A smoochal sat avbꞌen qꞌuin̈xo
—¿Tas tzil chiꞌ Amós? xchi dꞌayin.
—A jun mooch sat avbꞌen qꞌuin̈xo svilaꞌ, xin chi dꞌay.
Ix yalanxi dꞌayin icha tic:
—A Israel, ichaval to toxo ix qꞌuin̈bꞌi. Man̈xo ol vacꞌxi nivancꞌolal. 3 Ayic ol vacꞌanoch syaelal ebꞌ chiꞌ, a ebꞌ ix ix sbꞌitan dꞌa spatil ebꞌ yajal, ol ocꞌ ebꞌ ix yuj cuscꞌolal. Tzijtum anima ol chamoc, ol can teljabꞌ snivanil ebꞌ. Malaj tas ol abꞌchajoc, xchi Jehová.
Lacꞌanxo sjavi bꞌeycꞌolal dꞌa yibꞌan̈ Israel
4 Scham e maclan eyabꞌ juntzan̈ lolonel tic, mach ex tzeyixtej ebꞌ emnaquil yeqꞌui yedꞌ ebꞌ mebꞌaꞌ dꞌa chon̈abꞌ tic. 5 Tzeyalan dꞌa yoltac e pat dꞌa qꞌuin̈ ayic tzꞌalji qꞌuen uj: ¿Bꞌaqꞌuin̈ ol lajvoc yecꞌ jun qꞌuin̈ tic yic syal co chon̈an co trigo? ¿Bꞌaqꞌuin̈ ol lajvoc yecꞌ scꞌual icꞌoj ip, yic ol yal co chon̈anxi sat cavbꞌen, ol cacꞌlabꞌan echlabꞌ man̈ tzꞌacanoc, axo stojol nivan ol co cꞌanaꞌ? 6 Ol co chon̈anpax scꞌaelal ixim trigo. Ol quixtej juntzan̈ ebꞌ mebꞌaꞌ tic, masanto ol yal schon̈anel sbꞌa ebꞌ dꞌayon̈, yic tzꞌoch ebꞌ co checabꞌoc. Icha chiꞌ ol aj stupanel sbꞌoc ebꞌ dꞌayon̈, vachꞌchom jabꞌn̈ej sbꞌoc ebꞌ chiꞌ icha stojol jun mojoc xan̈abꞌ, xe chi. 7 Yuj chiꞌ ix yacꞌ stiꞌ Jehová sDiosal vin̈aj Jacob, ix yalan icha tic: Malaj bꞌaqꞌuin̈ ol bꞌat e chucal satcꞌolal vuuj, xchi.
8 Yuj chiꞌ ol ibꞌxocqꞌue lum luum, ol ocꞌ masanil ebꞌ cajan dꞌa sat luum. Masanil jun chon̈abꞌ tic ol ibꞌxocqꞌuei, ol qꞌue lum dꞌa chaan̈, ol empax luum icha tzꞌaj aꞌ Nilo, sqꞌuibꞌqꞌue aꞌ, stupxiem aꞌ.
9 A in Jehová in sval yuj jun cꞌual chiꞌ: Dꞌa chimcꞌualil, ol vaqꞌuem cꞌu, ol och qꞌuicꞌalqꞌuinal dꞌa cꞌualil.
10 A in ol vacꞌoch scꞌual e qꞌuin̈ dꞌa cuscꞌolal. Axo e bꞌit yuj tzalajcꞌolal ol vacꞌoch dꞌa oqꞌuel yuj chamel. Axo pichul yic cuscꞌolal ol eyacꞌochi, ol e joxanel xil e jolom yuj e chꞌoxanel e cuscꞌolal. Ol ex ocꞌ icha junoc mach tzꞌocꞌ yuj junoc cꞌotan̈ yuninal ix chami. Cuscꞌolal ol aj slajvi masanil.
11 Ay val jun cꞌual ol vacꞌcot vejel dꞌa yolyibꞌan̈qꞌuinal tic. Man̈ vejeloc yuj vael, man̈ taquin̈tialoc yuj a aꞌ, palta vejel yic tzꞌabꞌchaj in lolonel. A in Jehová Syal Vuj Masanil, a in svalaꞌ.
12 A ebꞌ anima, toxon̈ej ol bꞌeyecꞌ ebꞌ sayanecꞌ mach tzꞌalan in lolonel. Ol bꞌat ebꞌ dꞌa stitac aꞌ mar Muerto, masanto ol cꞌoch ebꞌ dꞌa stitac aꞌ mar Mediterráneo, ol ecꞌchaj ebꞌ dꞌa schan̈il pacꞌan̈ yolyibꞌan̈qꞌuinal, palta malaj mach ol ilchaj yuj ebꞌ.
13 A dꞌa jun cꞌual chiꞌ, a ebꞌ ix cobꞌestac te vachꞌ yilji yedꞌ ebꞌ quelemtac te tecꞌan, ol el yip ebꞌ yuj taquin̈tial.
14 Icha chiꞌ ol aj ebꞌ syacꞌ stiꞌ dꞌa juntzan̈ yechel qꞌuixvelaltac ay dꞌa Samaria, aton ebꞌ tzꞌalan icha tic: Svacꞌ in tiꞌ dꞌa sbꞌi sdiosal ebꞌ aj Dan, ma dꞌa sbꞌi sdiosal ebꞌ aj Beerseba, xchi ebꞌ. Yuj chiꞌ man̈xa bꞌaqꞌuin̈ ol qꞌue vaan ebꞌ, xchi Jehová.