Amós sbꞌi jun libro tic, yujto a slolonel Dios yalnac dꞌa vin̈aj Amós, a tzꞌibꞌabꞌilcan dꞌay. A dꞌa yol yic Judá cajan vin̈, palta yalnac slolonel Dios vin̈ dꞌa ebꞌ israel ay dꞌa stojolal norte dꞌa abꞌil 750 ayic manto javi Cristo. A vin̈aj Amós chiꞌ, molum nocꞌ vin̈, palta avtajnac vin̈ yuj Dios yic syalanel slolonel Dios chiꞌ vin̈ dꞌa ebꞌ yetisraelal. A dꞌa jun tiempoal chiꞌ, a jun chon̈abꞌil ebꞌ anima chiꞌ, te bꞌeyum ebꞌ sicꞌlabꞌil, scꞌanabꞌajej val schecnabꞌil Dios ebꞌ yalani, man̈xa tas sna ebꞌ yuj juntzan̈xo nación ay dꞌa slacꞌanil ebꞌ. Palta a val chucal scꞌulej ebꞌ, syixtan ebꞌ mebꞌaꞌ ebꞌ. A bꞌaj scꞌanabꞌajej ebꞌ chiꞌ yalani, ton̈ej syal ebꞌ, man̈oc dꞌa spensar ebꞌ scoti. A tas ayoch yipoc scꞌool ebꞌ junn̈ej rato slajvieli. A vin̈aj Amós chiꞌ, schael yich vin̈ yalan yuj yaelal ol javoc dꞌa yibꞌan̈ junjun nación ay dꞌa slacꞌanil Israel chiꞌ. Yalannacpax vin̈ to a juntzan̈ yaelal chiꞌ ol javocpax dꞌa yibꞌan̈ Israel chiꞌ yedꞌ Judá, yujto a Dios Yajal yaj dꞌa masanil nación. Aꞌ ol chꞌolbꞌitan masanil anima yuj spitalil, axo dꞌa slajvubꞌxo ol cꞌochxoc Israel chiꞌ ichataxon yaj dꞌa sbꞌabꞌelal.