A yopisio vin̈ Mesías
11
Icha val svolan junoc te yibꞌ teꞌ, icha chiꞌ ol aj spitzvichaan̈ jun yin̈tilal vin̈aj Isaí.2 Ol ochn̈ej Yespíritu Jehová yedꞌoc. Aꞌ ol acꞌan sjelanil yedꞌ yaj pensaril. Yuj Yespíritu chiꞌ, ol nachajel yacꞌan razón, ay pax yipal. Ol yojtaquejel Jehová, ol icꞌjocpaxchaan̈ yuuj.
3 Ol scꞌanabꞌajej Jehová chiꞌ dꞌa tzalajcꞌolal.
Man̈ ol schꞌolbꞌitej ebꞌ anima dꞌa ichn̈ejtaꞌ, ma yuj tas syabꞌ dꞌa spatic ebꞌ.
4 Dꞌa stojolal ol sbꞌo yaj yoval ebꞌ mebꞌaꞌ yedꞌ ebꞌ anima emnaquil syutej sbꞌa. Ton̈ej ol yalaꞌ ol acꞌjoc syaelal ebꞌ tzꞌecꞌ dꞌa yibꞌan̈, ol acꞌjococh ebꞌ scꞌulan chucal chiꞌ dꞌa yol scꞌabꞌ chamel.
5 A tas tojol yedꞌ tas yel, a chiꞌ ol checlaj dꞌay.
6 A dꞌa jun tiempoal chiꞌ, a nocꞌ oques yedꞌ nocꞌ yunetac calnel, juncꞌolal ol aj nocꞌ. A nocꞌ tigre yedꞌ nocꞌ chiva, junn̈ej ol em cutzan nocꞌ. A nocꞌ quelem vacax yedꞌ nocꞌ choj, junn̈ej ol qꞌuibꞌ nocꞌ. Axo junoc unin ol tan̈van nocꞌ.
7 A nocꞌ nun vacax yedꞌ nocꞌ nun oso, junn̈ej ol aj nocꞌ. Axo yuneꞌ nocꞌ, junn̈ej ol em cutzan. A nocꞌ choj, a an̈ an̈cꞌultac ol scꞌux nocꞌ icha nocꞌ vacax.
8 A ebꞌ nenetac unin, ol tajnoc ebꞌ bꞌaj ay yolanil nocꞌ chan. Ol sn̈aloch scꞌabꞌ ebꞌ dꞌa yolanil nocꞌ ajavchan, palta man̈ ol chijoclaj ebꞌ yuj nocꞌ.
9 Man̈xa chucal ol ujoc dꞌa jun tzalan sicꞌbꞌilel yuj Jehová. Icha tzꞌaj sbꞌudꞌjiel aꞌ mar yuj a aꞌ, icha val chiꞌ ol aj yojtacajel Jehová yuj masanil anima dꞌa yolyibꞌan̈qꞌuinal tic, masanil ebꞌ ol ojtacanel Jehová chiꞌ.
10 A dꞌa jun tiempoal chiꞌ, ol checlaj jun rey dꞌa scal yin̈tilal vin̈aj Isaí. Chequel ol ajqꞌue dꞌa scal juntzan̈ nación yic ol smolbꞌej sbꞌa ebꞌ bꞌaj ayecꞌ chiꞌ. Te nivan ol aj yelcꞌoch jun lugar bꞌaj ol aj chiꞌ.
Ol meltzaj ebꞌ icꞌbꞌilbꞌat dꞌa chꞌoc nacional
11 A dꞌa jun tiempoal chiꞌ, ol schꞌox spoder Jehová junelxo, yuj chiꞌ ol smolbꞌejcot masanil ebꞌ schon̈abꞌ sacleminac yajcanbꞌati. Ol cot ebꞌ aytocan dꞌa Asiria, dꞌa Egipto, dꞌa Patros, dꞌa Etiopía, dꞌa Elam, dꞌa Sinar, dꞌa Hamat yedꞌ dꞌa juntzan̈xo chon̈abꞌ ay dꞌa stitac aꞌ mar.
12 A Dios ol chꞌoxanqꞌue junoc yechel dꞌa scal juntzan̈ nación, yic ol smolbꞌej sbꞌa ebꞌ israel sacleminac yajcanbꞌati. An̈ejtonaꞌ ol smolbꞌejxi sbꞌa ebꞌ aj Judá sacleminac yajcanbꞌat bꞌaj slajvicꞌoch yolyibꞌan̈qꞌuinal tic.
13 Ol lajvoc chichoncꞌolal dꞌa scal Efraín yedꞌ Judá, man̈xo ol yacꞌ oval ebꞌ.
14 Axo ebꞌ scha macan̈il, junn̈ej ol bꞌat ebꞌ yacꞌ oval dꞌa ebꞌ filisteo dꞌa stojolal bꞌaj tzꞌem cꞌu. Ol yacꞌan ganar ebꞌ. Junn̈ej ol aj yicꞌanecꞌ sbꞌeyumal ebꞌ cajan dꞌa stojolal bꞌaj sjavi cꞌu ebꞌ, aton Edom, Moab yedꞌ pax ebꞌ amonita, yujto ol can ebꞌ dꞌa yol scꞌabꞌ ebꞌ.
15 A Jehová ol acꞌan tup jun scꞌabꞌ aꞌ Chacchac Mar. Ol yacꞌanpaxcot jun oval icꞌ te cꞌacꞌ dꞌa yibꞌan̈ aꞌ Éufrates, ol tup aꞌ. Uqueꞌ macan̈ ol ajcan aꞌ, yuj chiꞌ man̈xo ol yiqꞌuel xan̈abꞌ ebꞌ anima ayic ol ecꞌ ebꞌ dꞌa yol aꞌ.
16 Ayic ol meltzajxoc ebꞌ schon̈abꞌ Jehová aycan dꞌa Asiria, jacanxo jun nivan bꞌe bꞌaj ol ecꞌta ebꞌ, icha ajnac bꞌe bꞌaj cotnac ebꞌ chon̈abꞌ israel elnac dꞌa Egipto.