Ol juchajem chon̈abꞌ Israel
6
Obꞌiltac ex mach ex secojtac tzꞌaj yecꞌ eyuj dꞌa Sion. Obꞌiltac ex malaj tas tze naꞌ dꞌa Samaria, ex yajalil nación to nivan eyelcꞌoch eyalani, a ex ton tzeyacꞌoch Israel yipoc e cꞌool.2 A ex tic tzeyal icha tic: Ixiquec dꞌa chon̈abꞌ Calne, tzeyilan sicꞌlabꞌil. Axo taꞌ tzex bꞌatpax dꞌa nivan chon̈abꞌ Hamat, tzex emul dꞌa Gat dꞌa yol yic ebꞌ filisteo. ¿Tom te vachꞌ juntzan̈ chon̈abꞌ chiꞌ dꞌa quichan̈? ¿Tom te nivac juntzan̈ nación chiꞌ dꞌa yichan̈ co nación tic? xe chi.
3 A ex tic, malaj e gana tze naꞌa tato van sja jun scꞌual yaelal, palta a yuj tas tze cꞌulej, van slacꞌanbꞌi ul jun scꞌual yaelal chiꞌ.
4 A ex tic, a bꞌaj tzex em tzꞌeyan e vaꞌi, yelxo te vachꞌ yilji. Nivan vael tzeyacꞌaꞌ ayic tze chiꞌan nocꞌ yunetac calnel yedꞌ nocꞌ quelemtac vacax bꞌaqꞌuech.
5 Ton̈ej tzꞌecꞌ tiempo e bꞌoan juntzan̈ bꞌit malaj yelcꞌochi, tze bꞌitan yedꞌ sonal teꞌ arpa icha scꞌulejnac vin̈aj rey David.
6 Dꞌa yol nivac vaso tzeyucꞌ vino. A perfume vachꞌ tze cꞌanaꞌ, palta man̈ jabꞌoc tzeyacꞌ pensar tato van yixtaxel yol e nación.
7 A ex tic, bꞌabꞌel ol ex bꞌatcan preso dꞌa chꞌoc chon̈abꞌil, icha chiꞌ ol aj slajviel e qꞌuin̈ bꞌaj tzex bꞌulbꞌulan chiꞌ.
8 Toxo ix sloc sbꞌi Jehová yacꞌan stiꞌ, aton Yajal dꞌa Smasanil. A tzꞌalan icha tic:
Tzin yaj yicꞌojchan̈bꞌail jun chon̈abꞌ yin̈tilal vin̈aj Jacob tic.
Man̈ val jabꞌoc scha in cꞌol snivac pat ebꞌ, yuj chiꞌ ol vacꞌoch jun chon̈abꞌ tic dꞌa yol scꞌabꞌ ebꞌ ajcꞌool yedꞌ masanil tas ay dꞌay, xchi Jehová chiꞌ.
9 Yuj chiꞌ, tato ay lajun̈van̈oc ebꞌ vin̈ vinac dꞌa junoc pat, ol cham ebꞌ vin̈ slajun̈van̈il. 10 A junoc scꞌabꞌ yoc juntzan̈ chamnac chiꞌ ol icꞌanelta snivanil ebꞌ dꞌa yol pat yic ol tzꞌaoc, ol yalan dꞌa yaln̈ej mach aycan dꞌa yol chiꞌ: ¿Aytom mach ayecꞌ edꞌoc? xchama. Axo junxo chiꞌ ol tacꞌvoc: Malaj mach, xchama. Ol yalanpax jun ix cꞌanbꞌan chiꞌ: Tzꞌin xa chi, axo talaj tzꞌaji, tzacꞌ bꞌinaj Jehová, xchama. 11 Yujto ol yacꞌcot yaelal Jehová dꞌa yibꞌan̈ masanil pat, juntzan̈ nivac pat yedꞌ juntzan̈ cotac pat, masanil ol ixtaxcanbꞌatoc.
12 ¿Tom syal sqꞌue nocꞌ chej dꞌa sat qꞌuen tenam? ¿Tom syal smunlaj nocꞌ vacax sdꞌocan luum dꞌa yibꞌan̈ aꞌ mar? Palta a ex tic, ix e qꞌuex tojolal dꞌa tas tzꞌixtanel anima. A juntzan̈ bꞌeybꞌal vachꞌ, tzeyalaꞌ to chuc.
13 A ex tic, toxon̈ej tzeyicꞌchan̈ e bꞌa, yujto ix telvi chon̈abꞌ Lodebar eyuuj, palta tocval ay jabꞌoc yelcꞌochi. Tzeyalanpaxi to syal eyuuj, yujto ix eyicꞌ yuneꞌ chon̈abꞌ Carnaim.
14 Scham val eyilan a ex israel ex tic. A Jehová Dios Yajal dꞌa Smasanil tzꞌalan icha tic: Ol in chec junoc nación yic syiqꞌuecꞌ e luum dꞌa Hamat dꞌa yol smojonal dꞌa stojolal norte, masanto scꞌoch dꞌa a aꞌ ayoch smojonal dꞌa stojolal sur, ol ex och dꞌa syaelal yuuj, xchi Jehová chiꞌ.