Ol satjoquel chon̈abꞌ Israel
9
Axo ix vilani ayecꞌ Jehová dꞌa stzꞌey jun altar, ix yalan dꞌayin icha tic:Macꞌ yoyal templo tic, masanto tzꞌibꞌxiqꞌue sjolom yoyal chiꞌ, tzꞌem vecnaj dꞌa yibꞌan̈ ebꞌ anima. Tato ayto mach scani, axo yedꞌ qꞌuen espada ol vacꞌcham ebꞌ. Vachꞌchom olto snael sbꞌa ebꞌ, palta man̈xo junoc mach olto colchajcaneloc.
2 Vachꞌchom scꞌubꞌejel sbꞌa ebꞌ dꞌa sjulal yich bꞌaj ay ebꞌ chamnac, ol yal vicꞌanqꞌueta ebꞌ taꞌ. Vachꞌchom sqꞌue ebꞌ dꞌa satchaan̈ yalani, palta ataꞌ ol viqꞌuemta ebꞌ.
3 Tato sbꞌat ebꞌ scꞌubꞌejel sbꞌa dꞌa jolom vitz Carmelo, palta ataꞌ ol bꞌat in yamcot ebꞌ. Tato sbꞌat ebꞌ scꞌubꞌejel sbꞌa dꞌayin dꞌa yich aꞌ mar yalani, ol in checbꞌat nocꞌ nivac nocꞌ ay dꞌa yol aꞌ mar chiꞌ, yic schijibꞌat ebꞌ yuj nocꞌ.
4 Vachꞌchom ol ex yicꞌbꞌat ebꞌ ajcꞌol dꞌa chꞌoc chon̈abꞌil, ol bꞌat ex in chec xicjoccham yedꞌ qꞌuen espada. Ol vacꞌanbꞌat yaelal dꞌa eyibꞌan̈, man̈oc vachꞌilal ol vacꞌbꞌati, xchi Jehová.
5 Ayic syaman lum luum tic Jehová Yajal dꞌa Smasanil, tzꞌibꞌxiqꞌue luum, axo ebꞌ anima smasanil, tzꞌocꞌqꞌue ebꞌ. Toxon̈ej sqꞌuei tzꞌem lum yuj spoder, icha val syutej sbꞌa aꞌ Nilo.
6 A dꞌa satchaan̈ ix sbꞌo scajnubꞌ, ichato dꞌa yibꞌan̈ lum luum tic ix sbꞌoem yich. Syavtejcot a aꞌ dꞌa aꞌ mar yic scot secnaj aꞌ dꞌa yibꞌan̈ lum luum tic. Jehová ton sbꞌi.
7 A Jehová tzꞌalan icha tic: A dꞌa yol in sat a ex israel ex tic, lajan ex yedꞌ ebꞌ aj Etiopía. Icha ix aj ex vicꞌancot dꞌa Egipto, icha pax chiꞌ ix aj vicꞌancot ebꞌ filisteo dꞌa Creta yedꞌ ebꞌ amorreo dꞌa Quir, xchi.
8 A in Jehová in svil jun nación te chuc tic, svalan icha tic: Ol in satel dꞌa sat lum luum tic. Palta a in Jehová in svalaꞌ to man̈ ol in satel-laj ebꞌ yin̈tilal vin̈aj Jacob tic dꞌa juneln̈ej.
9 Ol in chec chayjoc ebꞌ yin̈tilal Israel tic dꞌa caltac nación, ichaval tzꞌaj schaychaj ixim trigo dꞌa yol chaylabꞌ to malaj junoc sat ixim tzꞌeli.
10 Masanil ebꞌ chuc dꞌa in chon̈abꞌ tic, ol xicjoccham ebꞌ dꞌa qꞌuen espada, aton ebꞌ tzꞌalan icha tic: A juntzan̈ yaelal chiꞌ, man̈ ol jalaj dꞌa quibꞌan̈, man̈ ol on̈ yamchaj yuuj, xchi ebꞌ, xchi Jehová chiꞌ.
Ol bꞌochajxiqꞌue Jerusalén dꞌa bꞌaqꞌuin̈
11 Ix yalan Jehová: A yopisio vin̈aj David ix lajviem icha junoc pat jubꞌilemi, palta ay jun cꞌual ol in bꞌoxiqꞌuei. Ol vacꞌanpax yopisio vin̈ dꞌa yin̈tilal, icha dꞌa pecaꞌ. 12 Ichato chiꞌ, a jantacto ebꞌ aj Edom olto canoc yedꞌ masanil juntzan̈xo chon̈abꞌ to victaxoni, ol ochcan ebꞌ dꞌa yol scꞌabꞌ yin̈tilal Israel, xchi Jehová Jun ix acꞌancan slolonel, ol yacꞌanpax elcꞌochoc.
13 Syalxi Jehová: Ol javoc stiempoal ayic manto lajvi sjochchaj ixim trigo, ol cꞌoch pax stiempoal sdꞌocchajxi luum yic tzꞌavchaj ixim junelxo. Manto lajvi stecꞌchajel yal sat teꞌ uva, tzꞌochxi avoj trigo junelxo. Axo dꞌa jolomtac vitz yedꞌ dꞌa tzalquixtac, ol ste aqꞌuej sat teꞌ uva, ol bꞌey yal sat teꞌ icha sjaj a aꞌ, 14 yujto ol vicꞌcot in chon̈abꞌ Israel bꞌaj aybꞌat dꞌa chꞌoc chon̈abꞌil. Ol laj sbꞌoanxi schon̈abꞌ ebꞌ juvinaquemi, yic scajnajxi ebꞌ dꞌay, ol yavanxi yuva ebꞌ, ol yucꞌan vino ebꞌ. Ol yavan teꞌ avbꞌen teꞌ ebꞌ, ol sloan sat teꞌ ebꞌ.
15 A in Jehová Dios in svalaꞌ, ol vacꞌxi cajnaj ebꞌ dꞌa sluum. Man̈xa bꞌaqꞌuin̈ ol el ebꞌ junelxo dꞌa sat slum ix vacꞌ chiꞌ, xchi Jehová.