A Slolonel Dios Dꞌa Vin̈aj
JONÁS
Ix bꞌat vin̈aj Jonás elelal dꞌa Dios yalani
1
Ay jun vin̈ scuchan Jonás yuninal vin̈aj Amitai. A junel, ix lolon Jehová dꞌa vin̈, ix yalan icha tic: 2 Ixic lemnaj dꞌa jun nivan chon̈abꞌ Nínive, tzalan dꞌa ebꞌ anima cajan taꞌ to ol in satel ebꞌ yedꞌ schon̈abꞌ chiꞌ, yujto svil val jantac chucal scꞌulej ebꞌ, xchi Jehová. 3 Palta maj scꞌanabꞌajej vin̈ tas ix yal Jehová chiꞌ, yuj chiꞌ ix snabꞌat sbꞌa vin̈ elelal dꞌa chon̈abꞌ Tarsis. Ix em vin̈ dꞌa chon̈abꞌ Jope bꞌaj sjavi teꞌ barco dꞌa stiꞌ aꞌ mar. Ataꞌ ix ilchaj jun teꞌ barco yuj vin̈, vanxo sbꞌat teꞌ dꞌa Tarsis chiꞌ. Ix stupan spasaje vin̈, yic najat sbꞌatcan vin̈ dꞌa yichan̈ Jehová snaani.4 Palta axo Jehová ix acꞌancot jun icꞌ te ov dꞌa yibꞌan̈ aꞌ mar, ijan val sjecchaj teꞌ barco chiꞌ yuj yoval aꞌ. 5 Ix xivqꞌue ebꞌ edꞌjinac teꞌ barco chiꞌ, ix laj yalan sbꞌa junjun ebꞌ dꞌa sdiosal. Ix och ijan ebꞌ syumancanbꞌat yicatz teꞌ dꞌa yol aꞌ yic sebꞌbꞌi teꞌ. Axo vin̈aj Jonás chiꞌ, ix em vin̈ dꞌa jun colxo yol teꞌ barco chiꞌ dꞌa yalan̈, axo taꞌ ix vay vin̈.
6 Axo vin̈ sat yaj dꞌa teꞌ barco chiꞌ ix emcꞌoch bꞌaj vaynac vin̈ chiꞌ, ix yalan vin̈ dꞌa vin̈ icha tic: ¿Tas yuj an̈ej vayan̈ tzacꞌ dꞌa tic ach anima? Qꞌuean̈ vaan. Al a bꞌa dꞌa a diosal, talaj tzꞌocꞌ scꞌool dꞌayon̈ tzon̈ colchaji, xchi vin̈.
7 Ix laj yalan ebꞌ edꞌjinac teꞌ barco chiꞌ dꞌay junjun: A ticnaic caqꞌuec junoc co sorteo, yic vachꞌ snachajel cuuj mach ay smul yuj chiꞌ sja jun tic dꞌa quibꞌan̈, xchi ebꞌ. Ix yacꞌan sorteo ebꞌ chiꞌ, axo dꞌa yibꞌan̈ vin̈aj Jonás chiꞌ ix emi. 8 Ix yalan ebꞌ icha tic dꞌa vin̈: Al dꞌayon̈ tas yuj sja jun tic dꞌa quibꞌan̈. ¿Tas opisio? ¿Bꞌajtil ix ach coti? ¿Tas sbꞌi a chon̈abꞌ? ¿Tas aji? xchi ebꞌ dꞌa vin̈.
9 Ix tacꞌvi vin̈aj Jonás chiꞌ: A in tic hebreo in, a dꞌa Jehová sDiosal satchaan̈, ataꞌ sval in bꞌa, aton ix bꞌoan aꞌ mar tic yedꞌ lum luum, xchi vin̈. 10-11 Yuj chiꞌ, ix och ijan vin̈ yalan dꞌa ebꞌ edꞌjinac teꞌ barco chiꞌ to van yel vin̈ elelal dꞌa yichan̈ Jehová yalani. Axo ix yabꞌan ebꞌ to icha chiꞌ yaji, ix yilanpax ebꞌ to yelcꞌolal ste ovaj aꞌ mar chiꞌ, ix te vachꞌ xivqꞌue ebꞌ, ix och ijan ebꞌ scꞌanbꞌan dꞌa vin̈ icha tic: ¿Tas yuj icha tic tzutej a bꞌa? ¿Tas tzach cutej ticnaic yic svanaj aꞌ mar tic? xchi ebꞌ.
12 Ix yalan vin̈ icha tic: Yumineccanbꞌat dꞌa yol aꞌ mar tic, yic svanaj aꞌ, vojtac to vuuj sjavi jun tic dꞌa quibꞌan̈, xchi vin̈.
13 Ix spilan val yip ebꞌ yicꞌanbꞌey teꞌ barco chiꞌ yic smeltzajbꞌat teꞌ bꞌaj ay lum luum yalan ebꞌ, palta juneln̈ej majxo yal-laj yuj ebꞌ, yujto yelcꞌolal ste ovajchaan̈ aꞌ mar chiꞌ. 14 Yuj chiꞌ ix tevi ebꞌ dꞌa Jehová, ix yalan ebꞌ icha tic: Mamin Jehová, man̈ on̈ a satel yuj schamel jun vin̈ vinac tic, tato malaj smul vin̈ jun, comonoc max acꞌcan schamel vin̈ tic dꞌa quibꞌan̈, yujto a ach tic Jehová van a cꞌulan icha tas nabꞌil uuj, xchi ebꞌ. 15 Ayic ix lajvi yalan ebꞌ icha chiꞌ, ix syumancanbꞌat vin̈aj Jonás chiꞌ ebꞌ dꞌa yol aꞌ mar chiꞌ, icha chiꞌ ix aj yoch vaan aꞌ. 16 Ayic ix yilan jun chiꞌ ebꞌ edꞌjinac teꞌ barco chiꞌ, ix te xiv ebꞌ dꞌa Jehová, ix yacꞌan jun silabꞌ ebꞌ dꞌay, ix yacꞌanpax stiꞌ ebꞌ dꞌay.
17 Yacbꞌan chiꞌ axo Jehová ix acꞌancot jun nocꞌ nivan chay, ix turjibꞌat vin̈aj Jonás chiꞌ yuj nocꞌ. Oxeꞌ cꞌual yedꞌ oxeꞌ acꞌval ix ecꞌ vin̈ dꞌa yol scꞌol nocꞌ chay chiꞌ.