A Slolonel Dios Dꞌa Vin̈aj
ABDÍAS
A yaelal ol cot dꞌa yibꞌan̈ chon̈abꞌ Edom
1
A in Abdías in tic, icha vayich ix yutej Jehová yalan juntzan̈ tic dꞌayin yuj ebꞌ aj Edom:Ix vabꞌ yalan Jehová Cajal icha tic: Ix schecbꞌat jun schecabꞌ dꞌa juntzan̈xo nación, ix bꞌat yalan jun lolonel tic: Aqꞌuec lista e bꞌa. Bꞌat caqꞌuec oval dꞌa Edom, xchi.
Icha tic yalan Jehová Cajal dꞌa ebꞌ aj Edom:
2 Ex aj Edom, man̈xa jabꞌoc ol aj eyelcꞌoch vuuj dꞌa scal juntzan̈xo nación, ol ex in patiquejcaneli.
3 A eyacꞌumtaquil tzex acꞌan musansatil. Cajan ex dꞌa yoltac qꞌuen nivac tenam yedꞌ dꞌa jolomtac vitz te chaan̈, yuj chiꞌ tze naꞌa to malaj mach syal ex sataneli.
4 A in Jehová in svalaꞌ, vachꞌchom tzex te bꞌat icha nocꞌ dꞌiv sbꞌo soꞌ bꞌaj te chaan̈, ichato dꞌa scal qꞌuen cꞌanal, ato taꞌ ol ex viqꞌuemta.
5 Qꞌuinaloc dꞌacꞌvalil sjavi junoc elcꞌum, max yicꞌbꞌatlaj masanil tastac. Qꞌuinaloc a junoc smolan sat avbꞌen, ayto bꞌaj scan junjunocxo yuuj. Palta a ebꞌ ajcꞌool, juneln̈ej ol ex satel yuj ebꞌ.
6 A ex yin̈tilalcan vin̈aj Esaú, ilbꞌajcꞌol ol ex ajcanoc. Masanil e bꞌeyumal molan eyuuj, ol elcꞌajbꞌatoc.
7 Masanil ebꞌ ayoch eyedꞌoc, ol ex yacꞌ musansatil ebꞌ. Ol ex spechel ebꞌ dꞌa sat e luum. A ebꞌ vachꞌ eyacꞌan yedꞌoc, ol meltzajoch ebꞌ ajcꞌolal dꞌayex, a ebꞌ junn̈ej sva eyedꞌoc, ol sbꞌoem yaal ebꞌ dꞌa yol e bꞌe, palta man̈ ol e nael-laj.
8 Ex aj Edom, ayic ol vacꞌanoch eyaelal, ol in satel masanil ebꞌ ay spensar dꞌa e cal, man̈xa junoc ebꞌ jelan ol can dꞌa yol e macbꞌen chiꞌ.
9 Ex aj Temán, a ebꞌ jelan yacꞌan oval dꞌa e cal, ol te ibꞌxocqꞌue ebꞌ yuj xivelal. Man̈xa junoc ex cajan ex dꞌa tzalquixtac dꞌa Edom ol ex canoc.
A schucal ebꞌ aj Edom
10 Qꞌuixvelalxon̈ej ol ex ajcanoc. Ol ex satcanel dꞌa juneln̈ej, yujto ix eyixtej ebꞌ yin̈tilal vin̈aj Jacob, aton vin̈ yucꞌtac vin̈ e mam eyicham Esaú.
11 A ex tic, ton̈ej ix ex och qꞌuelan ayic ix macꞌchajpoj spuertail Jerusalén yuj ebꞌ ajcꞌool, ayic ix icꞌchajbꞌat masanil ebꞌ soldado Jerusalén chiꞌ yuj ebꞌ chꞌoc chon̈abꞌil. Ayic ix spucanecꞌ sbꞌeyumal Jerusalén ebꞌ ajcꞌool chiꞌ, lajan ix eyutej e bꞌa yedꞌ ebꞌ.
12 Comonoc maj ex tzevajoc ayic ix eyilan tas ix aj ebꞌ e cꞌabꞌ eyoc chiꞌ, dꞌa jun cꞌu ayic ix javi yaelal dꞌa yibꞌan̈ ebꞌ aj Judá. Comonoc maj ex tzalajoc ayic ix lajviem ebꞌ dꞌa jun cꞌu chiꞌ. Comonoc maj ex bꞌuchvaj dꞌa ebꞌ, ayic ayoch ebꞌ dꞌa syaelal.
13 Comonoc maj ex och dꞌa yol in chon̈abꞌ ayic ayoch ebꞌ dꞌa syaelal. Comonoc maj ex tzevaj yuj tas ix icꞌan ebꞌ. Comonoc maj eyelqꞌuej tastac ay dꞌa ebꞌ.
14 Comonoc maj ex och e mac sat ebꞌ van sbꞌat elelal dꞌa bꞌajtac ay utzin bꞌe yic tze macꞌancham ebꞌ. Comonoc maj eyacꞌoch ebꞌ dꞌa yol scꞌabꞌ ebꞌ ajcꞌool ayic ayoch ebꞌ dꞌa syaelal.
15 Lacꞌanxo sjavi jun cꞌual ayic ol vacꞌancot yoval in cꞌol dꞌa yibꞌan̈ masanil nación. Icha tas ix e cꞌulej, ichaval chiꞌ ol ex yutej juntzan̈xo anima. Ol e chaan spac icha val smojal.
16 Icha ix aj e tzalaj eyucꞌan an̈ dꞌa tzalan bꞌaj tzꞌoch ejmelal dꞌayin, ichaval chiꞌ ol aj eyabꞌan syail yoval in cꞌool yedꞌ juntzan̈xo nación. Ichato ol eyucꞌ an̈ an̈ te ov masanto ol ex telvoc, ol ex satel dꞌa juneln̈ej.
Ol icꞌjichaan̈ Israel
17 Palta a tzalan Sion, vicxo ol ajcanoc. Ataꞌ ol cajnajxoc ebꞌ yin̈tilal Jacob olto colchajcanoc yedꞌ lum sluum juntzan̈xo chꞌoc nacional, ol yiquej pax can lum ebꞌ.
18 A ebꞌ yin̈tilal Jacob chiꞌ, aton ebꞌ yin̈tilal José, a ebꞌ chiꞌ, lajan ol aj ebꞌ icha yoc teꞌ cꞌacꞌ sqꞌue n̈iln̈onoc. Axo ebꞌ yin̈tilal Esaú, lajan ol aj ebꞌ icha an̈ ac stzꞌabꞌat yuj cꞌacꞌ dꞌa juneln̈ej. A in Jehová in svalaꞌ to man̈xa junoc ebꞌ yin̈tilal Esaú ol colchajcaneloc.
19 A ebꞌ israel cajan dꞌa lum Neguev, ol yicꞌ lum tzalquixtac ebꞌ dꞌa yol yic Edom. An̈ejaꞌ ebꞌ cajan dꞌa pan̈quiltac, ol yicꞌpax lum sluum ebꞌ filisteo ebꞌ. A ebꞌ yin̈tilal Israel, ol yicꞌxi lum smacbꞌen Efraín ebꞌ yedꞌ lum smacbꞌen Samaria. Axo ebꞌ yic Benjamín ol icꞌancan lum smacbꞌen Galaad. 20 Axo nan̈alxo ebꞌ israel, ebꞌ icꞌbꞌilbꞌat dꞌa chꞌoc chon̈abꞌil, a ebꞌ ol scha smacbꞌen dꞌa lum smacbꞌen ebꞌ aj Canaán, masanto dꞌa chon̈abꞌ Sarepta. Axo ebꞌ aj Jerusalén icꞌbꞌilbꞌat dꞌa chꞌoc chon̈abꞌil cajan dꞌa Sefarad, a ebꞌ ol icꞌan juntzan̈ chon̈abꞌ dꞌa yol yic Neguev. 21 Ol qꞌuecꞌoch ebꞌ colchajnac chiꞌ dꞌa tzalan Sion, ol yacꞌ yajalil ebꞌ dꞌa slum ebꞌ yin̈tilal Esaú. A dꞌa jun tiempoal chiꞌ, axon̈ej Jehová ol acꞌan Yajalil.