10
Obꞌiltac ex tze bꞌo juntzan̈ ley man̈ tojoloc, tzꞌixtax ebꞌ anima yuuj.2 Max eyal syaelal ebꞌ mebꞌatac anima tzꞌixtaj dꞌa scal in chon̈abꞌ. Malaj yelcꞌoch jabꞌoc ebꞌ dꞌa yol e sat. Tzeyelqꞌuej tastac ay dꞌa ebꞌ ix chamnac yetbꞌeyum yedꞌ dꞌa ebꞌ unin man̈xa smam.
3 ¿Tas val ol eyutej e bꞌa ayic ol javoc eyaelal, ayic ol eyilan scot yaelal chiꞌ dꞌa najat? ¿Mach bꞌaj ol e cꞌan colval? ¿Bꞌajtil ol eyacꞌcan e bꞌeyumal?
4 A mach dꞌa e cal man̈ ol icꞌjocbꞌat dꞌa chꞌoc nacional, ol miljoccham yedꞌ ebꞌ chamnacxo. Vachꞌchom icha chiꞌ ol ex ajoc, palta manto ol ecꞌ yoval scꞌol Jehová. Ol yacꞌn̈ejoch eyaelal chiꞌ.
A ebꞌ aj Asiria ix yamcꞌabꞌaj yuj Dios
5 Ix yalan Jehová icha tic: Obꞌiltac vin̈ sreyal Asiria. A ticnaic van vacꞌlabꞌan vin̈ icha junoc teꞌ cꞌococh svacꞌlabꞌej yedꞌ yoval in cꞌool yic svacꞌanoch eyaelal.
6 A ex malaj jabꞌoc velcꞌoch dꞌayex, tze tzuntzejpaxcot yoval in cꞌool, a vin̈ tzin checbꞌat dꞌayex. Tzin checbꞌat jun vin̈ rey chiꞌ, yic vachꞌ syelqꞌuejbꞌat masanil e bꞌeyumal vin̈, tzex stecꞌancanem vin̈ icha lum socꞌom dꞌa yoltac bꞌe.
7 Palta man̈ocn̈ej chiꞌ nabꞌil yuj vin̈ sreyal Asiria chiꞌ, nabꞌil pax yuj vin̈ to tzijtum nación ol satel vin̈.
8 Syalan vin̈ icha tic: Masanil ebꞌ yajal in soldado, icha rey yaj ebꞌ, a in svacꞌ mandar ebꞌ.
9 Lajan ix vutej chon̈abꞌ Calno yedꞌ chon̈abꞌ Carquemis. Icha ix vutej Hamat, icha pax chiꞌ ix vutej chon̈abꞌ Arfad. Axo Samaria lajan ix ajcan yedꞌ Damasco.
10 Ix viquejcan juntzan̈ nación tzijtum sdiosal. A val sdiosal ebꞌ chiꞌ, ecꞌto yipal dꞌa yichan̈ sdiosal ebꞌ aj Jerusalén yedꞌ ebꞌ aj Samaria.
11 Yuj chiꞌ jun, a val tas ix in cꞌulej dꞌa Samaria chiꞌ yedꞌ dꞌa sdiosal, ¿tom man̈ ol tzacꞌvanpax in cꞌulan dꞌa Jerusalén yedꞌ sdiosal? xchi vin̈, xchi Jehová.
12 Ayic ol lajvoc syamcꞌabꞌaj vin̈ sreyal Asiria chiꞌ yuj Jehová yuj scꞌulan tas nabꞌil yuj dꞌa tzalan Sion yedꞌ dꞌa Jerusalén, ichato chiꞌ bꞌian, ol yacꞌanxioch yaelal Jehová dꞌa yibꞌan̈ vin̈ yuj masanil tas ix scꞌulej yuj yacꞌumtaquil, yujto nivac vinac ix yutej sbꞌa vin̈.
13 Ix yal vin̈ sreyal Asiria chiꞌ icha tic: Yuj val sjelanil in pensar ix elcꞌoch juntzan̈ ix in cꞌulej tic, ix nachaj val in cꞌulani. Ix techaj in qꞌuexan smojonal juntzan̈xo chon̈abꞌ, ix vicꞌancanecꞌ masanil tastac ay dꞌay. Ix techajpax in tecꞌancanem ebꞌ rey chiꞌ yedꞌ vipal.
14 Icha val quicꞌanqꞌueta sn̈olobꞌ nocꞌ much dꞌa yol soꞌ ayic malaj nocꞌ snun chiꞌ ayeqꞌui, icha chiꞌ ix vutej vicꞌanecꞌ sbꞌeyumal juntzan̈ nación chiꞌ. Ix vicꞌanpaxcanecꞌ slum ebꞌ, man̈xalaj bꞌaj ix yal yalan sbꞌa ebꞌ. Malaj tas ix yal ebꞌ, ton̈ej ix och qꞌuelan ebꞌ, xchi vin̈.
15 Palta naec nabꞌi, ¿tocval nivan yelcꞌoch qꞌuen chꞌacabꞌ yedꞌ qꞌuen serrucho dꞌa yichan̈ mach scꞌanani? A junoc cꞌococh nabꞌa teꞌ, ¿tom a teꞌ ol acꞌan ibꞌxoc junoc anima scꞌanan chiꞌ?
16 Yuj val chiꞌ, a Jehová Yajal dꞌa Smasanil, aꞌ ol acꞌancot junoc yabꞌil te ov, axo ol icꞌanel yip ebꞌ vin̈ soldado te tecꞌan ayoch yipoc scꞌol vin̈ sreyal Asiria chiꞌ, ol satel yacꞌumtaquil vin̈ icha stzꞌabꞌat junoc tas yuj teꞌ cꞌacꞌ.
17 A Dios Axon̈ej Ochi, saquilqꞌuinal yaj dꞌa Israel, junn̈ej cꞌual ol satel ebꞌ aj Asiria yuuj, icha tzꞌaj stzꞌaem teꞌ qꞌuiix yuj teꞌ cꞌacꞌ.
18 Ol satel masanil ebꞌ nivac vinac, icha tzꞌaj satel teꞌ nivac teꞌ yedꞌ teꞌ avbꞌen teꞌ vachꞌ yilji schꞌacchajemi. Icha junoc mach yaꞌay to man̈xa yip, icha chiꞌ ol ajcan Asiria chiꞌ.
19 Jayvan̈xon̈ej ebꞌ soldado olto canoc, icha tzꞌajcan jayeocxo te teꞌ max chꞌacjieli, vachꞌchom junoc unin ol yal sbꞌisan ebꞌ.
20 A dꞌa jun tiempoal dꞌa bꞌaqꞌuin̈, a jayvan̈xo ebꞌ israel yin̈tilal vin̈aj Jacob ol colchajcanoc, man̈xo ol yacꞌoch jun chon̈abꞌ ebꞌ yipoc scꞌool, aton jun ijan ix satanel ebꞌ, palta a Jehová sDiosal ebꞌ ol yacꞌoch yipoc scꞌool, aton Dios Axon̈ej Ochi.
21 Ay jayvan̈ ebꞌ yin̈tilal vin̈aj Jacob ol meltzajxioch spensar dꞌa Dios te ay yip.
22 Vachꞌchom a ebꞌ israel, te nivan sbꞌisul ebꞌ icha yarenail stiꞌ aꞌ mar, palta jayvan̈xon̈ej ebꞌ ol meltzaj dꞌa schon̈abꞌ. Nabꞌilxo yuj Dios to ol satel ebꞌ icha val dꞌa stojolal.
23 A Jehová Yajal dꞌa Smasanil ol satanel masanil anima dꞌa yol smacbꞌen tic, icha ajnac yalani.
24 Palta aꞌ tzꞌalan icha tic: Ex in chon̈abꞌ cajan dꞌa Sion, vachꞌchom ol ex smacꞌ ebꞌ aj Asiria dꞌa teꞌ jixcꞌabꞌ teꞌ, mato yedꞌ scꞌococh ebꞌ, icha yutejnac ex ebꞌ aj Egipto, palta man̈ ex xiv dꞌa ebꞌ,
25 yujto yic val jayeꞌ cꞌual tic ol tupem yoval in cꞌol dꞌayex. Ol in satel ebꞌ aj Asiria chiꞌ yedꞌ yoval in cꞌool.
26 A in Jehová Yajal in dꞌa Smasanil, ol vacꞌoch yaelal dꞌa yibꞌan̈ ebꞌ, icha ajnac in satanel chon̈abꞌ Madián dꞌa slacꞌanil qꞌuen tenam yic Oreb, icha ajnac in chꞌoxan in poder ayic in pojannac snan̈al aꞌ Chacchac Mar dꞌa Egipto.
27 A dꞌa jun tiempoal chiꞌ, ol viqꞌuel icatz ayoch dꞌa eyibꞌan̈ yuj ebꞌ aj Asiria chiꞌ, icha tzꞌaj scan̈chajel teꞌ yugo ayoch dꞌa yibꞌ sjaj nocꞌ vacax.
Scot ebꞌ aj Asiria
28 A ebꞌ ajcꞌol chiꞌ, aton ebꞌ aj Asiria, van sjavi ebꞌ dꞌa Rimón yedꞌ dꞌa Ajat, van yecꞌ ebꞌ dꞌa Migrón. A dꞌa Micmas scan yicatz ebꞌ.*
29 Ix cꞌaxpajecꞌ ebꞌ dꞌa jun nivan chꞌolan, ix sbꞌoanqꞌue scampamento ebꞌ dꞌa Geba. Axo ebꞌ aj Ramá, ix xivcan ebꞌ. A ebꞌ aj Gabaa schon̈abꞌ vin̈aj Saúl, van sbꞌat ebꞌ elelal.
30 Ex cajan ex dꞌa Galim, elocabꞌ eyav. Abꞌec yel av chiꞌ ex aj Lais. Obꞌiltac ex ex aj Anatot.
31 Van sbꞌat ebꞌ aj Madmena elelal. A ebꞌ cajan dꞌa Gebim van bꞌat scꞌubꞌanpaxel sbꞌa ebꞌ.
32 A ticnaic ol ecꞌ acꞌval yuj ebꞌ soldado chiꞌ dꞌa Nob. Smuchꞌ scꞌabꞌ ebꞌ, syicꞌanchaan̈ ebꞌ, schꞌoxancot ebꞌ to ol yacꞌ ganar tzalan Sion tic ebꞌ, aton chon̈abꞌ Jerusalén.
33 Ilec val, a Jehová Yajal dꞌa Smasanil ol satanel ebꞌ ayoch ajcꞌolal dꞌay icha tzꞌaj schꞌacjiel te teꞌ dꞌa Líbano. Ayxo smay scꞌan̈ yem teꞌ. Aton te teꞌ chaan̈ steel, vachꞌ yilji, stelvi dꞌa sat luum.
34 Icha chiꞌ ol aj satjiel ebꞌ ajcꞌol chiꞌ, icha tzꞌaj schꞌacjiel te teꞌ bꞌaj te cꞌayum, aton te teꞌ vachꞌ yilji dꞌa Líbano chiꞌ.