Ix cot yoval vin̈aj Jonás
4
Palta axo vin̈aj Jonás chiꞌ, te chuc ix yabꞌ vin̈ yujto ix sqꞌuex spensar Jehová, ix te cot yoval vin̈. 2 Yuj chiꞌ ix lesalvi vin̈ dꞌa Jehová, ix yalan vin̈ icha tic: Ina val Mamin Jehová, aton val jun tic ix in naꞌ ayic ayin to ecꞌ dꞌa in chon̈abꞌ. Yuj chiꞌ ix in nibꞌej ix in el lemnaj dꞌa ichan̈, ix in bꞌatcan dꞌa Tarsis valani. Yujto vojtac to Dios ach, te ay val oqꞌuelcꞌolal, man̈ cꞌunoc scot oval. Ayic tzalani to ol acꞌoch junoc yaelal, junanto rato chiꞌ snaan pax sbꞌa a cꞌool, yujto te nivan a cꞌool. 3 Yuj chiꞌ tzin tevi dꞌayach Mamin Jehová to tziqꞌuel in qꞌuinal, más am vachꞌ to tzin chami, dꞌa yichan̈ pax to pitzan in, xchi vin̈.4 Ix tacꞌvi Jehová chiꞌ dꞌa vin̈ icha tic:
—¿Tom vachꞌ scot oval icha tic tza naꞌa? xchi dꞌa vin̈.
5 Ix el vin̈ dꞌa stiel chon̈abꞌ chiꞌ dꞌa stojolal bꞌaj sjavi cꞌu. Ataꞌ ix sbꞌoqꞌue xiltac teꞌ vin̈ dꞌa yibꞌan̈, ix em cꞌojan vin̈ dꞌa yen̈ul chiꞌ, ix smaclan yil vin̈ tas ol aj jun chon̈abꞌ chiꞌ. 6 Axo Jehová ix acꞌan qꞌuibꞌ jun ibꞌ teꞌ chꞌupacꞌteꞌ. A jun teꞌ chiꞌ ix qꞌuibꞌqꞌue yen̈uloc vin̈. Yuj chiꞌ vachꞌ yajecꞌ vin̈ taꞌ. Ix te tzalaj vin̈ yuj teꞌ. 7 Axo yic ix qꞌuin̈ibꞌi dꞌa junxo cꞌu, van stacjiel teꞌ, yujto a Jehová ix acꞌancot jun nocꞌ cꞌosnocꞌ ix cꞌuxan schꞌan̈al yip teꞌ. 8 Axo yic ix qꞌue cꞌu, ix yacꞌancot jun icꞌ Jehová te ov scꞌacꞌal dꞌa stojolal bꞌaj sjavi cꞌu, te ov ix em yoc cꞌu dꞌa sjolom vin̈aj Jonás chiꞌ. Ix och ijan yel yip vin̈ yuj cꞌacꞌ chiꞌ. Yuj chiꞌ ix snibꞌej cham sbꞌa vin̈. Ix yalan vin̈:
—Más am vachꞌ tzin chami, dꞌa yichan̈ pax to pitzan in, xchi vin̈.
9 Ix yalanpax Jehová dꞌa vin̈ icha tic:
—¿Tom vachꞌ tza cꞌulej scot oval yujn̈ej to ix tacjiel te teꞌ ix qꞌuibꞌqꞌue en̈uloc chiꞌ? xchi Jehová.
—Ay valan vicoꞌ, vachꞌchom tzin cham yuj voval tic, xchi vin̈.
10 Ix yalanxi Jehová dꞌa vin̈ icha tic:
—¿Toc a ach ix avej jun te teꞌ tic? ¿Toc a ach pax ix acꞌ qꞌuibꞌ teꞌ? Junn̈ej acꞌval ix qꞌuibꞌ teꞌ, axo dꞌa junxo acꞌval ix tacjixiel teꞌ. Palta a ach tic tzach cus yuj teꞌ. 11 A in xo pax tic, ¿tom man̈ ol cus in cꞌol yuj jun nivan chon̈abꞌ Nínive tic, ecꞌto 120 mil ebꞌ unin mantalaj spensar cajan dꞌay? An̈ejtonaꞌ, man̈ jantacoc pax nocꞌ nocꞌ ay dꞌay, xchi dꞌa vin̈.