A lolonel tzꞌalchaj dꞌa spatic ebꞌ yajal elcꞌum
3
Ix lajvi chiꞌ ix valani: Ex yajal chon̈abꞌ Israel, abꞌec tas sval tic: Smoj val eyojtacanel tojolal.2 Palta a ex tic tzeyajcanel tojolal, axon̈ej chucal tze xajanej. Ichaval to tzeyiqꞌuel stzꞌumal ebꞌ quetchon̈abꞌ, axon̈ej sbꞌaquil ebꞌ scan jelan eyuuj.
3 Ichato pitzanto ebꞌ quetchon̈abꞌ tze chianbꞌat ebꞌ, tzeyicꞌanel stzꞌumal ebꞌ, tze vacꞌchitan sbꞌaquil ebꞌ. Lajan tzeyutej ebꞌ icha nocꞌ chibꞌej tzꞌacꞌjiem tajoc dꞌa yol chen.
4 Ay jun cꞌual ol e cꞌan scolval Jehová, palta man̈xo ol cotlaj qꞌuelan dꞌayex. A dꞌa jun cꞌual chiꞌ, ol bꞌat mican Jehová dꞌayex yuj chucal tze cꞌulej, xin chi.
5 A Jehová tzꞌalan yuj ebꞌ syaloch sbꞌa schecabꞌoc, aton ebꞌ scuchbꞌan chon̈abꞌ dꞌa chucal: A ebꞌ checabꞌ chiꞌ, tato vachꞌ tzꞌaj stupji ebꞌ, syal ebꞌ to ay juncꞌolal. Palta tato ay ebꞌ max acꞌan tas syabꞌlej ebꞌ, syacꞌ yovalil ebꞌ dꞌa ebꞌ. Yuj chiꞌ sval yuj juntzan̈ ebꞌ checabꞌ chiꞌ icha tic:
6 Ichato ol emcan cꞌu dꞌa ebꞌ, ol can ebꞌ dꞌa scal qꞌuicꞌalqꞌuinal. Man̈xa bꞌaqꞌuin̈ ol yal ebꞌ to ix chꞌoxchaj tas yil ebꞌ. Man̈xo ol yal-laj yalan ebꞌ tas ol ujoc bꞌaqꞌuin̈, xchi Jehová.
7 A juntzan̈ ebꞌ checabꞌ yedꞌ juntzan̈ ebꞌ naumel lolonel chiꞌ yalani, man̈xalaj ol aj yelcꞌoch ebꞌ, numanxon̈ej ol ajcan ebꞌ, yujto malaj tas ol schꞌox Dios yil ebꞌ.
8 A inxo pax tic, ayoch Yespíritu Jehová dꞌayin, yuj chiꞌ ay vip, snachajpaxel tojolal vuuj, yuj chiꞌ tzin tecꞌbꞌej in bꞌa valanoch jantac smul Israel dꞌa sat.
9 Ex yajalil Israel, abꞌec juntzan̈ tic: A ex tic tze patiquejel tojolal. Axo chucal tze cꞌulej sqꞌuexuloc tojolal chiꞌ.
10 Tze bꞌoqꞌue Jerusalén, aton chon̈abꞌ yic tzalan Sion yuj tas tzeyiqꞌuecꞌ dꞌa ebꞌ anima tze macꞌchamoc yedꞌ dꞌa juntzan̈ tas man̈ tojoloc tze cꞌulej.
11 A ex yajal ex chon̈abꞌ, max e bꞌolaj yaj ebꞌ eyetanimail dꞌa stojolal yuj e chaan tumin. Yedꞌ ex sacerdote ex, tze cꞌan tumin dꞌa ebꞌ anima tze cꞌaybꞌej. An̈ejtonaꞌ ex tzeyesejoch e bꞌa schecabꞌoc Dios, tzeyalaꞌ to ay tas schꞌoxji eyilaꞌ yuj e chaan tumin. Ayoch Dios yipoc e cꞌool eyalani, yuj chiꞌ tzeyal icha tic: A Jehová ayoch quedꞌoc, yuj chiꞌ malaj tas ol javoc dꞌa quibꞌan̈, xe chi.
12 Yuj chiꞌ, eyuj a ex tic, a Jerusalén chon̈abꞌ yic tzalan Sion, icha lum luum dꞌocbꞌil yedꞌ arado ol ajcanoc, toxon̈ej ol qꞌuecan bꞌulan spojelal, axo dꞌa tzalan yic templo, vayumtac ol aj sqꞌuibꞌcanqꞌue te teꞌ dꞌay.