Oseas sbꞌi jun libro tic, yujto a slolonel Dios yalnac dꞌa vin̈aj Oseas tzꞌibꞌabꞌilcan dꞌay. A vin̈aj Oseas chiꞌ schecabꞌ Dios yaj vin̈. Lolonnac vin̈ dꞌa ebꞌ yetisraelal cajan dꞌa stojolal norte ayic ecꞌnacxo vin̈aj Amós. A dꞌa jun tiempoal chiꞌ te ay smay, ayic manto acꞌji ganar chon̈abꞌ Samaria dꞌa abꞌil 721 ayic manto javi Jesucristo. A vin̈aj Oseas chiꞌ, ochnac val vin̈ ilcꞌolal yuj ebꞌ yetchon̈abꞌ, yujto tzꞌoch ebꞌ ejmelal dꞌa juntzan̈ comon dios, spitanpax sbꞌa ebꞌ dꞌa Jehová. A vin̈aj Oseas chiꞌ, slajbꞌej schucal spensar ebꞌ yetisraelal vin̈ yedꞌ schucal spensar ix yetbꞌeyum vin̈, aton ix Gomer, yujto ajmul ix ix. Icha val yutejnac ix yactancan vin̈aj Oseas chiꞌ, icha pax chiꞌ syutej sbꞌa ebꞌ israel yactancan Jehová. Yuj chiꞌ javinac yaelal dꞌa yibꞌan̈ ebꞌ. Axo dꞌa slajvubꞌxo ocꞌnacxi scꞌol Dios dꞌa schon̈abꞌ chiꞌ, sxajananxi, yicꞌannacxi meltzajoc yic tzꞌochxican ebꞌ yicoc. A jun libro tic, cha macan̈ yaji: Bꞌabꞌel macan̈, tzꞌel yich dꞌa capítulo 1 masanto dꞌa 3. A dꞌa tic syal yabꞌixal vin̈aj Oseas chiꞌ yedꞌ ix yetbꞌeyum. Schabꞌil macan̈, tzꞌel yich dꞌa capítulo 4 masanto dꞌa 14. A dꞌa tic syalcot tas albꞌilcan dꞌa yibꞌan̈ chon̈abꞌ Israel.