A chon̈abꞌ Moab
2
A Jehová tzꞌalan icha tic: Man̈ jantacoc chucal ix scꞌulej ebꞌ aj Moab, yuj chiꞌ yovalil ol vacꞌoch syaelal ebꞌ. Ix sn̈ustzꞌa sbꞌaquil vin̈ sreyal Edom ebꞌ, taan̈xon̈ej ix ajcan stzꞌabꞌati.2 Yuj chiꞌ ol vacꞌoch scꞌacꞌal Moab chiꞌ. A jun cꞌacꞌ chiꞌ ol acꞌan lajvoquel cuartel dꞌa Queriot. Dꞌa scal av yic oval yedꞌ yocꞌ qꞌuen trompeta, ol cham masanil ebꞌ aj Moab chiꞌ.
3 Ol vacꞌcham vin̈ sreyal ebꞌ yedꞌ ebꞌ vin̈ ayoch yedꞌ vin̈ dꞌa yopisio, xchi Jehová.
A chon̈abꞌ Judá
4 A Jehová tzꞌalan icha tic: Man̈ jantacoc chucal ix scꞌulej ebꞌ aj Judá, yuj chiꞌ yovalil ol vacꞌoch syaelal ebꞌ. Maj scha yabꞌ in cꞌaybꞌubꞌal ebꞌ, maj scꞌanabꞌajej pax in ley ebꞌ. Palta a dꞌa juntzan̈ tas malaj yelcꞌoch bꞌaj ix yaqꞌuem sbꞌa ebꞌ, aton dꞌa juntzan̈ comon dios bꞌaj yalnac sbꞌa ebꞌ smam yicham ebꞌ.
5 Yuj chiꞌ ol vacꞌoch scꞌacꞌal Judá, axo jun cꞌacꞌ chiꞌ ol acꞌan lajvoquel cuartel dꞌa Jerusalén, xchi Jehová.
A chon̈abꞌ Israel
6 A Jehová tzꞌalan icha tic: Man̈ jantacoc chucal ix scꞌulej ebꞌ aj Israel tic, yuj chiꞌ yovalil ol vacꞌoch syaelal ebꞌ. Ix schon̈el ebꞌ mebꞌaꞌ ebꞌ vachꞌ spensar dꞌa scal, yujto max yal stupan sbꞌoc ebꞌ dꞌa ebꞌ, vachꞌchom yujn̈ej stojol jun mojoc xan̈abꞌ.
7 Tzꞌixtax ebꞌ mebꞌaꞌ yuj ebꞌ, man vachꞌoc pax syutej ebꞌ sbꞌoan yaj ebꞌ mebꞌaꞌ emnaquil chiꞌ. Qꞌuixvelal in bꞌinaj yuj ebꞌ chꞌoc chon̈abꞌil yuj schucal ebꞌ. A vin̈ mamabꞌil yedꞌ vin̈ yuninal, junn̈ej ix cobꞌes smulan ebꞌ vin̈ yedꞌoc.
8 Tzꞌecꞌ jichan ebꞌ dꞌa yibꞌan̈ pichul scha bꞌaj syacꞌ tumin majanil, smulan ebꞌ dꞌa yichan̈ junjun altar. Svaan vael ebꞌ tzꞌaltaj dꞌa juntzan̈ comon dios. Sman an̈ an̈ ebꞌ yedꞌ qꞌuen multa schaꞌa, syucꞌan an̈ ebꞌ dꞌa stemplo juntzan̈ sdiosal chiꞌ, xchi Jehová.
9 Syalanxi Jehová: A in Jehová in svalaꞌ, vacꞌnac satel ebꞌ amorreo yuj vacꞌan slum ebꞌ dꞌayex. Vachꞌchom chaan̈ steel ebꞌ icha steel teꞌ cꞌuteꞌ, tzatz pax ebꞌ icha teꞌ ji, palta juneln̈ej vacꞌnac satel ebꞌ.
10 Palta a ex tic, vicꞌnaquelta ebꞌ e mam eyicham dꞌa Egipto, vicꞌannacbꞌat ebꞌ 40 abꞌil dꞌa tzꞌinan luum, yuj vacꞌan slum ebꞌ amorreo chiꞌ dꞌa ebꞌ.
11 Ix vicꞌchaan̈ juntzan̈ ebꞌ eyin̈tilal in checabꞌoc, axo juntzan̈xo ebꞌ, vacꞌnacoch ebꞌ nazareoal yic tzꞌoch ebꞌ vicoc. ¿Tom man̈ yeloc juntzan̈ tic, ex israel?
12 A exxo tic, ix eyacꞌ pural ebꞌ vicxo chiꞌ yucꞌvi an̈, ix e cachan ebꞌ in checabꞌ yic max yalel in lolonel ebꞌ.
13 Yuj chiꞌ nivan yaelal ol vacꞌcot dꞌa eyibꞌan̈, ol ex cꞌacvoc yuuj icha sn̈achꞌachꞌi junoc carreta al yaj yuj ixim trigo.
14 A dꞌa jun cꞌual chiꞌ, a ebꞌ jelan sbꞌeyi, man̈xo ol yal-laj yel ebꞌ, axo ebꞌ te ay yip, ichato man̈xa jabꞌoc yip ebꞌ. A ebꞌ soldado tecꞌan, man̈xo ol yal scolan sbꞌa ebꞌ.
15 A mach sjulvaj yedꞌ jul-labꞌ, man̈xo ol yal stecꞌbꞌan sbꞌa. Man̈xo ol yal scolan sbꞌa ebꞌ jelan sbꞌeyi, man̈xo ol yalpax scolan sbꞌa ebꞌ tzꞌel lemnaj ayqꞌue dꞌa yibꞌan̈ nocꞌ chej.
16 A in Jehová in svalaꞌ to a dꞌa jun cꞌual chiꞌ, a ebꞌ jelan dꞌa oval, ol yactejcan syamcꞌabꞌ ebꞌ yic oval, ol bꞌat ebꞌ elelal, xchi Jehová.