Jonás sbꞌi jun libro tic, yujto a yabꞌixal vin̈aj Jonás tzꞌibꞌabꞌilcan dꞌay. Chꞌoc yel jun libro tic dꞌa yichan̈ juntzan̈xo libro yic ebꞌ schecabꞌ Dios. A juntzan̈ libro chiꞌ, cꞌaybꞌubꞌaln̈ej ay dꞌay. Palta a dꞌa jun libro tic jun, syalcot yuj spitalil jun vin̈ schecabꞌ Dios, aton vin̈aj Jonás. Checbꞌilbꞌat vin̈ yal slolonel Dios dꞌa chon̈abꞌ Nínive, yic sna sbꞌa ebꞌ dꞌa smul, tato maay ol satjoquel ebꞌ yuj Dios. Palta maj yal-laj scꞌol vin̈ bꞌati, stenanecꞌ vin̈ tas yal Dios, yuj chiꞌ javi jun nivan yaelal dꞌa yibꞌan̈ vin̈. Yuj jun nivan yaelal chiꞌ, snaan sbꞌa scꞌool vin̈, sbꞌat vin̈ yalel slolonel Dios chiꞌ dꞌa chon̈abꞌ Nínive chiꞌ dꞌa chabꞌcꞌolal. Cot yoval vin̈aj Jonás chiꞌ yujto acꞌji nivancꞌolal ebꞌ aj Nínive chiꞌ yuj Dios, yujto sna sbꞌa ebꞌ.

A jun libro tic, schꞌoxcoti to a Dios syaln̈ej yacꞌanelcꞌoch tas snibꞌej scꞌulej dꞌa yolyibꞌan̈qꞌuinal tic. Palta a dꞌa masanil juntzan̈ tic, ataꞌ schꞌox Dios to xajanej ebꞌ anima, tzꞌocꞌpax scꞌool dꞌa ebꞌ. A Dios ay snivancꞌolal, scolvajpaxi. A ebꞌ ajcꞌol yajoch dꞌa chon̈abꞌ Israel, tzꞌacꞌjipax nivancꞌolal ebꞌ yuj Dios chiꞌ.