Miqueas sbꞌi jun libro tic, yujto a slolonel Dios yalnac dꞌa vin̈aj Miqueas tzꞌibꞌabꞌilcan dꞌay. A vin̈aj Miqueas chiꞌ, schecabꞌ Dios yaj vin̈, cajan vin̈ dꞌa jun yuneꞌ chon̈abꞌ ay dꞌa yol yic Judá dꞌa stiempoal vin̈aj Isaías. Yojtac vin̈ sicꞌlabꞌil to jabꞌxon̈ej tiempo sjavi yoval scꞌol Dios dꞌa yibꞌan̈ ebꞌ aj Judá, icha aj sjavi dꞌa yibꞌan̈ ebꞌ aj Israel, yujto lajan smul ebꞌ yedꞌ ebꞌ aj Israel chiꞌ. Yuj chiꞌ yalnac vin̈aj Miqueas chiꞌ to ol javoc yaelal dꞌa yibꞌan̈ ebꞌ aj Judá chiꞌ, yujto man̈ vachꞌoc tas scꞌulej ebꞌ, tzꞌixtaj ebꞌ mebꞌaꞌ yuj ebꞌ, yuj chiꞌ ol chꞌolbꞌitaj yaj ebꞌ.

Palta ayic toxo ix ecꞌ jun yaelal dꞌa yibꞌan̈ ebꞌ anima chiꞌ, ol yacꞌanxi svachꞌcꞌolal Dios dꞌa yibꞌan̈ ebꞌ, yujto xajan ebꞌ yuuj, nivan pax scꞌol dꞌa yibꞌan̈ ebꞌ. A dꞌa capítulo 5 versículos 2-5, ataꞌ syalcot yuj jun acꞌum juncꞌolal ol javoc dꞌa yolyibꞌan̈qꞌuinal tic. A dꞌa scal ebꞌ yin̈tilalcan vin̈aj David, ataꞌ ol checlajoc. Toxonton sicꞌbꞌilel yuj Dios. A dꞌa chon̈abꞌ Belén, ataꞌ ol aljoc, xchi. Axo dꞌa capítulo 6 versículo 8, ataꞌ syalcoti tastac ajnac yel yich slolon masanil ebꞌ schecabꞌ Dios.