A schucal chon̈abꞌ Israel
7
Yuj chiꞌ, ix valanxi icha tic: Ay... Obꞌiltac in. Lajan in icha ebꞌ tzꞌecꞌ sayoj sat uva, ma sayoj sat higo yic sloꞌo ayic toxo ix lajviecꞌ sat avbꞌen. Man̈xalaj junoc teꞌ sat nibꞌabꞌil tzꞌilchaji.2 Icha chiꞌ vaji, yujto man̈xa junoc anima vachꞌ, ma tojol spensar dꞌa yichan̈ Dios tzꞌilchaj vuuj. Axon̈ej macꞌojcham anima scꞌulej ebꞌ. Syacꞌlajem syaalil ebꞌ junjun.
3 Cuchbꞌum ebꞌ dꞌa ebꞌ scꞌulan chucal. A ebꞌ yajal yedꞌ ebꞌ juez, scꞌan tumin ebꞌ dꞌa elcꞌaltac dꞌa ebꞌ tzꞌoch smul dꞌa yetanimail. A ebꞌ nivac yelcꞌochi, a tas sja dꞌa spensar ebꞌ, a chiꞌ syal ebꞌ dꞌa ebꞌ yajal chiꞌ, yuj chiꞌ lajan tzꞌaj spensar ebꞌ tas syutej yixtan ebꞌ yetanimail chiꞌ.
4 A ebꞌ vachꞌtacto dꞌa scal ebꞌ, lajan ebꞌ icha teꞌ qꞌuiix. A ebꞌ tojoltacto val tas scꞌulej, lajan ebꞌ icha teꞌ chac qꞌuiix. Palta, lacꞌanxo sjavi scꞌual yic ol acꞌchajcot yaelal dꞌa yibꞌan̈ ebꞌ, icha ix aj yalanel ebꞌ schecabꞌ Dios. Axon̈ej somcꞌolal ol javoc dꞌa scal ebꞌ.
5 Yuj chiꞌ ex vetchon̈abꞌ, mocabꞌ eyacꞌoch tas syal ebꞌ ay dꞌa e lacꞌanil dꞌa e cꞌool, man̈ eyacꞌoch junoc eyamigo yipoc e cꞌool. Scham e naan tas tzeyal yedꞌ ix eyetbꞌeyum.
6 Yujto a ebꞌ uninabꞌil, spatiquejcanel smam ebꞌ. A ebꞌ ix uneabꞌil, spitej sbꞌa ebꞌ ix dꞌa snun. A ebꞌ ix alibꞌal, tzꞌoch ebꞌ ix ajcꞌolal dꞌa ebꞌ ix yalibꞌ. A ebꞌ junn̈ej yaj dꞌa yol spat, tzꞌoch ebꞌ ajcꞌolal dꞌay junjun.
7 Palta a inxo pax tic, a Jehová ayoch yipoc in cꞌool. An̈ej Dios in Columal yipcꞌolal yaj vuuj, yujto syabꞌ tas svalaꞌ.
A Jehová ol colvaj dꞌa ebꞌ israel
8 A ex ajcꞌool eyajoch dꞌayon̈, man̈ ex tzalaj yuj tas tzon̈ icꞌani. Vachꞌchom tzon̈ telvi, palta ol on̈ qꞌuex vaan. Vachꞌchom tzoymaj qꞌuicꞌalqꞌuinal dꞌa co patic, palta a Jehová saquilqꞌuinal yaj dꞌayon̈.
9 Ix och co mul dꞌa Jehová, yuj chiꞌ ol cacꞌ techaj yoval scꞌool, masanto yic ol on̈ schꞌolbꞌitej, axo on̈ stojolbꞌitan chiꞌ. A Jehová ol yacꞌ quil saquilqꞌuinal, ol quilaꞌ tas ol on̈ yutej scolaneli.
10 Ex cajcꞌool, ol acꞌjoc pax jun tic eyilaꞌ, toxon̈ej ol ex te qꞌuixvocan yuuj. A ex tic, tzeyal dꞌayon̈ icha tic: ¿Bꞌajtil ay Jehová e Diosal chiꞌ? xe chi. Palta a ticnaic ol quil val e telvi, ol ex co tecꞌubꞌtan̈ej icha val stecꞌji lum socꞌom dꞌa yoltac bꞌe.
11 Ex vetchon̈abꞌ aj Jerusalén, van scꞌoch scꞌual yic ol bꞌochajxiqꞌue smuroal co chon̈abꞌ, yic ol nivanbꞌoc co macbꞌen.
12 Yujto van sja scꞌual sjavi juntzan̈ anima dꞌayon̈, aton ebꞌ scot dꞌa masanil nación. Ol cot ebꞌ dꞌa Asiria dꞌa stiꞌ aꞌ nivan Éufrates, ol cotpax ebꞌ dꞌa Egipto dꞌa stiꞌ aꞌ Nilo. Ol laj cot ebꞌ ay dꞌa scꞌaxepal aꞌ mar yedꞌ ebꞌ ay dꞌa tzalquixtac dꞌa najat.
13 A yuj smul ebꞌ anima dꞌa juntzan̈ nación chiꞌ, tzꞌinan lumxon̈ej ol ajcan lum smacbꞌen ebꞌ.
14 Mamin Jehová, tan̈vej on̈ a on̈ a chon̈abꞌ on̈ sicꞌbꞌil on̈ el uuj, icha nocꞌ calnel aycan dꞌa caltac teꞌ, a dꞌa najat dꞌa spatic yichan̈ nocꞌ ay val an̈ yax an̈cꞌultac. Icꞌon̈bꞌat icha utejnac on̈ dꞌa pecaꞌ, icꞌon̈bꞌat bꞌaj vachꞌ tzon̈ aj icha nocꞌ calnel te vachꞌ bꞌaj sva dꞌa Basán yedꞌ dꞌa Galaad.
15 Chꞌox quil tas satubꞌtac icha a cꞌulejnac ayic icꞌannaquelta ebꞌ co mam quicham dꞌa Egipto.
16 Icha chiꞌ, ol yil juntzan̈ nación, ol qꞌuixvoccan ebꞌ, vachꞌchom nivac yelcꞌoch ebꞌ, palta ol sat scꞌol ebꞌ, man̈xalaj tas ol yal ebꞌ, icha ebꞌ chacan̈ ol ajcan ebꞌ.
17 Toxon̈ej ol sjachecꞌ sbꞌa ebꞌ yuj xivcꞌolal dꞌa scal lum pococ icha nocꞌ chan. Van xiv ebꞌ ol elta ebꞌ dꞌa scuartel. Ach Jehová co Diosal, ol xiv ebꞌ dꞌayach.
Tzꞌacꞌji lajvoc smul chon̈abꞌ Israel yuj Dios
18 Ach co Diosal, malaj junoc dios lajan edꞌoc, yujto a ach tic, tzacꞌ lajvoc smul ebꞌ a chon̈abꞌ tzato cani, tzacꞌanpax nivancꞌolal spitalil ebꞌ. Man̈ ayocn̈ejecꞌ yoval a cꞌol dꞌa juneln̈ej, yujto tzach tzalaj a chꞌoxan a vachꞌcꞌolal dꞌayon̈.
19 Ol ocꞌxi a cꞌol dꞌayon̈. Ichato ol a muccanem co mul. Ichato ol a yumcanbꞌat co chucal dꞌa sjulal yich aꞌ mar.
20 Mamin, ayocabꞌn̈ej a vachꞌcꞌolal, tzon̈ a xajanejn̈ej icha ajnac acꞌancan a tiꞌ dꞌa pecaꞌ dꞌa ebꞌ co mam quicham, aton vin̈aj Abraham yedꞌ vin̈aj Jacob.