Syacꞌ yovalil Dios tas chuc scꞌulej Israel
6
Ex vetisraelal, scham val eyabꞌan tas schec Jehová valaꞌ.Mamin Jehová, yamoch alan smul chon̈abꞌ Israel dꞌa yichan̈ lum jolomtac vitz, yabꞌocabꞌ a jaj lum tzalquixtac.
2 Yabꞌocabꞌ lum jolomtac vitz yedꞌ yich lum luum to ol al smul a chon̈abꞌ Israel, ol acꞌan oval yedꞌoc.
3 Ex vetisraelal, scham val eyabꞌan tas syal Jehová. Aꞌ tzꞌalan icha tic: Tacꞌvan̈ec dꞌayin ex in chon̈abꞌ. ¿Tas ix aj ex vixtani, ma tas ix ex vutej?
4 Ina a in vicꞌnaquelta ebꞌ e mam eyicham dꞌa Egipto. In colannac ebꞌ bꞌaj ayoch checabꞌvumal chiꞌ. A in in checnacbꞌat vin̈aj Moisés, vin̈aj Aarón yedꞌ ix María, aton ebꞌ cuchbꞌannac ebꞌ.
5 Ex in chon̈abꞌ, naeccoti tas chucal snanac vin̈aj Balac sreyal Moab dꞌa yibꞌan̈ ebꞌ e mam eyicham chiꞌ. Naecpaxcoti tas yutejnac vin̈aj Balaam yuninal vin̈aj Beor spacani. Naecpaxcoti tas ujinac dꞌa scal Sitim yedꞌ Gilgal. Tze naanpaxcoti tastac vutejnac ex in colani, xchi Jehová.
A tas snibꞌej Jehová dꞌa ebꞌ schon̈abꞌ
6 Scꞌanbꞌej ebꞌ israel icha tic: ¿Tas ol cacꞌ dꞌa Jehová Dios Axon̈ej Ochi, ayic ol on̈ och ejmelal dꞌay? ¿Ol am on̈ och dꞌa yichan̈ yedꞌ nocꞌ calnel jun abꞌil sqꞌuinal yic sco n̈ustzꞌa nocꞌ silabꞌil?
7 ¿Ol am tzalajbꞌoc scꞌol Jehová, tato scacꞌ junoc mil nocꞌ chꞌac calnel silabꞌil dꞌay yedꞌ lajun̈eoc mil chꞌubꞌ aceite? ¿Tom stzalaj pax scꞌol tato scacꞌ co bꞌabꞌel unin dꞌay silabꞌil yuj co chucal? xchi ebꞌ.
8 Ex vetchon̈abꞌ, toxo ix yal Jehová tas vachꞌ dꞌa sat yedꞌ tas snibꞌej dꞌayon̈, aton juntzan̈ tic: Tojol scutej co bꞌa, sco xajanej ebꞌ quetanimail. Emnaquilal scutej co bꞌa dꞌa co Diosal.
9 A Jehová tzꞌalan dꞌa schon̈abꞌ icha tic: A mach dꞌa emnaquilal scham yabꞌan tas valaꞌ, te ay pensar. Jaocabꞌ e pensar yuj eyaelal, ayocabꞌ velcꞌoch dꞌa yol e sat, a inton svacꞌoch eyaelal chiꞌ.
10 ¿Tom ol bꞌat satcꞌolal vuuj tas molanecꞌ dꞌa spat ebꞌ chuc, aton bꞌeyumal ix yicꞌ ebꞌ dꞌa chucalil yedꞌ pax juntzan̈ echlabꞌ man̈ tzꞌacanoc yajbꞌil vuuj?
11 ¿Tas ol aj vacꞌan nivancꞌolal dꞌa yibꞌan̈ juntzan̈ anima tic, yujto a echlabꞌ man̈ tzꞌacanoc scꞌan ebꞌ?
12 A juntzan̈ ebꞌ bꞌeyum dꞌa scal chon̈abꞌ tic, elcꞌum ebꞌ, ixtum anima ebꞌ, esalvumn̈ej ebꞌ smasanil.
13 Yuj chiꞌ ol vacꞌoch eyaelal. Ol ex in satel yuj e mul.
14 Ol ex vaoc, palta man̈ ol ex bꞌudꞌjoclaj, ol ochn̈ej e vejel. Man̈ jantacoc sat eyavbꞌen ol e molbꞌej, palta man̈ ol eyil-laj bꞌaj ol cꞌochoc. Tato ay bꞌaj ol ilchaj jabꞌoc tas eyuuj, axo dꞌa scal oval ol vacꞌ lajvoquel dꞌayex.
15 Ol ex avvoc, palta malaj jabꞌoc tas ol eyicꞌaꞌ. Ol e teqꞌuel yal sat teꞌ eyolivo, palta man̈oc exlaj ol e cꞌan jabꞌoc yaceiteal teꞌ. Ol e teqꞌuel yal sat teꞌ eyuva, palta man̈oc exlaj ol eyucꞌ svinoal.
16 Yujto a schucal bꞌeybꞌal vin̈aj Omri tze cꞌanabꞌajej. A schucal bꞌeybꞌal vin̈aj Acab tze bꞌeybꞌalej. Yuj chiꞌ ol vacꞌbꞌat yaelal yedꞌ bꞌuchval lolonel dꞌa eyibꞌan̈. Icha chiꞌ ol aj e qꞌuixvi dꞌa yichan̈ ebꞌ in chon̈abꞌ tzin cꞌanabꞌajan dꞌa val yel, xchi Jehová.