4
Ex ix, bꞌaqꞌuech ex yuj e bꞌeyumal icha nocꞌ vacax dꞌa Basán, ex cajan ex dꞌa tzalan yic chon̈abꞌ Samaria, abꞌec val jun tic: Tzeyixtej ebꞌ mebꞌaꞌ yedꞌ ebꞌ ilbꞌajcꞌol yilji, tzeyalan dꞌa ebꞌ vin̈ eyetbꞌeyum: Iqꞌueccot an̈ an̈ to scuqꞌuej an̈, xe chi.2 A Jehová aton Yajal yaji, ix sloc sbꞌi ix yacꞌan stiꞌ, ix yalani: Ol cꞌoch scꞌual, ol acꞌchajoch gancho dꞌayex, ol ex n̈erchajbꞌeyoc, axo ebꞌ eyuneꞌ, ol och locan anzuelo dꞌa ebꞌ, ol jachchajbꞌat ebꞌ.
3 A in Jehová in svalaꞌ, tzololixon̈ej ol aj eyicꞌchajel bꞌaj ol macꞌchaj poj pat chiꞌ, ol ex icꞌchajpaxbꞌat dꞌa najat.
Jun cachnabꞌil dꞌa qꞌuexan lolonel
4 Ixiquec dꞌa Betel yedꞌ dꞌa Gilgal, tzeyacꞌanoch e mul icha e gana taꞌ. Slajvi chiꞌ tzeyacꞌan eyofrenda dꞌa junjun qꞌuin̈ibꞌalil, dꞌa schabꞌjial tzeyacꞌanpax e diezmo.
5 N̈usec ixim pan ay yich dꞌa ofrendail yuj e acꞌoj yuj diosal. Alequel dꞌa scal anima yuj jantac eyofrenda tzꞌel dꞌa e cꞌool eyacꞌani, yujto icha chiꞌ e gana tze cꞌulej.
6 Yuj chiꞌ, ix vacꞌ eyabꞌ syail vejel dꞌa masanil yol e chon̈abꞌ tic, palta man̈ yujoc chiꞌ ix ex meltzajcot dꞌayin.
7 Ix vacꞌanoch vaan n̈abꞌ dꞌa oxeꞌ ujal ayic manto elul sat eyavbꞌen. Ix yacꞌ n̈abꞌ dꞌa jun chon̈abꞌ, axo dꞌa junxo, maay. Ay bꞌaj ix yacꞌ n̈abꞌ chiꞌ, ay bꞌaj maay, yuj chiꞌ ix tacjiel masanil eyavbꞌen.
8 Chabꞌ oxeꞌ chon̈abꞌil ex ix ex bꞌat sayoj aꞌ dꞌa junocxo chon̈abꞌ, palta maj yabꞌlaj aꞌ yic tzꞌecꞌ staquin̈al e tiꞌ. Tocval yuj chiꞌ ix ex meltzajcot dꞌayin.
9 Ix vacꞌ eyaelal yedꞌ icꞌ te cꞌacꞌ yedꞌ juntzan̈xo yaelal, ix vacꞌan ixtax tas tzeyavej yedꞌ eyuva. Axo nocꞌ cꞌulubꞌ ix cꞌuxanbꞌat teꞌ eyigo yedꞌ teꞌ eyolivo. Tocval yuj chiꞌ ix ex meltzajcot dꞌayin.
10 Ix vacꞌcot juntzan̈ yaelal dꞌa eyibꞌan̈, icha val ix aj vacꞌanbꞌat yaelal dꞌa Egipto. Ix cham ebꞌ e quelemtac dꞌa scal oval, axo ebꞌ eyajcꞌol chiꞌ ix icancan nocꞌ e chej, ix eyabꞌan sjabꞌ chamnac ayecꞌ dꞌa e campamento. Tocval yuj chiꞌ ix ex meltzajcot dꞌayin.
11 Ix ex vacꞌ lajvoquem icha ix aj vacꞌan lajvoquem chon̈abꞌ Sodoma yedꞌ Gomorra, yuj chiꞌ a ex ixto ex can tic, icha junoc cuxcꞌacꞌ tzꞌicꞌchajcanelta dꞌa yol cꞌacꞌ, icha val chiꞌ eyaji. Tocval yuj chiꞌ ix ex meltzajcot dꞌayin.
12 Icha chiꞌ ol ex vutej ex aj Israel. Yuj chiꞌ bꞌoec e bꞌa, yujto ol eyil-laj och e sat vedꞌoc a in e Diosal in tic.
13 A in Jehová in, ix in bꞌo nivac vitz yedꞌ icꞌ, svacꞌan yojtaquejel ebꞌ anima tas nabꞌil vuuj. A in svacꞌ meltzajoch saquilqꞌuinal dꞌa qꞌuicꞌalqꞌuinalil, chaan̈ tzin bꞌeyecꞌ dꞌa yibꞌan̈ lum luum. A in bꞌi, aton Jehová Dios, Yajal in dꞌa Smasanil, xchi Jehová chiꞌ.