A Slolonel Dios Dꞌa Vin̈aj
AMÓS
A yaelal dꞌa yibꞌan̈ juntzan̈ nación
1
A in Amós in tic tan̈vum in nocꞌ dꞌa chon̈abꞌ Tecoa. Ayic ayoch vin̈aj Uzías reyal dꞌa Judá, axo vin̈aj Jeroboam yuninal vin̈aj Joás ayoch reyal dꞌa Israel, chabꞌ abꞌil dꞌa yalan̈tax jun nivan quixcabꞌ, ix yalan juntzan̈ lolonel tic Dios dꞌayin yic svalel dꞌa chon̈abꞌ Israel.2 Icha scꞌan̈ smacꞌvaj cꞌu, icha chiꞌ tzꞌaj yoch sjaj Jehová dꞌa jolom vitz Sion dꞌa Jerusalén. Masanil svalabꞌ luum nocꞌ nocꞌ tzꞌixtaxbꞌati, stacjipax an̈ an̈cꞌultac dꞌa jolom vitz Carmelo.
A chon̈abꞌ Siria
3 Icha tic yalan Jehová: Ix ecꞌ dꞌa yibꞌan̈ scꞌulan chucal ebꞌ aj Damasco, yuj chiꞌ yovalil ol vacꞌoch syaelal ebꞌ, yujto icha tzꞌaj stecꞌji ixim trigo, icha chiꞌ ix utaj ebꞌ aj Galaad yuj ebꞌ.
4 Yuj chiꞌ ol vacꞌoch scꞌacꞌal spat ebꞌ rey yin̈tilal vin̈aj Hazael. A jun cꞌacꞌ chiꞌ ol acꞌan lajvoquel scuartel vin̈aj Ben-adad.
5 Yovalil ol in macꞌpoj masanil spuertail chon̈abꞌ Damasco. Ol vacꞌan satel masanil ebꞌ cajan dꞌa schꞌolanil Avén yedꞌ ebꞌ yajal dꞌa Bet-edén. Yuj chiꞌ ol icꞌchajbꞌat ebꞌ sirio preso dꞌa Kir, xchi Jehová.
A schon̈abꞌ ebꞌ filisteo
6 A Jehová tzꞌalan icha tic: Man̈ jantacoc chucal ix scꞌulej ebꞌ aj Gaza, yuj chiꞌ yovalil ol vacꞌoch syaelal ebꞌ, yujto masanil anima cajan dꞌa juntzan̈ chon̈abꞌ yic Israel ix yicꞌbꞌat ebꞌ, ix schon̈anbꞌat ebꞌ checabꞌvumal dꞌa Edom.
7 Yuj chiꞌ ol vacꞌoch scꞌacꞌal smuroal Gaza chiꞌ. A jun cꞌacꞌ chiꞌ ol acꞌan lajvoquel scuartel ebꞌ.
8 Ol vacꞌ satel ebꞌ ayoch yajalil dꞌa Asdod yedꞌ pax ebꞌ yajal dꞌa Ascalón. Yedꞌ masanil in poder ol vacꞌ oval yedꞌ ebꞌ aj Ecrón, man̈xa junoc ebꞌ filisteo ol to canoc, xchi Jehová Yajal dꞌa Smasanil.
A chon̈abꞌ Tiro
9 A Jehová tzꞌalan icha tic: Man̈ jantacoc chucal ix scꞌulej ebꞌ aj Tiro, yuj chiꞌ yovalil ol vacꞌoch syaelal ebꞌ, yujto masanil anima cajan dꞌa juntzan̈ chon̈abꞌ yic Israel ix schon̈bꞌat ebꞌ checabꞌvumal dꞌa Edom, majxo snacot jabꞌoc stiꞌ yacꞌnac yedꞌ ebꞌ dꞌa amigoal.
10 Yuj chiꞌ ol vacꞌoch scꞌacꞌal smuroal Tiro chiꞌ. A jun cꞌacꞌ chiꞌ ol acꞌan lajvoquel scuartel ebꞌ, xchi Jehová.
A chon̈abꞌ Edom
11 A Jehová tzꞌalan icha tic: Man̈ jantacoc chucal ix scꞌulej ebꞌ aj Edom, yuj chiꞌ yovalil ol vacꞌoch syaelal ebꞌ, yujto ix spech ebꞌ scꞌabꞌ yoc ebꞌ chiꞌ yedꞌ qꞌuen espada, aton ebꞌ israel. Ix smacꞌcham ebꞌ dꞌa malaj yoqꞌuelcꞌolal, bꞌecan scꞌol ebꞌ ix scꞌulan chucal yedꞌ yoval scꞌool. Majxo bꞌatlaj yoval scꞌol ebꞌ chiꞌ satcꞌolal yuuj.
12 Yuj chiꞌ ol vacꞌoch scꞌacꞌal chon̈abꞌ Temán. A jun cꞌacꞌ chiꞌ ol acꞌan lajvoquel scuartel ebꞌ aj Bosra, xchi Jehová.
A chon̈abꞌ Amón
13 A Jehová tzꞌalan icha tic: Man̈ jantacoc chucal ix scꞌulej ebꞌ aj Amón, yuj chiꞌ yovalil ol vacꞌoch syaelal ebꞌ. Ayic ix yacꞌan oval ebꞌ dꞌa Galaad yic syicꞌan jabꞌocxo slum ebꞌ, ix sjac snivanil ebꞌ ix yabꞌix ebꞌ.
14-15 Yuj chiꞌ ol vacꞌoch scꞌacꞌal muro dꞌa Rabá. A jun cꞌacꞌ chiꞌ ol acꞌan lajvoquel scuartel ebꞌ. Ol el yav ebꞌ van yacꞌan oval. A dꞌa scal oval chiꞌ yedꞌ oval icꞌ ol yamchaj vin̈ sreyal ebꞌ yedꞌ ebꞌ soldado nivac yelcꞌochi. Ol icꞌjocbꞌat ebꞌ preso dꞌa chꞌoc chon̈abꞌil, xchi Jehová.