Ol acꞌjoc jun Sreyal Israel yuj Jehová
5
Ex aj Sion, bꞌoecoch smuroal bꞌaj tze col e bꞌa, yujto ix javi oyan ebꞌ ajcꞌol dꞌa e patic. Ol smacꞌ spacꞌultac stiꞌ vin̈ yajalil Israel ebꞌ yedꞌ teꞌ jixcꞌabꞌ teꞌ.2 A Jehová tzꞌalan icha tic: A chon̈abꞌ Belén ay dꞌa Efrata, vachꞌchom yunen̈ej dꞌa scal chon̈abꞌ dꞌa yol yic Judá, palta ataꞌ ol cot jun ol vacꞌoch yajalil dꞌa yibꞌan̈ in chon̈abꞌ Israel. Ol cot dꞌa jun in̈tilal aytaxon dꞌa pecaꞌ, a jun ol acꞌan yajalil chiꞌ, aytaxon yictax yichbꞌanil, xchi Jehová.
3 Axo ticnaic, ol yactejcan schon̈abꞌ Jehová dꞌa yol scꞌabꞌ ebꞌ ajcꞌool, masanto ol aljoc jun yuneꞌ ix ix van stan̈van yalji chiꞌ. Ichato chiꞌ ol meltzaj ebꞌ scꞌabꞌ yoc jun Yajal icꞌbꞌilcanbꞌat dꞌa chꞌoc chon̈abꞌil chiꞌ, ol smolbꞌanxi sbꞌa ebꞌ yedꞌ ebꞌ yetchon̈abꞌ.
4 A jun Rey chiꞌ, ol qꞌue vaan yedꞌ spoder yedꞌ yopisio acꞌbꞌil yuj Jehová yic stan̈vej schon̈abꞌ, yic tzꞌaj ebꞌ dꞌa juncꞌolal, yujto a jun Rey chiꞌ, nivan ol aj yelcꞌoch dꞌa scal masanil nación bꞌaj slajvicꞌoch yolyibꞌan̈qꞌuinal tic.
5 A jun Rey chiꞌ ol icꞌancot juncꞌolal. Ayic ol javoc ebꞌ aj Asiria dꞌa yol co nación tic, yic tzꞌoch ebꞌ dꞌa yoltac co cuartel, ol co checbꞌat ucvan̈ vajxacvan̈oc ebꞌ yajal nivac yelcꞌochi, yic syacꞌ oval ebꞌ yedꞌ ebꞌ aj Asiria chiꞌ.
6 A ebꞌ chiꞌ yedꞌ qꞌuen yespada ebꞌ ol yacꞌ ganar ebꞌ aj Asiria chiꞌ, aton snación vin̈aj Nimrod. Ol on̈ colchaj yuj jun cajalil dꞌa ebꞌ aj Asiria chiꞌ, ayic ol cꞌaxpajecꞌta ebꞌ dꞌa co mojon yic syicꞌanecꞌ lum co luum ebꞌ yalani.
7 A dꞌa jun tiempoal chiꞌ, a ebꞌ yin̈tilal vin̈aj Jacob ixto cani, yuj ebꞌ ol ja vachꞌilal dꞌa scal juntzan̈ nación, icha tzꞌaj yacꞌan yaxilal yal acꞌval, ma yaxn̈abꞌ dꞌa yibꞌan̈ an̈ an̈cꞌultac syacꞌcot Jehová, man̈oc ebꞌ anima tzꞌacꞌancoti.
8 A ebꞌ yin̈tilal vin̈aj Jacob olto can chiꞌ, lajan ol aj ebꞌ dꞌa scal juntzan̈ nación icha junoc nocꞌ choj ay dꞌa scal nocꞌ cꞌultaquil nocꞌ, ma icha junoc nocꞌ choj tzꞌoch dꞌa scal junoc n̈ilan̈ nocꞌ calnel. Ayic tzꞌoch nocꞌ dꞌa scal nocꞌ calnel chiꞌ, syamancot nocꞌ scotac tzilchitanbꞌat nocꞌ. Man̈xa junoc mach syal scolanel nocꞌ.
9 Ex yin̈tilal vin̈aj Jacob, icha chiꞌ ol aj eyacꞌan ganar ebꞌ eyajcꞌool, ol e satanel ebꞌ.
10 Ex vetisraelal, a Jehová tzꞌalan icha tic dꞌayex: A dꞌa jun cꞌual chiꞌ, ol in macꞌcham nocꞌ e chej, ol in satanel e carruaje yic oval.
11 A e chon̈abꞌ ayoch smuroal yedꞌ e cuartel ol in satel dꞌa juneln̈ej.
12 Ol in satanel ebꞌ ajbꞌaal dꞌa e cal. Man̈xo junoc ebꞌ ajchum ol vacꞌcan dꞌa e cal chiꞌ.
13 Ol in satel juntzan̈ e comon dios yedꞌ qꞌuen qꞌueen bꞌaj tzex lesalvi, yic man̈xo ol ex och ejmelal dꞌa juntzan̈ tas tze bꞌo e diosaloc chiꞌ.
14 Ol in tocꞌqꞌueta masanil te teꞌ bꞌaj tzex och ejmelal, ol in satanel e chon̈abꞌ bꞌaj tzeyacꞌ e silabꞌ dꞌa juntzan̈ comon dios.
15 Yedꞌ val yoval in cꞌool ol in pactzitej dꞌa juntzan̈ nación max in cꞌanabꞌajan jabꞌoc, xchi Jehová.