Obꞌiltac ebꞌ ixtum mebꞌaꞌ
2
Obꞌiltac ol aj ebꞌ ayecꞌ dꞌa sat schꞌat snaubꞌtan̈an tas chucal scꞌulej, axo sqꞌuin̈ibꞌi jun, scꞌulan ebꞌ tas sna chiꞌ, yujto ayecꞌ dꞌa yol scꞌabꞌ ebꞌ scꞌulani.2 Tato syiloch scꞌol ebꞌ dꞌa junoc luum, stocꞌn̈ejecꞌ ebꞌ. Tato syiloch scꞌol ebꞌ dꞌa junoc pat, syicꞌn̈ejecꞌ ebꞌ. Icha chiꞌ tzꞌaj yixtaj ebꞌ anima yedꞌ yuninal yuj ebꞌ.
3 Yuj chiꞌ syal Jehová icha tic: A in tic, ay tas tzin na pax dꞌa e patic a ex tic. Ol vacꞌbꞌat junoc nivan yaelal dꞌa e cal, man̈xo ol yal-laj e colan e bꞌa. Man̈xo acꞌumtacoc ol aj e bꞌeyeqꞌui, yujto scꞌualxo jun nivan yaelal.
4 A dꞌa jun cꞌual chiꞌ, ol stzꞌac bꞌitej bꞌit ebꞌ anima mebꞌaꞌ yuj ex sbꞌuchani. Ol yal ebꞌ icha tic: A ticnaic, toxo ix on̈ can dꞌa yalan̈ yuj ebꞌ ajcꞌool dꞌa juneln̈ej. A co chon̈abꞌ, toxo ix qꞌuexvi yajal, man̈xalaj mach syal scachvaji. A lum co luum, ix spuquecꞌ lum ebꞌ ajcꞌol chiꞌ dꞌa spatic, xcham ebꞌ dꞌa sbꞌit chiꞌ, xchi Jehová.
5 Yuj e chucal chiꞌ man̈xa eyalan eyic dꞌa e macbꞌen dꞌa scal ebꞌ schon̈abꞌ Jehová.
A ebꞌ syaloch sbꞌa schecabꞌoc Dios
6 Ix yalan ebꞌ anima dꞌayin icha tic: Man̈ al dꞌayon̈ to ol javoc yaelal dꞌa quibꞌan̈. ¿Tocval ol javoc jun qꞌuixvelal chiꞌ dꞌa quibꞌan̈?
7 ¿Tocval catabꞌil schon̈abꞌ vin̈aj Jacob? ¿Tocval ix lajvi snivancꞌolal Dios, yuj chiꞌ icha chiꞌ ol on̈ yutej? ¿Tocval syacꞌcot yaelal Dios dꞌa yibꞌan̈ ebꞌ tojol sbꞌeybꞌal? xchi ebꞌ.
8 Yuj chiꞌ syal Jehová icha tic: A ex tic, tzex och ajcꞌolal dꞌa in chon̈abꞌ. A ebꞌ smeltzajcot dꞌa oval, sna ebꞌ to man̈xalaj tas ol icꞌan ebꞌ, palta a exxo tic tzeyiqꞌuel spichul ebꞌ.
9 Tze pechelta ebꞌ ix ix dꞌa yoltac spat bꞌaj tzalajcꞌolal yajeqꞌui. Juneln̈ej tzeyicꞌpaxecꞌ smacbꞌen ebꞌ yuneꞌ ebꞌ ix, ix vacꞌaꞌ.
10 Qꞌuean̈ec vaan, ixiquec. Maxtzac yal tzex aj dꞌa tic, yujto man̈ jantacoc chucal tze cꞌulej dꞌa sat lum luum tic, yuj chiꞌ toxo ix ixtaxel lum dꞌa juneln̈ej.
11 Tato ay junoc esalvum sjavi dꞌayex, syalani to malaj tas ol javoc dꞌa eyibꞌan̈, vachꞌ ol ex ajoc, aton val jun chiꞌ in checabꞌ eyalani, xchi Jehová.
Syal Dios to ol scol schon̈abꞌ
12 Syalanpax Dios icha tic: Ol ex in molbꞌej e masanil ex yin̈tilalcan vin̈aj Jacob, a ex ton aj Israel ex tzexto cani. Ol ex in molbꞌej, icha tzꞌaj smolbꞌan nocꞌ scalnel junoc tan̈vum calnel dꞌa smacteꞌ. Icha nocꞌ calnel dꞌa junoc acꞌlic man̈xo jantacoc yel yav tzꞌeqꞌui, icha chiꞌ ol aj yel eyav yuj tzalajcꞌolal.
13 Bꞌabꞌel in bꞌat in pojan bꞌe dꞌa eyichan̈, a exxo tzacꞌan ex och vuuj. Axo eyel dꞌa stiꞌ spuertail jun chon̈abꞌ yic tzex el dꞌa libre, aton jun chon̈abꞌ bꞌaj ix ex icꞌjibꞌati. A in Jehová in, e Reyal in, bꞌabꞌel in bꞌat dꞌa eyichan̈, xchi Jehová.