Yaljubꞌal Yajalil juncꞌolal
9
Palta man̈ masaniloc tiempo ol can ebꞌ tzꞌixtaj chiꞌ dꞌa scal cuscꞌolal. Vachꞌchom emnaquil ix ajcan lum Galilea yuj Dios, palta ol icꞌjocxichaan̈ luum, aton lum ay dꞌa yol yic Zabulón yedꞌ dꞌa yol yic Neftalí, lum ay dꞌa stitac aꞌ Jordán yedꞌ dꞌa stitac aꞌ mar, lum ay dꞌa slacꞌanil lum yic ebꞌ man̈ israeloc.2 A ebꞌ anima cajan chiꞌ taꞌ, ayecꞌ ebꞌ dꞌa cal qꞌuicꞌalqꞌuinal, palta ol yil jun nivan saquilqꞌuinal ebꞌ. Ol cꞌoch copnaj jun saquilqꞌuinal dꞌa ebꞌ ay dꞌa cal qꞌuicꞌalqꞌuinal chiꞌ.
3 Mamin, a ach ix acꞌxi qꞌuibꞌ co bꞌisul dꞌa co chon̈abꞌ tic, ix acꞌanxipax co nivan tzalajcꞌolal. Tzon̈ tzalaj co masanil dꞌa ichan̈, icha tzon̈ tzalaji ayic sco molan sat cavbꞌen, icha stzalaj ebꞌ soldado ayic spojanecꞌ jantac bꞌeyumal syicꞌ ebꞌ dꞌa oval.
4 Yujto a ach ix a satel jun nación, aton jun icꞌannac on̈ bꞌat dꞌa chꞌoc nacional, aton bꞌaj ix acꞌjioch co yaelal. Ix a satel jun nación chiꞌ icha utej a satannaquel chon̈abꞌ Madián dꞌa pecaꞌ.
5 A xan̈abꞌ ebꞌ soldado scꞌan̈i ayic sbꞌat ebꞌ dꞌa oval yedꞌ spichul ebꞌ bꞌon̈bꞌil yuj chicꞌ, ol juljocbꞌat dꞌa cal cꞌacꞌ, ol tzꞌabꞌat smasanil.
6 Yujto ix alji jun vinac unin dꞌa co cal. A Dios ix acꞌan jun unin tic dꞌayon̈. A jun unin tic, ol acꞌchajoch yopisio yacꞌan Yajalil. Ol acꞌchajoch juntzan̈ bꞌi tic dꞌay: Acꞌum Razón te Jelan, Dios Syal Yuj Smasanil, Mamabꞌil Ayn̈ejecꞌ dꞌa Juneln̈ej, Yajalil Acꞌum Juncꞌolal.
7 Ol yacꞌ reyal sqꞌuexuloc vin̈aj rey David dꞌa yibꞌan̈ masanil lugar. Juncꞌolal ol yacꞌ yajalil dꞌa juneln̈ej. Ol yicꞌ val yip yajalil chiꞌ, ol schꞌolbꞌitan tas dꞌa stojolal yedꞌ dꞌa vachꞌil. A Jehová Yajal dꞌa Smasanil ol acꞌanelcꞌoch jun tic, yujto nabꞌilxo yuuj.
Yoval scꞌol Jehová dꞌa chon̈abꞌ Israel
8 Ix yal Jehová yuj yaelal ol javoc dꞌa yibꞌan̈ Israel, schon̈abꞌ vin̈aj Jacob.
9 Yuj chiꞌ masanil ebꞌ anima dꞌa yol yic Efraín masanto ebꞌ cajan dꞌa Samaria, ol nachajel yuj ebꞌ to a Jehová tzꞌacꞌancot juntzan̈ yaelal chiꞌ, palta yedꞌ yacꞌumtaquil ebꞌ yedꞌ spitalil ebꞌ, syalan ebꞌ icha tic:
10 Vachꞌchom tzꞌem lan̈naj co xan pat, ol co bꞌoxiqꞌue yedꞌ qꞌuen qꞌueen tzeybꞌil. Vachꞌchom schꞌacjiel teꞌ sicómoro sco cꞌan steꞌaloc co pat, palta axo pax teꞌ cꞌuteꞌ ol co cꞌan sqꞌuexuloc teꞌ, xchi ebꞌ.
11 A Jehová ol icꞌancot ebꞌ ajcꞌol yajoch dꞌa vin̈aj Rezín, yic syacꞌan oval ebꞌ dꞌa Israel.
12 A dꞌa stojolal bꞌaj sjavi cꞌu ol cot ebꞌ aj Siria, axo dꞌa stojolal bꞌaj tzꞌem cꞌu ol cot ebꞌ filisteo. Junxon̈ej ol aj satjiel Israel yuj ebꞌ. Vachꞌchom icha chiꞌ ol ajoc, palta manto ol ochlaj vaan yoval scꞌol Jehová, ol yacꞌn̈ejcot yaelal dꞌa schon̈abꞌ.
13 Palta axo ebꞌ schon̈abꞌ chiꞌ jun, max sna sbꞌa ebꞌ yalanxi sbꞌa dꞌa Dios, vachꞌchom ix acꞌjioch syaelal ebꞌ. Max yacꞌoch sbꞌa ebꞌ dꞌa yol scꞌabꞌ Jehová Yajal dꞌa Smasanil.
14 Yuj chiꞌ icha junoc nocꞌ nocꞌ xicjiel sn̈e yedꞌ sjolom yuj junoc mach, ma icha bꞌaj junn̈ej cꞌual schꞌacjiel teꞌ palma yedꞌ teꞌ aj, icha chiꞌ ol utaj ebꞌ israel chiꞌ yuj Jehová.
15 (A jun jolom chiꞌ, aton ebꞌ yichamtac vinaquil chon̈abꞌ yedꞌ ebꞌ yajal yaji. Axo jun n̈e chiꞌ, aton ebꞌ syaloch sbꞌa schecabꞌoc Dios, palta an̈ej es syacꞌ cꞌaybꞌaj ebꞌ.)
16 A ebꞌ yajal yaji, ton̈ej tzꞌacꞌji musansatil ebꞌ anima yuj ebꞌ, axo ebꞌ tzꞌoch tzacꞌan yuj ebꞌ chiꞌ ton̈ej satbꞌat ebꞌ.
17 Yuj chiꞌ man̈xo ol ocꞌ scꞌol Jehová dꞌa ebꞌ quelemtac vinac, dꞌa ebꞌ unin man̈xa smam yedꞌ dꞌa ebꞌ ix ix chamnac yetbꞌeyum, yujto a ebꞌ anima tic, juneln̈ej ix te chucbꞌi ebꞌ, axon̈ej chucal lolonel syal ebꞌ smasanil. Yuj chiꞌ manto ol ochlaj vaan yoval scꞌol Jehová, ol yacꞌn̈ejcot yaelal dꞌa schon̈abꞌ.
18 A schucal ebꞌ anima chiꞌ, nivan tas tzꞌixtax yuuj, icha val yic tzꞌel cꞌacꞌ a stzꞌabꞌat teꞌ qꞌuiix yedꞌ vayumtac, stzꞌapaxbꞌat nivac yax luum yuuj, syoyan sbꞌa chacxuxum icꞌ dꞌa scal stabꞌil sqꞌue chiꞌ.
19 Yuj val yoval scꞌol Jehová Yajal dꞌa Smasanil, van slajviel schon̈abꞌ yedꞌ ebꞌ anima, icha tzꞌaj slajviel junoc chon̈abꞌ yuj teꞌ cꞌacꞌ. Man̈xo ol ecꞌlaj syaelal ebꞌ anima dꞌay junjun.
20 Yalxon̈ej tas jabꞌoc ol ilchaj yuj ebꞌ, ol yabꞌlanbꞌat ebꞌ, palta man̈ ol ecꞌlaj svejel ebꞌ, man̈ ol bꞌudꞌjoclaj ebꞌ. Yuj chiꞌ ol laj schibꞌat yuninal ebꞌ yuj vejel.
21 A ebꞌ yin̈tilal Manasés, ol yacꞌ oval ebꞌ yedꞌ ebꞌ yic Efraín. Ol spacanpax sbꞌa ebꞌ yic Efraín chiꞌ. Axo ol ajoc, ol yacꞌ oval ebꞌ scha macan̈il yedꞌ ebꞌ aj Judá. Vachꞌchom icha chiꞌ ol aj ebꞌ, palta manto ol ochlaj vaan yoval scꞌol Jehová, ol yacꞌn̈ejcot yaelal dꞌa schon̈abꞌ.