌil, man̈ ol cann̈ej e chon̈abꞌ tic, xchi Jehová chiꞌ.
A yabꞌixal jun unin scuch Emanuel
10 Ix yalanxi Jehová dꞌayin Isaías in tic to sval dꞌa vin̈aj Acaz icha tic: 11 Cꞌan il junoc tas dꞌa Jehová co Diosal. Syal schꞌoxan il junoc tas satubꞌtac yilji, vachꞌchom ato dꞌa sjulal yich lum luum tic, mato ato dꞌa yibꞌan̈ satchaan̈, xin chi dꞌa vin̈.
12 Ix tacꞌvi vin̈aj Acaz chiꞌ: Maay, a in tic max yal vacꞌan proval Jehová yic tzin cꞌan vil junoc tas satubꞌtac dꞌay, xchi vin̈.
13 Yuj chiꞌ ix valan icha tic:
Ex yin̈tilalcan vin̈aj rey David, abꞌec tas ol valaꞌ: A e naani to malaj yelcꞌoch e tzuntzan ebꞌ anima. ¿Tom tze nibꞌej tze tzuntzejpax co Diosal icha tzeyutej ebꞌ chiꞌ?
14 A val lacꞌan Jehová ol chꞌoxan junoc tas satubꞌtac dꞌayex: A jun ix cobꞌes tic ol pitzvococh jun unin dꞌa spatic ix, ol aljoc jun svinac unin ix, Emanuel ol yacꞌ ix sbꞌiej.*
15 Ayic ayxo spensar jun unin chiꞌ, ol slo queso, ol yabꞌlanpax nocꞌ yal chabꞌ yedꞌ ebꞌ yetchon̈abꞌ, yujto ayecꞌ ebꞌ dꞌa scal mebꞌail.
16 Ayic mantalaj spensar jun unin chiꞌ, a chabꞌ schon̈abꞌ chavan̈ ebꞌ rey bꞌaj tzach xiv tic, ol can tzꞌinan.
17 A Jehová ol acꞌancot jun yaelal dꞌa ibꞌan̈, yedꞌ dꞌa yibꞌan̈ a chon̈abꞌ yedꞌ dꞌa yibꞌan̈ ebꞌ yin̈tilalcan vin̈aj David. A jun tic manta bꞌaj ix uji yictax ix yicꞌanel sbꞌa Efraín dꞌa Judá. (Aton vin̈ sreyal Asiria ol acꞌanoch jun yaelal chiꞌ.)
18 A dꞌa jun tiempoal chiꞌ, a Jehová ol acꞌancot ebꞌ soldado cajan dꞌa snajatil a aꞌ sbꞌey dꞌa Egipto, ol javoc somnaj ebꞌ icha nocꞌ nivac us, ol ja pax ebꞌ aj Asiria icha nocꞌ nocꞌal chabꞌ.
19 Ol laj aj ebꞌ dꞌa lum nivac yoltac opan, dꞌa yoltac qꞌuen n̈aqꞌueen, dꞌa scal lum vayumtac, dꞌa caltac qꞌuiix yedꞌ bꞌajtac syucꞌ aꞌ nocꞌ vacax.
20 A dꞌa jun tiempoal chiꞌ, icha junoc qꞌuen joxlabꞌ jolom, icha chiꞌ ol yutoc Jehová smajnan vin̈ sreyal Asiria, vin̈ cajan dꞌa scꞌaxepalbꞌat aꞌ nivan Éufrates. Ol ja vin̈ yicꞌbꞌat masanil tastac ay dꞌayex, ichato ol sjoxel xil e jolom vin̈, xil e tiꞌ yedꞌ xil e nivanil.
21 A dꞌa jun tiempoal chiꞌ, yaln̈ej mach ol smol junoc snun vacax, ma chavan̈oc snun calnel, 22 ol yacꞌ sobre yal yim nocꞌ dꞌay, ol sbꞌoan nocꞌ queso ebꞌ. Yaln̈ej mach ol colchaj dꞌa scal oval chiꞌ, ol slo nocꞌ queso chiꞌ ebꞌ, ol yucꞌan nocꞌ yal chabꞌ ebꞌ.
23 A dꞌa junoc lum luum bꞌaj avabꞌil mil ibꞌoc teꞌ uva, mil tumin plata stojol dꞌa pecataxo, axo ol ajoc, ol satem juntzan̈ avbꞌen chiꞌ. Ol qꞌuibꞌxoc qꞌue steꞌal luum, caltac qꞌuiix ol ajxoc luum. 24 Axon̈ej ebꞌ pechum nocꞌ ol ecꞌ yedꞌ sjul-labꞌ taꞌ, yujto ol ochcan lum vayumtaquil yedꞌ caltac qꞌuiixal. 25 A lum tzalquixtac sdꞌocji yedꞌ qꞌuen asaron dꞌa yalan̈taxo, vayumtac, caltac qꞌuiix ol ajcan luum. Man̈xalaj mach ol yal yavan tas dꞌa luum, axon̈ej nocꞌ vacax yedꞌ nocꞌ calnel ol va dꞌa sat luum.