A Slolonel Dios Dꞌa Vin̈aj
MIQUEAS
A tas ol ja dꞌa yibꞌan̈ Samaria yedꞌ Jerusalén
1
A in Miqueas in tic, aj chon̈abꞌ Moreset in. A dꞌa stiempoal vin̈aj Jotam, vin̈aj Acaz yedꞌ vin̈aj Ezequías, aton ebꞌ vin̈ sreyal Judá, a Jehová ix chꞌoxan vilaꞌ tas ol aj Samaria yedꞌ Jerusalén. Yuj chiꞌ ix valel icha tic:2 E masanil ex vetchon̈abꞌ, abꞌec juntzan̈ tic. Scham eyabꞌan e masanil cajan ex dꞌa yolyibꞌan̈qꞌuinal tic. A Jehová Yajal, ato dꞌa stemplo yicn̈ej yaji, ato taꞌ ol yalel masanil e chucal.
3 Ol elta Jehová bꞌaj cajan, ol bꞌeycot dꞌa schontac lum vitz.
4 Ol laj ulaxbꞌat lum vitz chiꞌ dꞌa yalan̈ yoc Jehová chiꞌ, icha tzꞌaj yulaxbꞌat nocꞌ chaqꞌuibꞌ dꞌa cal cꞌacꞌ. Ol laj cot juyuljoc lum vitz chiꞌ icha aꞌ elumaꞌ ayic ol jatqꞌue lum nivac acꞌlic.
5 Ol ujoc juntzan̈ tic, yujn̈ej spital ebꞌ yin̈tilal vin̈aj Jacob, yuj mul dꞌa yol smacbꞌen Israel. ¿Bꞌajtil scheclaj spitalil ebꞌ chiꞌ? A dꞌa chon̈abꞌ Samaria. ¿Bꞌajtil scheclaj yejmelal ebꞌ aj Judá dꞌa scomon diosal? A dꞌa Jerusalén.
6 Yuj chiꞌ syal Jehová icha tic: Ol in satel jun chon̈abꞌ Samaria tic, toxon̈ej ol qꞌuecan bꞌulan spojelal. Jacanxon̈ej ol ajcan icha bꞌaj syal yavchaj teꞌ uva. Ato dꞌa yoltac chꞌolan ol in yumcanem qꞌuen sqꞌuenal jun chon̈abꞌ tic, ol checlajcanqꞌueta cimientoal yich.
7 Chocꞌ ol ajcanbꞌat juntzan̈ yechel comon dios. Masanil juntzan̈ comon dios chiꞌ ol in n̈ustzꞌaoc. A yedꞌ qꞌuen tumin yic ajmulal, ataꞌ bꞌobꞌil, yuj chiꞌ a dꞌa stojol ajmulal chiꞌ ol ochixcan qꞌueen, xchi Jehová.
A scuscꞌolal vin̈aj Miqueas
8 Yuj chiꞌ tzin ocꞌ yuj cuscꞌolal. Bꞌeran in eli, malaj in xan̈abꞌ ayochi tzin bꞌeyeqꞌui. Toxon̈ej tzꞌel vav icha junoc nocꞌ oques, ma icha junoc nocꞌ cujubꞌ.
9 Yujto a yechen Samaria, man̈xalaj yan̈al. Toxo ix yamchajpaxcꞌoch Judá yuj yaelal chiꞌ, masanto scꞌoch dꞌa tiꞌ chon̈abꞌ Jerusalén, aton schon̈abꞌ ebꞌ vetchon̈abꞌ.
10 Man̈ eyal juntzan̈ tic dꞌa ebꞌ cajan dꞌa Gat. Mocabꞌ ex ocꞌ dꞌa yichan̈ ebꞌ. Ecꞌan̈ec bꞌalbꞌon dꞌa cal pococ yuj e cuscꞌolal chiꞌ dꞌa Bet-le-afra.*
11 A exxo cajan ex dꞌa Safir, ixiqueccan dꞌa chꞌoc chon̈abꞌil, vachꞌchom bꞌeran ex eli. Dꞌa qꞌuixveltaquil tzex icꞌchajbꞌati. Man̈xo jabꞌoc tzꞌelta ebꞌ cajan dꞌa Zaanán ex scoloꞌ. Ay oqꞌuel dꞌa Bet-esel, man̈xa mach ol och eyedꞌoc.
12 A ebꞌ cajan dꞌa Marot, cumcon yecꞌ ebꞌ yabꞌan syail, smaclej ebꞌ sjavi colval, palta toxo ix cꞌoch yaelal chiꞌ dꞌa tiꞌ chon̈abꞌ Jerusalén yuj Jehová.
13 A exxo cajan ex dꞌa Laquis, te pit ex icha ebꞌ israel. A yuj e pital chiꞌ ix och smul ebꞌ aj Sion. Aqꞌuecoch nocꞌ e chej te jelan sbꞌey dꞌa carruaje yic oval.
14 Ex aj Moreset-gat, actejeccan e chon̈abꞌ chiꞌ dꞌa juneln̈ej. A ebꞌ sreyal Israel, nabꞌan̈ej ix stan̈vej scolval ebꞌ aj Aczib ebꞌ.
15 Ix yalan Jehová icha tic: Ex cajan ex dꞌa Maresa, ol vacꞌoch e chon̈abꞌ chiꞌ dꞌa yol scꞌabꞌ ebꞌ ajcꞌool. A ebꞌ nivac yelcꞌoch dꞌa scal ebꞌ israel, ol bꞌat scꞌubꞌejel sbꞌa ebꞌ dꞌa yoltac qꞌuen n̈aqꞌueen dꞌa Adulam.
16 A exxo ex aj Jerusalén, joxequel xil e jolom yuj cuselal. Chacbꞌerinac ocabꞌxon̈ej tzꞌajcan e jolom chiꞌ icha sjolom nocꞌ xulem, yujto a ebꞌ eyuninal te xajanabꞌil eyuuj, ol icꞌchajbꞌat ebꞌ dꞌa chꞌoc chon̈abꞌil, xchi Jehová.