A smunlajel ebꞌ schecabꞌ Dios
3
Ex chon̈abꞌ Israel, abꞌec tas sval a in Jehová in tic. A in ton vicꞌnaquelta ebꞌ e mam eyicham dꞌa Egipto.2 A exn̈ej tic ix ex in sicꞌcanel dꞌa scal masanil juntzan̈xo chon̈abꞌ ay dꞌa yolyibꞌan̈qꞌuinal tic. Yuj chiꞌ ol vacꞌoch eyaelal yuj masanil chucal tze cꞌulej.
3 Tato ay chavan̈oc junn̈ej sbꞌeyi, syalelcꞌochi to vachꞌ yacꞌan ebꞌ.
4 Tato tzꞌel yav nocꞌ choj dꞌa caltac teꞌ, syalelcꞌochi to toxo ix yamchaj schibꞌej nocꞌ. Tato tzꞌel yav nocꞌ yuneꞌ choj dꞌa svaynubꞌ dꞌa yoltac n̈aqꞌueen, syalelcꞌochi to ay tas ix yamchaj yuj nocꞌ.
5 Tato tzꞌem junoc nocꞌ much dꞌa sat luum, syalelcꞌochi to ay junoc yaal ayemi. Tato sqꞌue ritnaj jun yaal ayem dꞌa sat luum chiꞌ, ay tas toxo ix can dꞌay.
6 Tato spuchaj qꞌuen trompeta, syacꞌ lista sbꞌa ebꞌ soldado. Tato ay junoc yaelal tzꞌecꞌ dꞌa scal chon̈abꞌ, syalelcꞌochi to a in svacꞌcoti.
7 Malaj junoc tas tzin cꞌulej tato manto val-laj dꞌa ebꞌ in checabꞌ.
8 Tato tzꞌel yav nocꞌ choj, ¿tom ay junoc mach max xivqꞌuei? Axo pax ebꞌ in checabꞌ ¿tom man̈ ol yalel in lolonel ebꞌ tato a in tzin chec yal ebꞌ? xchi Jehová.
Ol juchajem chon̈abꞌ Samaria
9 Laj alequel dꞌa scuartel chon̈abꞌ Asdod yedꞌ dꞌa scuartel chon̈abꞌ Egipto: Cotan̈ec dꞌa jolomtac vitz dꞌa spatictac chon̈abꞌ Samaria. Ilec val somchaj ebꞌ anima yuj yixtan yetanimail, xe chi.
10 A Jehová tzꞌalan icha tic: Man̈ yojtacoc jabꞌoc ebꞌ scꞌulan tojolal. Dꞌa yoltac spat ebꞌ ay masanil tas ton̈ej syiqꞌuecꞌ ebꞌ dꞌa anima, xchi Jehová chiꞌ.
11 Yuj chiꞌ syal Jehová, aton Yajal yaji: A jun ajcꞌol ol javoc ol och oyan dꞌa snación ebꞌ tic, ol yacꞌan lajvoquel scuartel ebꞌ, ol yicꞌanelta masanil tas ay dꞌa yol sdespacho ebꞌ, xchi Jehová chiꞌ.
12 Icha tic yalan Jehová: Icha chabꞌoc yoc nocꞌ calnel, ma jabꞌoc sn̈iꞌ schiquin nocꞌ scolchajcanel yuj stan̈vumal dꞌa yol stiꞌ junoc nocꞌ choj, icha chiꞌ ol aj ebꞌ israel cajan dꞌa Samaria, aton ebꞌ te vachꞌ svaynubꞌ bꞌaj svayi.
13 Abꞌec a ex tic, tzeyalan dꞌa ebꞌ yin̈tilalcan vin̈aj Jacob, a in Jehová Dios, Yajal in dꞌa Smasanil svalaꞌ:
14 A dꞌa jun cꞌual ol vacꞌoch yaelal dꞌa yibꞌan̈ Israel yuj chucal scꞌulej, ol in pojem masanil yaltar dꞌa Betel. A schiquintac juntzan̈ altar chiꞌ ol macꞌchajem dꞌa sat luum.
15 A in Jehová in svalaꞌ, ol vacꞌ lajvoquem pat scꞌanchaj dꞌa stiempoal siic yedꞌ juntzan̈ scꞌanchaj dꞌa stiempoal cꞌacꞌ. Ol vacꞌ lajvoc masanil juntzan̈ pat ayoch qꞌuen marfil yelvanubꞌoc, ol in juanbꞌat juntzan̈ nivac pat chiꞌ, xchi.