A sbꞌi jun yuninal vin̈aj Isaías
8
Ix yalanxi Jehová dꞌayin icha tic: Say junoc tas nivan yaj checꞌan bꞌaj ol a tzꞌibꞌejem Maher-salal-hasbaz. Nivac ol utej a tzꞌibꞌanemi.* 2 Slajvi chiꞌ tzacꞌancanoch vin̈aj sacerdote Urías yedꞌ vin̈aj Zacarías yuninal vin̈aj Jeberequías testigoal, to yel a ach tza tzꞌibꞌej jun chiꞌ, xchi dꞌayin.3 Ix lajvi chiꞌ, ix in vay yedꞌ ix vetbꞌeyum, aton ix schecabꞌ Dios, ix scuchancanoch yuneꞌ ix. Axo yic ix alji jun unin chiꞌ, ix yalan Jehová dꞌayin icha tic: A vin̈ unin tic, Maher-salal-hasbaz ol acꞌ sbꞌiej vin̈, xchi. 4 Ayic manto yal yalan mamin, nunin vin̈ unin chiꞌ, ol icꞌjocbꞌat masanil sbꞌeyumal chon̈abꞌ Damasco yedꞌ chon̈abꞌ Samaria yuj vin̈ sreyal Asiria, xchi Jehová chiꞌ. 5 Ix yalanxi dꞌayin icha tic:
6 Yujto xiv juntzan̈ anima tic dꞌa vin̈aj Rezín yedꞌ dꞌa vin̈ yuninal vin̈aj Remalías, tzin spatiquejel ebꞌ a in icha a aꞌ ay dꞌa Siloé vaji, aꞌ malalin̈ej sbꞌeyi.
7-8 A inxo ichato ol vacꞌcot chulnaj aꞌ nivan Éufrates tzꞌel dꞌa stitac smelemal dꞌa yibꞌan̈ ebꞌ, ol javoc sibꞌnaj aꞌ dꞌa Judá tic, ol bꞌudꞌjoquel masanil sat lum yuj aꞌ. Ol qꞌuecꞌoch sjulal aꞌ dꞌa sjaj ebꞌ anima tic. (Syalelcꞌochi aton vin̈ sreyal Asiria yedꞌ masanil soldado). Icha chiꞌ ol yutoc vin̈ smacanecꞌ lum a luum ach Emanuel, icha junoc nocꞌ nocꞌ tzꞌel jen̈an scꞌaxil, nivan smacaꞌ, icha chiꞌ ol yutoc lum a luum chiꞌ vin̈, xchi Jehová.
9 Ex nivac chon̈abꞌ, molbꞌejec e bꞌa tzex cot eyacꞌ oval, palta ol ex sateloc. Ex nivac chon̈abꞌ te najat ay, abꞌec val, nabꞌan̈ej tzeyicꞌcot eyamcꞌabꞌ yic oval, ol ex satjocn̈ejeloc.
10 Ol eyal-laj eyabꞌ tas ol e cꞌulej, palta man̈ ol schalaj sbꞌa eyalani. Ol och dꞌa stzolal tas ol e cꞌulej, palta man̈ ol elcꞌochoc, yujto a Dios ayn̈ej ecꞌ quedꞌoc.
An̈ej dꞌa Dios bꞌaj tzon̈ xivi
11 A Jehová yedꞌ val yip ix och yubꞌyubꞌ dꞌayin, ix yalani: Man̈ a bꞌeybꞌalej sbꞌeybꞌal juntzan̈ anima tic. 12 Man̈ a mol alej yedꞌ ebꞌ scꞌanan scolval junocxo mach. Man̈ a xibꞌtej a bꞌa yuj bꞌaj xiv ebꞌ anima tic. 13 A in Jehová in Yajal in dꞌa Smasanil, A inn̈ejocabꞌ dꞌa yol a sat, an̈ej dꞌayin tzach xivi. Ayocabꞌ velcꞌoch dꞌa yol a sat. 14 A in ol in och a cajnubꞌoc bꞌaj syal a colan a bꞌa. Palta a dꞌa ebꞌ aj Israel yedꞌ ebꞌ aj Judá, icha val qꞌuen qꞌueen bꞌaj sloc sbꞌa yoc ebꞌ anima, icha chiꞌ vaji. Yuj chiꞌ ol yamchajelta ebꞌ aj Jerusalén tic. 15 Tzijtum ebꞌ ol stenoch yoc, ol telvoc ebꞌ, ol cham ebꞌ, ol can ebꞌ dꞌa yaal, ol yamchaj ebꞌ, xchi Jehová dꞌayin.
Ix scꞌaybꞌej ebꞌ scꞌaybꞌum vin̈aj Isaías
16 Ex in cꞌaybꞌum, siqꞌueccan in cꞌaybꞌubꞌal tic dꞌa e pensar, malajocabꞌ bꞌaqꞌuin̈ sbꞌat satcꞌolal eyuuj.
17 Vachꞌchom scꞌubꞌejel sbꞌa Jehová dꞌayon̈ a on̈ yin̈tilal on̈ vin̈aj Jacob tic, palta svacꞌoch in cꞌol dꞌay, an̈ej ayoch yipoc in cꞌool.
18 A in tic yedꞌ ebꞌ vuninal ix yacꞌ Jehová, chꞌoxnabꞌil vaj yedꞌ ebꞌ dꞌa scal ebꞌ quetisraelal, yujto icha chiꞌ ix in yutej Jehová Yajal dꞌa Smasanil, aton cajanecꞌ dꞌa tzalan Sion.
19 Ol laj yal ebꞌ anima dꞌayex icha tic: Cꞌanbꞌejec e bꞌa dꞌa ebꞌ vin̈ syal yuuj yedꞌ dꞌa ebꞌ scꞌuman spixan ebꞌ chamnac, aton ebꞌ snumnoni yedꞌ ebꞌ sajsoni. ¿Tas yuj man̈oc dꞌa ebꞌ co diosal sco cꞌanbꞌej co bꞌa? ¿Tas yuj man̈oc dꞌa ebꞌ co chamnac sco cꞌanbꞌej co bꞌa yic scolvaj ebꞌ dꞌayon̈ pitzan on̈ tic? xcham ebꞌ.
20 Tzeyil val tas syal schecnabꞌil Dios yedꞌ scꞌaybꞌubꞌal. Tato a ebꞌ tzex cꞌaybꞌan max alan icha syal slolonel Dios chiꞌ, man̈ pensaril tas syal ebꞌ chiꞌ.
21 A ebꞌ anima tic, ol bꞌat tic ol bꞌat tic ebꞌ yuj vejel. Yuj val vejel chiꞌ, ol ovaj val ebꞌ. Ol bꞌuchvaj ebꞌ dꞌa sreyal yedꞌ dꞌa sDiosal. Olto qꞌue qꞌuelan ebꞌ dꞌa satchaan̈,
22 ol em qꞌuelan ebꞌ dꞌa sat luum, palta axon̈ej cuscꞌolal ol scha ebꞌ yedꞌ yaelal icha qꞌuicꞌalqꞌuinal. Ol can ebꞌ dꞌa scal qꞌuicꞌalqꞌuinal chiꞌ, man̈xo ol yal scolan sbꞌa ebꞌ.