A Jehová ol acꞌan yajalil dꞌa slajvubꞌ cꞌual
(Is 2.2-4)
4
A dꞌa slajvubꞌ cꞌual, a jun tzalan bꞌaj ay stemplo Jehová, nivan ol aj yelcꞌochi. A jun vitz chiꞌ, te chaan̈ ol aj steel dꞌa yichan̈ juntzan̈xo vitz. Ol javoc masanil juntzan̈xo nación dꞌay.2 Man̈ jantacoc sbꞌisul ebꞌ anima dꞌa junjun nación ol laj alan dꞌay junjun icha tic: Cotan̈ec, con̈ qꞌueec dꞌa jolom vitz bꞌaj ay stemplo Jehová sDiosal vin̈aj Jacob yic tzon̈ scꞌaybꞌej dꞌa sbꞌeybꞌal, yic ol co bꞌeybꞌalej sbꞌeybꞌal chiꞌ, xcham ebꞌ. Yujto a dꞌa Sion, aton Jerusalén ol elta scꞌaybꞌubꞌal Jehová, aton schecnabꞌil.
3 A Jehová ol chꞌolbꞌitan yaj masanil nación. Aꞌ ol alan tas ol laj aj juntzan̈ nación chiꞌ, vachꞌchom najat ay. Yuj chiꞌ ol sbꞌo qꞌuen yespada ebꞌ dꞌa asaronal. Axo qꞌuen slanza ebꞌ ol sbꞌo dꞌa jochlabꞌ trigoal. Malaj junoc nación ol acꞌan oval yedꞌ junocxo. Man̈xalaj mach ol cꞌay dꞌa acꞌoj oval.
4 A ebꞌ anima, man̈xalaj bꞌaj ol xiv ebꞌ. Junjun mach ol yal yicꞌan yip dꞌa yalan̈ yen̈ul scꞌabꞌ teꞌ yuva yedꞌ dꞌa yalan̈ yen̈ul scꞌabꞌ teꞌ yigo. A Jehová Yajal dꞌa Smasanil syacꞌ stiꞌ dꞌa jun tic.
5 Junjun nación scꞌanabꞌajan sdiosal yalani, an̈ejtonaꞌ a on̈ tic, ol co cꞌanabꞌajej Jehová co Diosal dꞌa masanil tiempo.
Ol scolel schon̈abꞌ Jehová
6-7 A Jehová tzꞌalan icha tic: A dꞌa jun cꞌual chiꞌ, ol in molbꞌej in chon̈abꞌ, aton ebꞌ toxo ix yabꞌ syail vuj dꞌa chꞌoc chon̈abꞌil, ebꞌ coxo, ebꞌ cꞌumbꞌinac, ebꞌ sacleminac yaji yedꞌ juntzan̈ ebꞌ pitzanto ixto cani. Ol in bꞌoxi snación ebꞌ chiꞌ, te nivan ol ajxoc yelcꞌochi. A in Jehová in ol vacꞌ yajalil dꞌa yibꞌan̈ in chon̈abꞌ chiꞌ dꞌa tzalan Sion dꞌa masanil qꞌuinal.
8 Ato dꞌa tzalan Sion yic Jerusalén ol in tan̈vej in chon̈abꞌ icha junoc tan̈vum calnel. Axo Jerusalén tic, ol yacꞌxi yajalil dꞌa smacbꞌen bꞌaj yacꞌnac yajalil dꞌa pecaꞌ, xchi Jehová.
9 A ticnaic ex aj Jerusalén, ¿tas yuj tzꞌel eyav icha junoc ix ix ayic scꞌoch scꞌual yalji yuneꞌ? ¿Tom malaj junoc rey bꞌaj ayex tic? ¿Tom man̈xa junoc ebꞌ acꞌum razón dꞌa e cal?
10 Ex aj chon̈abꞌ Sion, abꞌec syail, elocabꞌ eyav yuj yaelal, icha val syaelal syabꞌ junoc ix ix ayic tzꞌalji yuneꞌ, yujto ol ex el dꞌa yol e chon̈abꞌ tic. Ol bꞌat ex cajnajcan dꞌa caltac teꞌ. Vachꞌchom ol ex cꞌochn̈ej masanto dꞌa Babilonia, palta ato taꞌ ol ex coljoquel yuj Jehová dꞌa yol scꞌabꞌ ebꞌ eyajcꞌool.
11 A ticnaic, tzijtum nación van sqꞌue vaan ajcꞌolal dꞌa e patic, syalan ebꞌ icha tic: Ol cacꞌ val co gana quilan tas ol aj yixtaxbꞌat Sion tic, xchi ebꞌ.
12 Palta a juntzan̈ nación chiꞌ, man̈ yojtacoc ebꞌ tas nabꞌil yuj Jehová. Man̈ yojtacoc ebꞌ tato ol molchajqꞌue ebꞌ yuuj icha smolchajbꞌat ixim trigo bꞌaj stecꞌchaji.
13 Ex aj Sion, qꞌuean̈ec vaan, teqꞌuequem juntzan̈ nación chiꞌ, yujto syal Jehová icha tic: A in ol vacꞌ eyip e tecꞌanem juntzan̈ nación chiꞌ, icha junoc mam vacax hierro schꞌaac, axo yech stecꞌvi trigo nabꞌa bronce. Ol eyiqꞌuecꞌ sbꞌeyumal juntzan̈ nación chiꞌ, yujto man̈oc dꞌa stojolal ix ilchaj yuj ebꞌ, ol eyacꞌan dꞌayin a in ton Yajal in dꞌa masanil yolyibꞌan̈qꞌuinal, xchi Jehová.