A slesal vin̈aj Jonás
2
Ayic ayecꞌ vin̈ dꞌa yol scꞌool nocꞌ chay chiꞌ, ix lesalvi vin̈ dꞌa Jehová sDiosal. Ix yalan vin̈ icha tic:2 Mamin Jehová, a val dꞌa scal in yaelal ix in avaj dꞌayach. Ix ach tacꞌvi dꞌayin ayic ayinecꞌ dꞌa chamel. Ataꞌ ix in avaj dꞌayach, ix abꞌan tas ix valaꞌ.
3 Ato dꞌa sjulal yich aꞌ mar ix in a yumcanemi, juneln̈ej ix yoy sbꞌa a aꞌ dꞌayin. A aꞌ nivac aꞌ ix laj ecꞌ dꞌa vibꞌan̈.
4 Ataꞌ ix in naꞌ to ix in icꞌcanel dꞌa ichan̈ dꞌa juneln̈ej, a valani to man̈xa bꞌaqꞌuin̈ ol vil a templo to ic yaji.
5 Ix in mucchajcanem dꞌa sjulal yich aꞌ mar chiꞌ. Ix och bꞌacꞌan juntzan̈ an̈ an̈ cꞌultac ay dꞌa yol aꞌ chiꞌ dꞌa in jolom.
6 Ix in emcan dꞌa yichtac juntzan̈ vitz dꞌa yol aꞌ chiꞌ. Juneln̈ej ix in can taꞌ valani, palta a ach tic Jehová in Diosal ach, ix in a colcanel dꞌa chamel.
7 Axo yic vanxo slajvi in qꞌuinal ix vabꞌi, ix ach in naancot Mamin. Ix cꞌoch in lesal dꞌa ichan̈ dꞌa a templo.
8 A ebꞌ slaj yaqꞌuem sbꞌa dꞌa yechel comon dios malaj yelcꞌochi, spatiquejcanel a vachꞌcꞌolal ebꞌ tza nibꞌej tzacꞌ dꞌa ebꞌ.
9 Palta a inxo tic, ol vacꞌ in silabꞌ dꞌayach yuj vacꞌan yuj diosal dꞌayach. Ol in cꞌanabꞌajej bꞌaj ix vacꞌ in tiꞌ dꞌayach. A achxon̈ej syal a colvaj Mamin Jehová, xchi vin̈aj Jonás chiꞌ.
10 Ix lajvi chiꞌ, axo Jehová ix checanbꞌat nocꞌ nivan chay chiꞌ, yic bꞌat xejajcanel vin̈aj Jonás chiꞌ yuj nocꞌ dꞌa stiꞌ aꞌ mar chiꞌ.