Ix sna sbꞌa ebꞌ aj Nínive
3
Ix lolonxi Jehová dꞌa schaelal dꞌa vin̈aj Jonás chiꞌ. Ix yalan icha tic: 2 Ixic lemnaj dꞌa nivan chon̈abꞌ Nínive, sbꞌat alan tas ol val tic dꞌayach, xchi dꞌa vin̈. 3 Yuj chiꞌ, ix bꞌat vin̈aj Jonás chiꞌ dꞌa Nínive chiꞌ icha ix aj yalan Jehová. A jun chon̈abꞌ chiꞌ te nivan, ay am oxeoc cꞌual stecꞌnabꞌil yecꞌ yool. 4 Ix och vin̈aj Jonás chiꞌ dꞌa yol chon̈abꞌ chiꞌ. A dꞌa bꞌabꞌel cꞌu te chaan̈ ix yal vin̈ icha tic: Yic val chavinac cꞌual tic ol satjoquel jun chon̈abꞌ tic, xchi vin̈.5 Masanil ebꞌ anima cajan dꞌa jun nivan chon̈abꞌ chiꞌ, ebꞌ icham anima yedꞌ ebꞌ unin, ix yacꞌoch slolonel Dios ebꞌ dꞌa scꞌool, ix och ebꞌ dꞌa tzecꞌojcꞌolal, ix laj yacꞌanoch pichul ebꞌ ya svaꞌi. Icha chiꞌ ix yutej ebꞌ schꞌoxanel scuscꞌolal yuj smul.
6 Axo ix cꞌoch yabꞌixal jun tic dꞌa vin̈ sreyal Nínive chiꞌ, ix qꞌue vaan vin̈ dꞌa sdespacho, ix yicꞌanel spichul vin̈ yic sreyal, ix yacꞌanoch pichul vin̈ ya svaꞌi, ix em cꞌojan vin̈ dꞌa scal qꞌuen ticꞌaqꞌuil taan̈. 7 A vin̈ rey chiꞌ yedꞌ ebꞌ ayoch yajalil yedꞌ vin̈, ix yaqꞌuelta jun ley ebꞌ dꞌa masanil chon̈abꞌ chiꞌ, xchi icha tic: Malaj junoc on̈ tzon̈ vaꞌi. Malaj pax junoc on̈ scacꞌ va nocꞌ co vacax, ma nocꞌ co calnel, max cacꞌpaxlaj yucꞌ aꞌ nocꞌ. 8 A tas ol co cꞌulej to ol caqꞌuecoch co pichul ya svaꞌi yedꞌ nocꞌ co molbꞌetzal nocꞌ chiꞌ, yic sco chꞌoxanel co cuscꞌolal. Ol on̈ lesalvoc dꞌa Dios yedꞌ val masanil quip, ol cactancan masanil chucal sco cꞌulej, ol cactan co macꞌan ebꞌ quetanimail, 9 talaj tzato sqꞌuex spensar Dios dꞌa quibꞌan̈, tzꞌoch vaan yoval scꞌool, yic man̈ ol on̈ chamlaj, xchi jun ley chiꞌ.
10 Ayic ix yilan Dios to ix sna sbꞌa ebꞌ aj Nínive chiꞌ, ix yactancan schuc bꞌeybꞌal ebꞌ, ix snaani to man̈ ol satel jun chon̈abꞌ chiꞌ icha ix yutej schecan alchajeloc.