3
Syalan Jehová icha tic: A val dꞌa jun cꞌual chiꞌ, ol vacꞌxi in vachꞌcꞌolal dꞌa Judá yedꞌ dꞌa Jerusalén.2 Ol in molbꞌan masanil juntzan̈ nación, ol vicꞌanbꞌat dꞌa schꞌolanil yic Josafat. Ataꞌ ol vacꞌ yaelal dꞌa yibꞌan̈ ebꞌ yuj tas ix yutej in chon̈abꞌ Israel ebꞌ, yujto ix saclembꞌat ebꞌ israel chiꞌ yuj ebꞌ dꞌa masanil yolyibꞌan̈qꞌuinal. Ix spucanbꞌat in lum ebꞌ dꞌa spatic.*
3 Ix spucanbꞌat ebꞌ in chon̈abꞌ ebꞌ dꞌa suerteal. Ix schon̈anel ebꞌ vinac unin yedꞌ ebꞌ ix unin ebꞌ, ix satanel stojol ebꞌ unin chiꞌ ebꞌ dꞌa uqꞌuel an̈ yedꞌ dꞌa ebꞌ ix ajmul ix.
A yaelal ol yacꞌ Jehová dꞌa yibꞌan̈ masanil nación
4 ¿Tas e gana dꞌayin ex aj Tiro, ex aj Sidón yedꞌ ex aj Filistea? ¿Tom e gana tze pac e bꞌa dꞌayin? Tato e gana tze pac e bꞌa, dꞌa elan̈chamel ol vacꞌ spac dꞌayex icha val dꞌa smojal. 5 A ex tic, ix eyelqꞌuej qꞌuen plata yedꞌ qꞌuen oro dꞌayin, ix eyicꞌanbꞌat in bꞌeyumal dꞌa e templo. 6 Ix e chon̈bꞌat ebꞌ aj Judá yedꞌ pax ebꞌ cajan dꞌa Jerusalén dꞌa ebꞌ griego, yic najat sbꞌatcan ebꞌ dꞌa sluum. 7 Palta a in ol viqꞌuelta ebꞌ bꞌaj ix e chon̈bꞌat chiꞌ. A exxo ol vacꞌ eyabꞌ syail, icha val ix aj yabꞌan syail ebꞌ chiꞌ eyuuj. 8 A in val Jehová in svalaꞌ to ol vacꞌoch ebꞌ eyuninal yedꞌ ebꞌ eyisil dꞌa yol scꞌabꞌ ebꞌ aj Judá. Axo ebꞌ ol chon̈anel ebꞌ dꞌa ebꞌ sabeo, aton ebꞌ te najat cajan, xchi Jehová.
9 Alec juntzan̈ tic dꞌa masanil nación: Bꞌoec e bꞌa dꞌa oval. Avtejec ebꞌ te tecꞌan. Javocabꞌ ebꞌ yic sbꞌat ebꞌ dꞌa oval chiꞌ.
10 Sbꞌoꞌocabꞌ qꞌuen asaron ebꞌ yespadaoc. A qꞌuen sjochlabꞌ trigo ebꞌ, sbꞌoꞌocabꞌpax qꞌuen ebꞌ slanzaoc. A mach malaj yip, yalocabꞌi to te ay yip ticnaic.
11 Masanil anima dꞌa juntzan̈ nación ay dꞌa spatic yichan̈ Israel, cotocabꞌ ebꞌ dꞌa elan̈chamel, smolbꞌejocabꞌ sbꞌa ebꞌ. Ix valan icha tic: Mamin Jehová, icꞌcot ebꞌ a soldado te tecꞌan, xin chi.
12 Syalan Jehová icha tic: Sbꞌoꞌocabꞌ sbꞌa masanil nación, javocabꞌ ebꞌ dꞌa schꞌolanil Josafat, yujto ataꞌ ol in em cꞌojan dꞌa in despacho yic tzin chꞌolbꞌitej masanil chꞌoc nacional ay dꞌa spatic yichan̈ in chon̈abꞌ tic.
13 Yuj jantac schucal juntzan̈ nación chiꞌ, yuj chiꞌ toxo ix javi scꞌual schꞌolbꞌitaj ebꞌ. Icha tzꞌaj sjochchaj ixim trigo toxo ix cꞌanbꞌi, icha chiꞌ tzeyutej ebꞌ. Teqꞌuequem ladꞌan ebꞌ, icha stecꞌchaj teꞌ sat uva vachꞌxo yaji yic sbꞌochaj vino, xchi Jehová.
14 Man̈xo jantacoc anima dꞌa schꞌolanil bꞌaj ol chꞌolbꞌitaji. Toxo ol cꞌoch scꞌual yic yoval scꞌol Jehová taꞌ.
15 A cꞌu yedꞌ qꞌuen uj, man̈xo ol yacꞌlaj yoc yedꞌ pax qꞌuen cꞌanal, man̈xalaj scopopial qꞌueen.
16 Icha scꞌan̈ cꞌu, icha val chiꞌ ol aj yacꞌan abꞌchaj sjaj Jehová scot dꞌa jolom vitz Sion dꞌa Jerusalén. A satchaan̈ yedꞌ lum luum, ol ibꞌxoc. Axo Jehová ol colan schon̈abꞌ, aton chon̈abꞌ Israel.
Ol ajxoc stzalajcꞌolal Judá
17 Ix yalan Jehová: A ex tic ol eyojtaquejeli to a in Jehová e Diosal in, ayinecꞌ dꞌa tzalan Sion bꞌaj tzꞌoch ejmelal dꞌayin. A Jerusalén tic, in chon̈abꞌ ol ajcanoc. Man̈xa bꞌaqꞌuin̈ ol ex can dꞌa yol scꞌabꞌ ebꞌ chꞌoc chon̈abꞌil.
18 A dꞌa jun tiempoal chiꞌ, ol te qꞌuibꞌ teꞌ uva dꞌa jolomtac vitz yedꞌ masanil tzalquixtac ol bꞌudꞌjoc el yuj nocꞌ vacax. A sjajtac a aꞌ dꞌa Judá, ol te qꞌue aꞌ. Axo dꞌa in templo ol qꞌueul bꞌurnaj jun sjaj aꞌ, ol pucaxbꞌat aꞌ dꞌa schꞌolanil Sitim.
19 A Egipto, ol ixtaxcanbꞌatoc. Axo Edom, tzꞌinan luum ol ajcanoc, yujto ix yacꞌ oval ebꞌ yedꞌ ebꞌ aj Judá. Ataꞌ ix tobꞌcan schiqꞌuil ebꞌ malaj smul yuj ebꞌ.
20 A in ol in pactzitej schamel ebꞌ smilnac ebꞌ.
21 Man̈xo ol vacꞌ nivancꞌolal ebꞌ ay smul chiꞌ. Vachꞌ ol aj scajnaj Judá yedꞌ Jerusalén dꞌa masanil qꞌuinal. A inxo Jehová in tic, ol in cajnaj dꞌa jolom vitz Sion, xchi Jehová.