Tzꞌavtaj chon̈abꞌ Israel yic sna sbꞌa
5
Ex vetisraelal, abꞌec val in lolonel yic cuscꞌolal svalcanel dꞌa eyibꞌan̈:2 A co chon̈abꞌ tic, toxo ix lajviel yuj oval. Lajan icha junoc ix cobꞌes ix, ix lajvi yuj qꞌuen espada, ix can telan dꞌa sat sluum, malaj mach scolani yic sqꞌue vaan. Ix actajcan schꞌocoj dꞌa slugar, malaj mach tzꞌicꞌanqꞌue vaan.
3 A Jehová Yajal tzꞌalan dꞌayex icha tic: Tato a junoc e chon̈abꞌ tzꞌacꞌanbꞌat junoc mil soldado dꞌa oval, axon̈ej cien ol meltzajoc. Tato ay junocxo e chon̈abꞌ tzꞌacꞌanbꞌat cien soldado, axon̈ej lajun̈van̈ ol meltzajoc, xchi.
4 A Jehová tzꞌalan dꞌayex icha tic: Meltzajan̈ec dꞌayin, yic man̈ ol ex chamoc.
5 Man̈ ex bꞌat dꞌa chon̈abꞌ Betel yedꞌ dꞌa Gilgal, man̈ ex bꞌatpax dꞌa Beerseba, yujto a ebꞌ aj Gilgal chiꞌ, yovalil ol bꞌatcan ebꞌ preso dꞌa junoc chꞌoc nacional, axo Betel chiꞌ, yovalil ol juvoccanbꞌatoc, xchi.
6 Meltzajan̈ec dꞌa Jehová yic man̈ ol ex chamoc. Tato maay, ol yacꞌcot cꞌacꞌ dꞌa yibꞌan̈ e macbꞌen tic, malaj junoc mach dꞌa Betel ol yal yacꞌan tupoc.
7 A ex val tze qꞌuex tojolal dꞌa chucal, obꞌiltac ex, yujto max e bꞌo yaj ebꞌ anima dꞌa vachꞌilal.
8 Meltzajan̈ec dꞌa Jehová, aton bꞌoannac qꞌuen cꞌanal scuchan Mootz yedꞌ pax qꞌuen cꞌanal scuchan Oxdꞌilan̈. A pax tzꞌacꞌanoch qꞌuicꞌalqꞌuinal dꞌa saquilqꞌuinal, syacꞌpaxoch saquilqꞌuinal chiꞌ dꞌa qꞌuicꞌalqꞌuinalil. Aton pax tzꞌavtan a aꞌ ay dꞌa aꞌ mar, secanem dꞌa yibꞌan̈ lum luum. 9 A tzꞌacꞌan lajvoquel ebꞌ soldado tecꞌan, slajvipaxcanem scuartel ebꞌ yuuj, Jehová sbꞌi.
10 Obꞌiltac ex val, a ex schichonoch e cꞌool dꞌa mach sbꞌoan tojolal bꞌaj tzꞌoch bꞌeycꞌolal, tzeyacꞌan chucal dꞌa junoc tzꞌacꞌan testigoal dꞌa yel.
11 To tzeyixtej val ebꞌ mebꞌaꞌ, tzeyicꞌanecꞌ strigo ebꞌ anima dꞌa nabꞌan̈ej. Man̈ ol yal-laj eyajecꞌ dꞌa e pat bꞌobꞌil dꞌa qꞌuen qꞌueen, man̈xo ol yal pax eyucꞌan yal sat teꞌ uva ix eyavej.
12 Vojtac jantac juntzan̈ chucal ix e cꞌulej. Man̈xalaj slajvubꞌ e mul. Tzeyixtej ebꞌ vachꞌ spensar, tze chaan qꞌuen tumin yic man̈ vachꞌoc tzeyutej e bꞌoan yaj ebꞌ anima. A dꞌa juzgado tzeyacꞌoch dꞌa yibꞌan̈ ebꞌ mebꞌaꞌ anima vachꞌ spensar.
13 Yuj chiꞌ a mach ay spensar, tzꞌem numan, yujto chucxon̈ej tas tzuji ticnaic.
14 Man̈xo e cꞌulej chucal. A vachꞌil tze cꞌulej yic vachꞌ man̈ ol ex chamoc. Tato icha chiꞌ, a Jehová Yajal dꞌa Smasanil, dꞌa val yel ol ajn̈ejecꞌ eyedꞌoc, icha tzꞌaj eyalan chiꞌ.
15 Yajequel chucal. A vachꞌil tze xajanej. Scham eyilani tato vachꞌxo tzꞌaj schꞌolbꞌitaj yaj anima dꞌa juzgado. Tecan icha chiꞌ ol ocꞌ scꞌol Jehová Yajal dꞌa Smasanil dꞌayex mach ex yin̈tilal ex can vin̈aj José.
16 A Jehová Yajal dꞌa Smasanil tzꞌalan icha tic: Ol och cuscꞌolal dꞌa masanil bꞌajtac smolbꞌej sbꞌa anima. A dꞌa masanil yoltac calle ol och av yic yaelal, ol avtaj ebꞌ munlajvum yic tzul ocꞌ ebꞌ yedꞌ ebꞌ yopisio taxon yoqꞌui.
17 Ayic ol in javoc vacꞌoch yaelal, ol te ocꞌ ebꞌ avum uva, xchi Jehová.
18 Obꞌiltac val mach snibꞌej sjavi scꞌual yic yoval scꞌol Jehová. ¿Eyojtac ama tas ol ex aj dꞌa jun cꞌual chiꞌ? A jun cꞌual chiꞌ, qꞌuicꞌalqꞌuinal xon̈ej ol ajoc, man̈xa saquilqꞌuinal.
19 A dꞌa jun cꞌual chiꞌ, lajan val ol aj ebꞌ anima icha junoc mach tzꞌel lemnaj dꞌa junoc nocꞌ choj, axo bꞌaj ayecꞌ junoc nocꞌ oso bꞌen̈ej scꞌochi, ma icha yic tzꞌoch junoc mach dꞌa yol spat, tzꞌoch ijan dꞌa sat qꞌuilabꞌ yalani, axo pax junoc nocꞌ chan schiꞌan taꞌ.
20 A jun cꞌual yic yoval scꞌol Jehová chiꞌ, te qꞌuicꞌalqꞌuinal ol ajoc, man̈xa jabꞌoc saquilqꞌuinal ol checlajoc.
21 Ix yalan Jehová icha tic: Tzin yajaꞌ, malaj in gana juntzan̈ qꞌuin̈ tzeyacꞌochi. Malaj in gana dꞌa e molanil nivan yelcꞌoch eyalani.
22 Malaj in gana dꞌa e silabꞌ tzeyacꞌ dꞌayin yuj in eyicꞌanchaan̈, malaj in gana dꞌa ixim trigo tzeyacꞌ eyofrendaoc. Max in chapax nocꞌ vacax bꞌaqꞌuech tzeyacꞌ silabꞌil dꞌayin yuj e juncꞌolal vedꞌoc eyalani.
23 Najat tzex el dꞌa in tzꞌey ayic tzꞌoch e jaj e bꞌitani. Man̈xa in gana svabꞌ yoch sjaj eyarpa chiꞌ.
24 Palta a tas in gana dꞌayex to tze bꞌeybꞌalej tojolal icha sbꞌey a aꞌ. Man̈ eyactej e cꞌulan vachꞌil icha junoc sjaj a aꞌ max tupi.
25 A ex val tic ex israel, a dꞌa 40 abꞌil ecꞌnac ebꞌ e mam eyicham dꞌa lum tzꞌinan luum. ¿Tocval a dꞌayin sn̈usnac silabꞌ ebꞌ yedꞌ ofrenda taꞌ? 26 Maay, palta a ebꞌ chiꞌ, scuchnac bꞌeyecꞌ yen̈ul yibꞌan̈ jun sdiosal ebꞌ scuch Moloc yedꞌ sbꞌachnubꞌal yechel jun dios Quiún yajbꞌentac, sbꞌonac yechel qꞌuen cꞌanal ebꞌ sdiosaloc, an̈ejaꞌ icha chiꞌ tze cꞌulej a ex tic. 27 Yuj chiꞌ ol ex vacꞌbꞌat preso dꞌa yichan̈bꞌat Damasco. Icha chiꞌ tzꞌaj valan a in Jehová Yajal in dꞌa Smasanil, xchi Jehová chiꞌ.