—Mamin Jehová, ocꞌocabꞌ a cꞌool dꞌayon̈ a on̈ yin̈tilal on̈can vin̈aj Jacob tic, ina to yuneꞌ chon̈abꞌ on̈n̈ej. ¿Tas val ol aj stechaj jun tic cuuj? xin chi.

3 Ix snaan sbꞌa Jehová yuj jun tic, ix yalan icha tic:

—A jun tic man̈ ol ujoclaj, xchi.

4 Ix schꞌoxanpax Jehová Yajal junxo tic dꞌayin. Ix yacꞌlabꞌej cꞌacꞌ yic syacꞌanoch yaelal, chac xilinac stzacꞌaqꞌuil. Ix tacji aꞌ nivan mar yuuj, van stacjipax lum slumal chon̈abꞌ Israel. 5 Ix valani:

—Mamin Jehová, ocꞌocabꞌ a cꞌool, ochan̈ vaan. ¿Tom val ol techaj cuj a on̈ yin̈tilal on̈can vin̈aj Jacob tic? Ina to yuneꞌ chon̈abꞌ on̈, xin chi.

6 Ix snaan sbꞌa Jehová yuj tas nabꞌil yuuj, ix yalan icha tic:

—Man̈ ol ujocpax jun tic, xchi.

7 Ix schꞌoxanpax junxo tic Jehová dꞌayin. Ix vilani lin̈anecꞌ dꞌa sat jun pat bꞌobꞌil yedꞌ plomo, yubꞌbꞌilpaxqꞌue jun plomo chiꞌ yuuj. 8 Ix scꞌanbꞌan dꞌayin icha tic:

—¿Tas tzil chiꞌ Amós? xchi.

—A jun qꞌuen plomo yic ebꞌ bꞌoum pat svilaꞌ, xin chi.

—Icha tzꞌaj yilji junoc sat pat yedꞌ qꞌuen plomo, icha chiꞌ ol aj vilani chajtil yilji in chon̈abꞌ Israel tic, tato tojol sbꞌeybꞌal, mato maay. Tato chuc, man̈xo ol vacꞌ nivancꞌolal schucal chiꞌ. 9 A juntzan̈ bꞌaj syal sbꞌa ebꞌ yin̈tilal vin̈aj Isaac dꞌa jolomtac vitz, ol lajvoquemoc. A juntzan̈ stemplo ebꞌ aj Israel, ol juchajemoc, ol in checan satjoquel yin̈tilal vin̈aj Jeroboam yedꞌ qꞌuen espada, xchi Jehová.

10 A vin̈aj Amasías sacerdote yaj dꞌa Betel, a vin̈ ix checan alchaj dꞌa vin̈aj Jeroboam sreyal Israel icha tic: Mamin rey, a vin̈aj Amós, van yecꞌ vin̈ dꞌa scal ebꞌ quetchon̈abꞌ, yic tzꞌoch ebꞌ ajcꞌolal dꞌayach. Maxtzac techaj yuj ebꞌ anima yuj tas syalel vin̈ chiꞌ. 11 Tzꞌecꞌ vin̈ dꞌa co cal yal icha tic: Dꞌa qꞌuen espada ol cham vin̈aj Jeroboam, ol icꞌchajcanbꞌat masanil chon̈abꞌ Israel tic preso dꞌa chꞌoc chon̈abꞌil, xchi vin̈, xchibꞌat vin̈.

12 Ix yalan vin̈aj Amasías dꞌayin Amós in tic icha tic:

—Elan̈ dꞌa tic ach schecabꞌ Dios. Ixic dꞌa Judá, ataꞌ ol acꞌchaj a vael yuj tas tzal chiꞌ. 13 Palta malaj tas tzal dꞌa chon̈abꞌ Betel tic, yujto a dꞌa tic tzꞌoch vin̈ rey ejmelal, to nivan templo yaj dꞌa yol smacbꞌen vin̈, xchi vin̈aj Amasías chiꞌ.

14 Palta ix in tacꞌvi Amós a in tic icha tic:

—A in tic, man̈ in schecabꞌoctaxon Dios, malaj pax in gana tzin schecabꞌej. A in tic tan̈vum in vacax, molum in pax sat caltacteꞌal higo. 15 Palta a Jehová ix in icꞌanel dꞌa spatic nocꞌ vacax chiꞌ, ix yalan dꞌayin icha tic: Ixic, bꞌat alel in lolonel dꞌa in chon̈abꞌ Israel, xchi dꞌayin. 16 Yuj chiꞌ scham val abꞌan slolonel Jehová ticnaic ach Amasías. Aton juntzan̈ lolonel ix al dꞌayin icha tic: Man̈ alel slolonel Dios dꞌa scal ebꞌ israel yin̈tilal vin̈aj Isaac, xa chi dꞌayin. 17 Yuj chiꞌ a juntzan̈ tic syal Jehová dꞌayach: Dꞌa yichan̈ chon̈abꞌ ol och ix etbꞌeyum dꞌa ajmul ixal. A ebꞌ vin̈ uninal yedꞌ ebꞌ ix isilal, ol xicjoccham ebꞌ. Ol pojchajcanecꞌ a luum. Axo dꞌa slum ebꞌ chꞌoc chon̈abꞌil ol ach chamoc, axo ebꞌ quetisraelal, najatto ol icꞌchajcanbꞌat ebꞌ preso, xchi Jehová, xin chi.